Stap Wokbaot long Kavenan Rod
Wanem i defren abaot kavenan rod ia, hem i impoten from i spesel mo i gat mining long taem we i no save finis.
Truaot long seves blong hem, Presiden Russell M. Nelson i bin stadi mo tijim abaot ol kavenan blong God wetem ol pikinini blong Hem. Hemwan i wan gudfala eksampol blong wan we i wokbaot long rod blong kavenan ia. Long fas mesej blong hem olsem Presiden blong Jos, Presiden Nelson i talem:
“Komitmen blong yu blong folem Sevya taem yu mekem ol kavenan wetem Hem, mo afta, blong gohed blong holem ol kavenan ia, bambae i openem doa long evri blesing long saed blong spirit, mo blong kasem spesel janis ia we i stap long ol man, woman, mo pikinini long evri ples.
“ … Ol odinens blong tempol mo ol kavenan we yufala i mekem insaed ia, oli ki blong mekem laef, mared, mo famli i gat moa paoa, mo oli ki blong mekem se yu gat paoa blong stanap fesem mo no foldaon long ol agens blong enemi. Wosip blong yufala insaed long tempol mo seves blong yufala long ples ia blong ol bubu blong yufala, bambae oli blesem yufala long wei ia we bae yufala i kasem moa revelesen blong yufalawan, bae yufala i kasem moa pis, mo bae i mekem yufala i moa strong blong wok blong stap long rod ia blong kavenan.”1
?Wanem i kavenan rod ia? Hem i wan rod ia nomo long laef we i lidim yumi i go long selestial kingdom blong God. Yumi go long rod ia taem yumi kam insaed long get blong baptaes, mo afta, “mas wokbaot i go wetem strong bilif long Kraes, wetem wan stret mo klin hop, mo wan lav long God mo long evri man [tufala hae komanmen] … i go kasem en.”2 Long wokbaot blong yumi long kavenan rod ia, (we i stap gohed afta long laef long wol ia), yumi kasem evri odinens mo kavenan long saed blong fasin blong sevem man mo kam olsem wan god.
Bigfala komitmen long kavenan blong yumi, i blong mekem tingting blong God, “blong obei ol komanmen blong hem, long evri samting we bae hem i askem mifala.”3 Blong stap folem ol prinsipol mo ol komanmen blong gospel blong Jisas Kraes dei afta dei, i rod we i mekem man i moa hapi mo i glad long laef blong hem. Wan samting i stap, wan i stap longwe long ol problem mo harem nogud. Bae mi yusum wan analoji blong spot. Long tenis, i gat wanem oli singaotem ol mistek we oli no fosem man blong mekem. I gat ol samting olsem kilim balong i go long net, o mekem dabol mistek taem yu wantem plei. Ol mistek we oli no fosem yu long ol, oli tekem se i risal blong pleya we i no plei gud, be i no hem we i agens we i mekem hem.
Plante taem tumas, ol problem mo ol jalenj blong yumi, yumi givim long yumiwan, i risal blong ol pua joes, o, yumi save talem se i risal blong ol “mistek we oli fosem.” Taem yumi stap wok strong blong gohed long kavenan rod ia, bae i kam nomol nomo blong stap longwe long plante “mistek we man i no fosem yu long hem.” Yumi tekem step we i kamaot long eni kaen adiksen. Yumi no foldaon long hol blong ol fasin we i no ones. Yumi pas krosem ol bigbigfala hol blong rabis fasin long saed blong seks mo fasin blong no stap fetful. Yumi pas bitim ol pipol mo ol samting we, nomata oli popula, bae oli spolem gud helt blong bodi mo blong spirit blong yumi. Yumi no stap mekem ol joes we bae oli spolem ol narawan, be yumi tekem ol evri dei fasin blong gat disiplin mo givim seves.4
Elda J. Golden Kimbol, oli stap talem se hem i se: “Maet mi no wokbaot oltaem long rod ia we i stret mo i no isi, be mi traem blong krosem plante taem olsem mi save mekem.”5 Long wan taem we i moa series, mi sua se Brata Kimbol bae i agri se, blong stap, be i no blong krosem kavenan rod ia, i hop ia blong yumi we i moa bigwan blong stap longwe long ol bigfala harem nogud we yumi save stap longwe long ol long wan han, mo blong gat sakses blong lukluk long ol bigfala harem nogud blong laef we yumi no save stap longwe long ol.
