Elda Alfred Kyungu

Jeneral Atoriti Seventi

Long 1991, Alfred Kyungu i bin wan studen we i gat 24 yia long Yunivesiti blong Lumbumbasi long Dimokratik Ripablik blong Kongo, mo i bin laef wetem anggel blong hem, Polydor Ngoy. Wan dei, anggel blong hem i talem long hem abaot wan apoenmen wetem sam misinari blong Jos Ia blong Jisas Kraes blong Ol Lata-dei Sent.

“No mestem gudfala janis ia,” anggel blong hem i talem.

I no longtaem, hem mo anggel blong hem oli bin stap mit oltaem wetem wan senia misinari kapol we oli kam long Yuta. Long fas ples, Alfred i fraet blong kam joenem wan niu relijin we i kam long wan defren ples. Afta sikis manis blong toktok storian mo ansa long plante kwestin, Alfred mo anggel blong hem oli bin baptaes long 21 Septemba 1991.

Long sam wei, blong joenem Jos i no wan isi jenis. Plante, long komuniti, oli no luk Jos long wan gudfala ae, mo oli bin stap askem olgetawan sapos ol Ol Lata-dei Sent oli ol man we oli tingting tumas, o i tru se oli ol Kristin man. Laki, ol memba blong smol branj blong olgeta oli bin kaen, mo oli welkamem man. Elda Kyungu mo anggel blong hem oli kasem paoa from oli bin stap “tijim ol prinsipol we Jisas Kraes i bin stap tijim.”

Elda Kyungu i maredem Lucie Kabulo Malale long 1998. Tufala i bin sil long Joanesbeg Saot Afrika Tempol long 2004. Tufala i papa mo mama blong tu gel mo wan boe.

Alfred Kyungu Kibamba i bin bon i kam long wol ia long Kamina, Dimokratik Ripablik blong Kongo, long 31 Oktoba 1966, mo papa mo mama blong hem i Domitien Kyungu Nkimba mo Celestine Ngoy Mbuyu.

Elda Kyungu i kasem digri long mo wan masta digri long sosol saens mo intanasonol rilesen long Yunivesiti blong Lumbumbasi. Hem i bin wok long plante gavman posisen blong Dimokratik Ripablik blong Kongo mo blong Jos olsem wan kodineta blong ol seminari mo ol institiut, mo olsem wan famli histri maneja.

Hem i bin stap olsem wan Eria Seventi long taem blong koling blong hem, mo hem i bin stap olsem wan institiut tija, wan wod Sandei Skul tija, wan kaonsela long wan bisoprik, hae kaonsela, kaonsela long wan stek presidensi, mo presiden blong Dimokratik Ripablik blong Kongo Mbui-Mayi Misin, stat long 2016 kasem 2019.