Ol Haelaet blong Namba 191 Yia Jeneral Konfrens

Stamba lukluk blong Jeneral Konfrens we Jos i holem long Ista wiken ia, i bin Sevya Jisas Kraes, mekem ol memba oli kam strong moa, mo paoa blong Jos long wol.

• Pej 6: Long fas toktok blong hem, Presiden Russell M. Nelson i talem: “Yumi kam tugeta olsem wan bigfala wol famli we i wantem wosipim Lod mo Sevya blong yumi, Jisas Kraes.” Hem i poenemaot se “paoa blong Jos i stap long ol hadwok mo ol testemoni we oli gohed blong kam strong, blong ol memba.” Truaot long konfrens, ol hadwok blong ol lida blong Jos blong mekem wanwan memba i kam strong moa, i bin kamaot klia.

• Pej 79: Long taem blong prishud sesen, Presiden Nelson i tijim olsem wanem blong mekem hom blong yumi i kam wan tabu ples, i “senta blong lanem gospel mo laef folem gospel,” iven afta we wol sik ia bae i finis.

• Pej 101: Long Sandei moning mesej blong hem, Presiden Nelson i mekem i klia se Jos ia, i wan wol Jos wetem wan gospel we i blong evri pipol: “Tedei moning, yumi harem ol lida blong Jos we oli kam long evri ples we man i save laef long hem long wol ia.” I tru, ol blesing ia blong gospel oli blong evri kala blong skin, evri lanwis mo evri pipol. Jos Ia blong Jisas Kraes, i wan wol jos. Jisas Kraes i lida blong yumi.”

• Pej 127: Antap long hemia, efot ia blong mekem ol memba oli kam strong moa, i kamaot klia tru long anaonsmen blong 20 niu tempol. “Mifala i wantem tekem haos blong Lod i kam kolosap moa long ol memba blong yumi,” Presiden Nelson i talem long las toktok blong hem. I namba blong ol tempol we i moa bigwan long histri we oli bin anaonsem stat long 1998 i kam; Presiden Gordon B. Hinckley i bin anaonsem 32 tempol, we i bin openem wan niu taem blong stat blong gat moa tempol.

• Pej 139: Blong gat moa eksampol long wei we Jos i stap wantem mekem evri pikinini blong God oli kam strong moa, luk long ol haelaet blong bigfala namba blong ol yumaniterian projek we oli komplitim long 2020.