Sam bae oli save talem: “Baptaes o no baptaes, mi save mekem ol gud joes nomo; mi no nidim ol kavenan blong stap olsem wan gud man mo gat sakses.” I tru we i gat plante, we, nating oli no wokbaot long kavenan rod ia, oli mekem samting we i semmak long ol joes mo kontribusen blong olgeta we oli stap long rod ia. Maet yu save talem se oli pikimap ol blesing blong stap wokbaot “oltaem long kavenan rod ia.” ?Nao, wanem nao hem i defren wetem kavenan rod ia?
Yes, wanem i defren i spesel mo i gat mining long taem we i no save finis. Hem i tekem fasin blong yumi blong stap obei, fasin blong God blong lukluk long yumi, tabu help we yumi kasem, ol blesing we oli fas long fasin blong kam tugeta olsem wan kavenan pipol, mo moa impoten, wanem i stap blong yumi kasem long taem we i no save finis.
Gat Tingting mo Fasin blong Stap Obei
Faswan, hem i fasin we yumi stap obei long God. Yumi no gat ol simpol gud tingting long hat nomo, be yumi givim ful tingting mo fasin blong laef folem evri toktok we oli kamaot long maot blong God. Taem Hem i bin kasem baptaes, “hem i soem long ol pikinini blong ol man we, folem bodi blong mit mo bun, hem i putum tingting blong hem i stap daon long fored blong Papa, mo hem i witnes long Papa se bae hem i obei long hem blong obei ol komanmen blong hem.”6
Wetem ol kavenan, yumi wantem blong mekem moa bitim blong jes stap longwe long ol mistek o lukaotgud long ol desisen blong yumi. Yumi filim se yumi stap ansa long God from ol joes blong yumi mo laef blong yumi. Blong tekem long yumiwan nem blong Kraes. Yumi lukluk nomo long Kraes—yumi stap strong long testemoni abaot Jisas mo blong stap developem fasin blong Kraes.
Wetem ol kavenan, fasin blong stap obei long ol prinsipol blong gospel i tekem rus insaed long stret sol blong yumi. Mi mi savegud wan kapol we, taem tufala i mared, waef i no bin aktiv gud long Jos, mo hasban ia i neva bin wan memba blong Jos. Bae mi givim nem blong tufala se Meri mo Jon, i no stret nem blong tufala. Taem ol pikinini oli stat blong kam, Meri i filim strong blong resemap olgeta, olsem we skripja i talem: “long ol fasin we Lod i lukaotgud mo i givim advaes long man.”7 Jon i sapotem. Meri i mekem sam impoten sakrifaes blong stap long hom blong tijim gospel long wan evri dei fasin. Hem i meksua se famli i tekem evri gud samting long wosip mo aktiviti long Jos. Meri mo Jon i kam papa mo mama we i givim eksampol, mo pikinini blong tufala (evriwan i ol strong boe) oli groap long fet mo ful tingting long ol prinsipol mo standet blong gospel.
Papa mo mama blong Jon, bubuman blong ol boe, oli bin glad wetem gudfala laef mo ol ajivmen blong ol apuboe blong olgeta, be from sam samting agensem Jos, oli bin wantem givim sakses ia nomo long skil blong Jon mo Meri olsem papa mo mama. Jon, nomata i no wan memba blong Jos, i no lego hemia i go nating. Hem i talem se oli bin stap witnesem ol frut blong ol tijing blong gospel—wanem we ol boe blong hem oli bin stap gotru long jos, mo tu, wanem i bin stap hapen long hom.
Jon hemwan, Spirit, lav mo eksampol blong waef blong hem, mo ol toktok blong ol boe blong hem oli bin stap lidim tingting blong hem. I kam taem we hem i bin kasem baptaes, mo ol memba mo fren blong wod oli bin glad tumas.
