God I Lavem Ol Pikinini blong Hem
Mi wantem serem trifala spesifik rod we Papa long Heven i stap soemaot lav blong Hem long yumi, ol pikinini blong Hem.
Ol brata mo sista. Mi glad wetem yu long gospel ia blong Jisas Kraes. Mi tekem wetem mi, lav blong ol strong memba long Filipin, mo talem long bihaf blong olgeta: !Mabuhay
Long Ista moning ia, mi testifae abaot Kraes ia we i stap laef, se Hem i bin girap long ded, mo we lav blong Hem from yumi, mo blong Papa blong yumi long Heven i klin gud mo i no save finis. Tedei, mi wantem toktok nomo abaot lav we Papa long Heven mo Jisas Kraes, Tufala i gat long evriwan, we i kamaot tru long Atonmen blong Jisas Kraes. “God i lavem tumas ol man long wol nao i givim mi, [Wan Stret Pikinini Ia Nomo blong Hem]” (Jon 3:16).
Taem we wan enjel i bin askem profet Nifae abaot save blong hem abaot God, Nifae i talem long simpol toktok: “Mi save se hem i lavem ol pikinini blong hem” (luk long 1 Nifae 11:16–17).
Wan ves we i stap long Buk blong Momon: Wan Narafala Testeman blong Jisas Kraes, i talem wetem paoa lav ia we Sevya i gat: “Mo wol, from ol rabis fasin blong olgeta, bae oli jajem hem se hem i wan samting blong nating; … oli wipim hem, … mo oli kilim hem, … oli spet long hem, mo hem i letem samting ia, from fasin blong hem blong stap kaen wetem lav, mo from fasin blong hem blong go tru long ol hadtaem wetem longfala tingting, long ol pikinini blong ol man.” (1 Nifae 19:9). Wol lav ia blong Sevya i stamba fos biaen long evri samting we Hem i stap mekem. Yumi save se hem i semfala lav ia we Papa blong yumi we i Stap long Heven i gat long yumi, from se, wetem tingting i stap daon, Sevya i bin tijim se Hem mo Papa, Tufala i “wan” (luk long Jon 10:30; 17:20–23).
?Olsem wanem nao bae yumi gat mo soem semmak tangkyu from lav blong Tufala long evriwan? Sevya i bin tijim wetem simpol invitesen ia long evriwan se: “Sapos yufala i lavem mi, bambae yufala i save obei long ol tok blong mi” (Jon 14:15).
Presiden Dallin H. Oaks i tijim: “Lav blong God we i blong evriwan mo i stret gud, i kamaot long evri blesing blong plan blong gospel blong Hem, wetem trutok ia tu se, ol nambawan blesing blong Hem, Hem i holem i stap blong olgeta we oli stap obei long ol loa blong Hem.”1
Mi wantem serem trifala spesifik rod we Papa long Heven i stap soemaot lav blong Hem long yumi, ol pikinini blong Hem.
Faswan, Ol Rilesensip wetem God mo Famli I Soemaot Lav blong Hem
Ol rilesensip blong yumi we oli moa impoten, oli olgeta wetem Papa mo Pikinini mo wetem ol stret famli blong yumi, from wanem i joenem yumi long olgeta, i blong taem we i no save finis. Bigfala plan ia blong stap glad, i wan bigfala wei blong God i soem lav blong Hem long yumi. Wetem ol ae we oli lukluk nomo long plan blong God, long tingting blong yumiwan, yumi jusum blong katemaot doti mo ston insaed long yumi we i sapotem ol selfis tingting blong hat, mo yumi riplesem wetem ol fandesen we oli stap bildimap ol rilesensip we oli no save finis. Long wan wei, yumi save singaotem “digimaot graon long saed blong spirit.” Taem yumi digimaot graon long saed blong spirit, faswan, yumi mas lukaotem God mo singaotem Hem (luk long Jeremaea 29:12–13).
Blong stap lukaotem Hem mo singaotem Hem, bae yumi statem rod ia mo givim spes blong bildim mo mekem strong moa ol rilesensip ia we oli no save finis. Hem i mekem lukluk blong yumi long saed blong spirit i go longwe moa, mo i helpem yumi blong lukluk nomo blong jenisim wanem we yumi save kontrolem, be i no blong lukluk nomo ol fraet ia aotsaed long kontrol blong yumi. Blong stap stadi long laef mo seves blong Sevya blong yumi, Jisas Kraes, bae i mekem se yumi save lukluk long ol nara wari ia wetem wan lukluk we i no save finis.
