Susan H. Porter

Fas Kaonsela long Praemeri Jeneral Presidensi

Afta we hem i bin lusum hasban blong hem, we i Elda Bruce D. Porter, wan Jeneral Atoriti Seventi, from hem i kasem wan sik long lang blong hem long Disemba 2016, Sista Susan Porter i stap hemwan long hom blong tufala long Baontiful, Yuta, YSA.

Blong kolosap tu yia bifo hem i ded, sista ia i bin travel mo i bin givim seves long saed blong hem taem hem i bin stap olsem presiden blong Yurop Is Esia.

Olsem wan niu wido, hem i bin prea blong kasem help. Wan dei, hem i luk peinting blong Sevya we i stap toktok long Woman Sameria long wel blong Jekob (luk long Jon 4:6–26). Hem i bin filim Spirit i toktok long hem, i talem se bae i mekem i semmak, se “bae i sidaon long leg blong Sevya mo lanem samting, mo bambae Hem i tijim yu.”

Sista Porter i bin traehad blong kam kolosap moa long Sevya, mo Tabu Spirit i bin givim kamfot long hem mo i bin lidim hem i go fored.

Hem i talem: “Mi save se oli tekem mi i go. “Mi bin gat paoa mo pis we i bitim hemia blong miwan bakegen.”

Taem we ol Praemeri pikinini raon long wol oli fesem fasin blong agens, Sista Porter i wantem olgeta blong save se God i lavem olgeta.

“Sapos Jisas i stap wetem olgeta naoia, bae Hem i tekem olgeta, wan afta wan, mo bae i blesem olgeta, mo bae i prea from olgeta, semmak olsem we Hem i bin mekem blong ol pikinini blong Ol Man blong Nifae, longtaem finis i pas [luk long 3 Nifae 17:21]. Mi hop se wanwan pikinini bae i prea from help blong Hem, mo bae i askem blong luk han blong lav blong Hem insaed long laef blong olgeta.”

Susan Holland Porter, i bon long 31 Julae 1955, long Ponka Siti, Oklahoma, YSA, mo papa mo mama blong hem i Hans mo Charlene Holland. Sista Porter i graduet long Brigham Yang Yunivesiti wetem wan digri long kemistri. Hem i bin wok olsem asisten blong laborotri mo olsem wan tija blong matematik.

Hem i maredem Elda Porter long 1977, insaed long Wasington D.K. Tempol. Tufala i gat fofala pikinini.

Sista Porter i bin givim seves long jeneral advaes kaonsel blong Rilif Sosaeti stat long 2017. Koling blong hem bifo, i kaonsela long wan stek presidensi blong Rilif Sosaeti, wod Rilif Sosaeti, mo Yang Woman presiden, Gospel Doktrin tija, mo Praemeri miusik lida.