Nomata se laef i bin gat ol jalenj blong tufala mo boe blong tufala, Meri mo Jon, wetem ful hat blong olgeta, oli talem se, kavenan blong gospel nao i rus blong ol blesing blong olgeta. Oli bin luk toktok blong Lod long Jeremaea oli kam tru insaed long laef blong ol pikinini blong tufala mo tufala tu: “Mi bambae mi putum loa blong mi long tingting blong yufala, mo bambae mi raetemdaon long hat blong yufala. Mo mi bambae mi God blong yufala, mo yufala bambae i man blong mi.”8
Joen long God
Wan nambatu saed blong kavenan rod ia, we i no gat wan moa i semmak long hemia, i rilesensip blong yumi wetem Hae God. Ol kavenan we God i givim long ol pikinini blong Hem, oli mekem moa bitim blong soem rod. Ol kavenan ia oli fasem yumi long Hem, mo taem yumi joen long Hem, yumi save winim evri samting.9
Wan taem, mi bin ridim wan atikol blong wan pepa we i no gat gud infomesen, we i talem se wei we yumi stap mekem baptaes blong ol dedman, i blong draonem ol maekrofilm insaed long wota. Nao, evri nem we oli stap long maekrofilm, bae yumi tekem se oli baptaes. Kaen rod ia bae i gud tumas, be bae i no wantem save hamas wanwan sol i impoten mo hamas wan kavenan blong wanwan wetem God i impoten.
“Jisas i talem … : “Yufala i go insaed long smol get; from get ia we i smol, mo rod ia we i no isi i lidim man i go long laef, mo i gat smol namba nomo we oli faenem.”10 Long toktok haed, get ia i smol gogo, mekem se i letem wan nomo i save pas long wan taem. Wanwan i mekem wan komitmen blong hemwan i go long God, mo i God i givim hem wan kavenan we i blong hemwan, we i gat wan nem, mo hem i save dipen long kavenan ia fulwan long taem naoia mo taem we i no save finis. Wetem ol odinens mo ol kavenan ia, “paoa we i olsem hemia blong God, i kamaot.”11
Help we I Kam long Heven
Hemia i lidim yumi long wan nambatri spesel blesing blong kavenan rod ia. God i givim wan presen we man i no andastanem blong helpem ol man we oli mekem kavenan blong stap kipim kavenan: presen we i Tabu Spirit. Presen ia, i raet blong gat kampani, proteksen, mo help blong Tabu Spirit oltaem.12 Oli save Hem tu olsem Spirit blong Givhan, Tabu Spirit we “i fulumap man wetem hop mo lav we i stret evriwan.”13 Hem i “save evri samting, mo i witnes long saed blong Papa mo Pikinini,”14 yumi komitim yumi blong stap witnes blong Hem.15
Long kavenan rod ia, yumi stap faenem tu ol blesing we i nid, blong fogivnes mo kam klin aot long sin. Hemia i help we i kam nomo tru long gladhat we i kam long heven, we Tabu Spirit i givim. “Nao hemia i komanmen,” Lod i talem: “Sakem sin, yufala evriwan long evri en blong wol, mo kam long mi mo kasem baptaes long nem blong mi, blong yufala i save kam tabu taem we yufala i kasem Tabu Spirit, blong yufala i save stanap mo yufala i no gat mak long fored blong mi long las dei.”16
Kam Tugeta Wanples Wetem Ol Kavenan Pipol
Nambafo, olgeta we oli stap folem kavenan rod ia, oli faenem tu ol blesing we i spesel long ol defdefren ples blong kam tugeta long hem. Profesi ia, we i tokbaot se ol longtaem traeb blong Isrel bae oli kam tugeta wan ples long ol graon we oli kasem long papa blong olgeta, oli stap long ol skripja.17 Wok ia blong olgeta profesi ia mo promes ia oli kamtru, i stap gohed finis wetem kam tugeta wanples blong ol kavenan pipol insaed long Jos, we i kingdom ia blong God long wol. Presiden Nelson i eksplenem: “Taem yumi stap tokbaot kam tugeta, yumi stap talem stamba trutok ia nomo: evriwan long ol pikinini blong Papa blong yumi long Heven, … i nidim blong harem mesej blong gospel we i kambak, we i blong Jisas Kraes.”18
Lod i givim komanmen long ol memba blong Jos Ia blong Jisas Kraes blong Ol Lata-dei Sent blong oli “mas girap mo saenaot, blong laet blong yufala i stap olsem wan flag long ol nesen; … blong wok blong karem ol pipol oli kam wanples long graon blong Saeon, mo long ol stek blong hem, bae i blong oli save difendem olgeta, mo blong oli stap long wan sef ples long taem blong strong win, mo long taem blong bigfala nogud kros, hemia long taem we bae mi kapsaetem ful paoa blong hem long ful wol.”19
I gat wan kam tugeta tu evri wik blong ol kavenan pipol long haos blong prea long dei blong Lod, blong yumi “save lukaot gud blong ol samting blong wol oli no spolem [yumi].”20 Hem i wan kam tugeta blong tekem mo kakae bred mo wota blong sakramen blong stap tingbaot Atonmen blong Jisas Kraes, mo i wan taem blong “livim kakae mo blong prea, mo blong toktok wan wetem narawan long saed blong gudlaef blong sol blong [yumi].”21 Olsem wan yangfala, mi mi wan memba ia nomo blong Jos long klas long sekendri Skul. Mi laekem blong joen wetem plante gud fren long skul, be yet, mi dipen fulap long kam tugeta ia long Sabat evri wik blong mekem mi kam niu bakegen long saed blong spirit mo iven long bodi. Sore, yumi lusum kam tugeta ia long taem blong wol sik naoia, mo yumi wet wetem strong tingting from taem ia we bae yumi save kam tugeta bakegen olsem bifo.