Samting i save kam blong pulum tingting blong yumi we i save blokem yumi blong filim lav ia blong God insaed long ol famli rilesensip mo aktiviti blong yumi. Wan mama, we i filim se sam smol tul blong teknoloji oli stap tekova long famli rilesensip blong hem, i faenem wan ansa. Long taem blong kakae long tebol, mo long ol nara famli taem, hem i singaot se “Fon long tebol; bae yumi gat fes taem.” Hem i talem se hemia i niu standet blong famli blong olgeta, mo i mekem rilesensip blong olgeta olsem wan famli i kam strong moa taem oli gat ril fes taem. Naoia, oli stap gat ol kwaliti Kam Folem Mi toktok storian tugeta olsem wan famli.
Nambatu, Hem I Soemaot Lav blong Hem long Ol Pikinini blong Hem taem Hem I Singaotem Ol Profet
Wol ia blong yumi tedei, i fas long wan “wo ia blong ol toktok mo raorao blong ol tingting” (Josef Smit—Histri 1:10). Pol i mekem yumi tingbaot se “[i gat plante kaen voes long wol ia]” (1 Korin 14:10). ?Wijwan long evri voes ia bae i kamaot klia mo wetem mining mo respek tru long hadtaem ia? Hem i voes blong ol profet, ol sia, mo ol reveleta blong God.
Mi tingbaot gud se mi kasem operesen long 2018, mo taem mi gobak long wok, mi stap long paking long hedkwota blong Jos. Mi sek, mi harem voes blong Presiden Russell M. Nelson i singaot se: “Taniela, Taniela.” Mi spid i go long hem, mo hem i askem se mi oraet o no.
Mi talem: “Mi stap kam oraet, Presiden Nelson.”
Hem i givim wan kaonsel mo wan hag. Mi rili filim seves blong hem, olsem profet, i go long “wan” ia.
Presiden Nelson i bin travel i go long plante nesen blong wol ia. Long maen blong mi, hem i no stap givhan long ol taosen man, be hem i stap givhan long ol plante taosen blong ol “wan” ia. Long wei ia, Hem i serem lav ia we God i gat long evriwan long ol pikinini blong Hem.
I no longtaem i pas, ol toktok blong Presiden Nelson oli bin wan stamba blong paoa mo insperesen long ol pipol long Filipin. Olsem evri kantri long wol, long 2020, Filipin i fesem hadtaem wetem KOVID 19 wol sik ia, mo tu wetem volkeno i faerap, graon i seksek, ol strong mo bigfala win, mo bigfala wota we i ron.
Be, olsem wan laet we i saen antap i kam daon, tru long ol dak klaod blong fraet, stap yuwan, mo lusum hop, ol toktok blong profet oli bin kam. Toktok ia i askem wol blong livim kaekae mo prea, mo i gat advaes ia blong muv fored i go, nomata long wol sik ia. Hem i invaetem yumi blong mekem ol hom blong yumi oli ol tabu haos blong fet blong yumiwan. Hem i askem Ol Lata-dei Sent long evri ples blong respektem evriwan long ol pikinini blong God mo blong letem God i win insaed long laef blong yumi.2
Semmak, las vidio blong Presiden Nelson we i talem testemoni abaot paoa blong talem tangkyu mo las prea blong hem, i bin ring raon long Filipin.3 Long provins blong Leyte, oli soem vidio long wan taem wetem ol nara fet, mo oli bin kamaot insaed long toktok blong wan pris. Filipin, wetem ful wol, i gat blesing ia blong filim lav ia blong God tru long ol toktok blong profet blong Hem, we Hem i bin jusum.
Nambatri, Fasin blong Stretem Man I Wan Wei blong Soemaot Lav blong God long Ol Pikinini blong Hem
Samtaem, God i stap soemaot lav blong Hem taem Hem i stretem yumi. Hem i wan wei blong mekem yumi tingbaot se Hem i lavem yumi mo Hem i save huia yumi. Ol promes blesing blong Hem, blong pis, i open long evriwan we i gat strong paoa long tingting blong wokbaot long kavenan rod ia, mo i glad blong oli stretem hem.