Ol kavenan pipol tu oli kam tugeta long tempol, haos ia blong Lod, blong kasem ol odinens, ol blesing, mo revelesen we i spesel long ples ia. Profet Josef Smit i tijim: “?Wanem Stamba tingting blong kam tugeta … blong ol pipol blong God long eni yia blong wol ia? … Stamba tingting i blong bildim wan haos long Lod, wan ples we Hem i save talemaot long ol pipol, ol odinens blong haos blong Hem, mo ol glori blong kingdom blong Hem, mo tijim ol pipol wei ia blong fasin blong sevem man; from se i gat samfala odinens mo prinsipol we, taem oli tijim mo praktisim, oli mas mekem nomo long wan ples o haos we oli bildim from stamba tingting ia nao.”22
Stap Kasem Ol Promes blong Kavenan
Long en, taem yumi stap gohed nomo long kavenan rod ia, we bae yumi kasem ol blesing blong Ebraham, Aesak, mo Jekob, ol bigfala blesing blong fasin blong sevem man mo kam olsem god, we God nomo i save givim.23
Ol skripja we oli tokbaot ol kavenan pipol, plante taem oli ol stret laen blong Ebraham, o “laen blong Isrel.” Be ol kavenan pipol oli tekem evriwan we oli kasem gospel ia blong Jisas Kraes.24 Pol i eksplenem:
“Yufala evriwan we i baptaes finis blong joen long Kraes, yufala i tekem Kraes finis, olsem we yufala i putum klos long yufala. …
Mo sapos yufala i blong Kraes, ale, yufala i olsem ol laen ya blong Ebraham. Mo bambae yufala i save kasem ol samting ya we God i promes finis blong givim long ol laen ya blong hem.”25
Olgeta we oli stap tru long ol kavenan blong olgeta, “oli olgeta we bambae oli girap long laef bakegen long ded blong ol stret man.”26 Oli kam “ol stret man we oli kam stret gud evriwan tru long Jisas, we i man blong toktok from niu kavenan, … Olgeta ia, oli olgeta we bodi blong olgeta oli selestial, we glori blong olgeta i hemia blong san, we i glori blong God, we i hae olgeta long evriwan.”27 “Taswe, evri samting oli blong olgeta, nomata blong laef ia o blong ded, o ol samting we oli stap naoia, o ol samting we bae oli kam yet; evri samting oli blong olgeta mo olgeta oli blong Kraes, mo Kraes i blong God.”28
Bae yumi mekem folem singaot blong profet blong stap long kavenan rod ia. Nifae i bin luk yumi mo taem blong yumi, nao i raetem: “I bin hapen se mi, Nifae, mi luk paoa blong Smol Sipsip blong God, we i kamdaon long ol sent blong Jos Ia blong Smol Sipsip, mo long ol kavenan pipol blong Lod, we i seraot olbaot long ful fes blong wol; mo oli blokem olgeta wetem stret mo gud fasin mo paoa blong God long bigfala glori.”29
Wetem Nifae, “sol blong mi i glad” long ol samting blong Lod.”30 Long Ista Sandei ia, mi testifae abaot Jisas Kraes, we Laef Bakegen long Ded blong Hem i hop blong yumi, mo i stret save ia se evri promes i stap long en blong kavenan rod ia. Long nem blong Jisas Kraes, amen.