Taem yumi luksave se Hem i stap stretem yumi, mo yumi glad blong mekem folem, bae yumi kasem wan operesen long saed blong spirit. ?Hu i laekem blong oli operetem hem? Be olgeta we oli nidim, mo oli glad blong i hapen, i save sevem laef blong olgeta. Lod i stretem olgeta we Hem i lavem. Ol skripja oli talem olsem nao long yumi (luk long Hibrus 12:5–11; Hileman 12:3; Doktrin mo Ol Kavenan 1:27; 95:1). Fasin ia blong stretem man, o kasem operesen long saed blong spirit, bae i tekem jenis ia i kam long laef blong yumi. Bambae yumi luksave, ol brata mo sista, se hem i mekem ol insaed yumi, oli smut gud mo i klin evriwan.
Josef Smit, Profet blong Restoresen, God i bin stretem hem. Afta we Josef i lusum ol 116 pej blong Buk blong Momon we oli bin raetem, Lod i bin stretem hem, mo tu, i bin soem lav long hem taem Hem i bin talem: “Yu no sapos blong fraet long man bitim we yu fraet long God. … Yu sapos blong stap fetful. … Luk, yu yu Josef, mo yu nao God i bin jusum. … Be tingbaot, God i gat fulap sore; from hemia, sakem sin” (Doktrin mo Ol Kavenan 3:6–10).
Long 2016, taem hem i bin stap mekem misin blong hem long Smol Ston, Akansas, mi bin askem Brata Dava blong i tekem wan smol pasel i go long bigfala sista blong mi, we i stap long wan aelan long Fiji. Ansa blong hem i no bin wan samting we mi ting long hem. “Presiden Wakolo,” hem i talem strong, “sista blong yu i ded finis mo oli berem hem 10 dei i pas finis.” Mi sore long miwan, mo mi iven harem nogud se famli blong mi i no talemaot long mi.
Long nekis dei, taem waef blong mi i stap tijim ol misinari, tingting ia i kam insaed long sol blong mi: “Taniela, evri eksperiens ia oli blong gud blong yu mo blong yu groap. Yu bin stap tijim mo serem testemoni blong yu abaot Atonmen blong Jisas Kraes; naoia yu laef folem.” Mi tingbaot se “Olgeta we God i stap stretem laef blong olgeta, bambae oli harem gud; Sapos hem i tok long yu from rong blong yu, be yu no mas kros from” (Job 5:17). Long mi, i wan operesen long saed blong spirit, mo risal i kamaot kwiktaem.
Taem mi bin stap tingting long eksperiens ia, oli singaotem mi blong mi givim las toktok blong mi long storian we i stap gohed. Wetem sam nara samting, mi bin serem ol lesen we Lod i jes tijim mi long hem: wan, Tabu Spirit i stretem mi, mo mi laekem from se miwan nomo mi bin harem; tu, from sakrifaes mo praes we Sevya i pem, bae mi nomo tokbaot ol jalenj blong mi olsem ol tes mo hadtaem, be olsem ol eksperiens blong lanem samting; mo tri, from laef blong Hem i stret evriwan we i no gat sin, bae mi nomo tokbaot ol sotmaen mo wanem mi no save mekem olsem ol wiknes, be ol janis blong develop. Eksperiens ia i helpem mi blong save se Lod i stap stretem yumi from se Hem i lavem yumi.
Bae mi endem. Papa blong yumi We I No Save Finis, mo Pikinini blong Hem, Jisas Kraes, Tufala i soem lav blong Tufala taem Tufala i bin mekem se i posibol blong gat ol rilesensip we oli no save finis wetem Tufala mo ol memba blong famli blong yumi; taem Hem i stap singaotem ol profet blong tedei blong oli tij mo oli givhan long yumi, mo taem Tufala i stretem yumi blong helpem yumi blong lan mo groap. “Yumi talem tangkyu long God from presen ia we i no gat samting i bitim, we i tabu Pikinini blong Hem,”4 Lod ia we i bin laef bakegen long ded, we i Kraes ia we i stap laef. Long nem blong Jisas Kraes, amen.