Tingbaot Rod Blong Yu we I Gobak Hom
Yumi gat Jisas Kraes, stret eksampol blong folem, mo rod we i gohom blong yumi we i no save finis i posibol tru nomo long ol tijing blong Hem, laef blong Hem, mo atonmen sakrifaes blong Hem.
Long 1946, wan yang man blong risej, Arthur Hasler i stap klaem long wan hil kolosap long hom blong hem taem we hem i smol, taem hem i bin kasem wan eksperiens we i bin lid i go long wan impoten samting we hem i faenem, we i abaot olsem wanem ol fis oli faenem rod blong olgeta i gobak long ples we oli bon long hem.
Taem hem i klaem i go antap long wan hil, hem i no luk yet fevret wotafol blong hem taem hem i smol, Hasler i no longtaem, i tingting i gobak long sam memori we hem i bin fogetem. Hem i talem: “Olsem wan kolkol win, i foldaon long ol grup blong flaoa mo ol plan, i go raon long saed blong tu ston, ol ditel blong naesfala wotafol ia mo olsem we i stap long fes blong maonten, i kasem ae blong maen blong mi.”1
Ol smel ia oli mekem hem i konek wetem taem we hem i smol mo mekem hem i tingbaot hom blong hem.
Sapos smel i save wekemap ol kaen memori olsem blong hem, hem i tingting se, ating ol smel i save putum memori long salmon fis, we, afta hamas yia long open solwota, hem i kambak long stret ples we hem i bon mo gro long hem.
Folem eksperiens ia, Hasler, tugeta wetem ol nara risej man, oli gohed blong soem se salmon fis i tingbaot stret smel ia we bae i helpem hem swim blong plante taosen mael blong faenem rod we i gobak hom.
Stori ia i mekem mi tingting se, wan long ol impoten samting we yumi save mekem long laef ia, i hao blong luksave mo tingbaot rod we i gobak long Papa long Heven mo stap fetful mo gohed strong wetem glad long rod blong yumi.
Mi tingbaot fofala samting we taem yumi yusum mo mekem oltaem long laef blong yumi, i karem i kambak ol filing blong hom blong yumi long heven.
Faswan, Yumi Save Tingbaot se Yumi Ol Pikinini blong God.
Yumi gat wan tabu fasin. Blong save se yumi ol pikinini blong God mo Hem i wantem yumi blong gobak long ples we Hem i stap long hem, i wan long ol fas step long rod we i gobak long hom blong yumi long heven.
Mekem yu tingbaot yuwan, tabu fasin ia. Mekem taem oltaem blong wekemap spirituol bodi sistem taem yumi tingbaot ol blesing yu bin kasem long Lod. Trastem ol gaed we yu bin kasem long Hem, be i no blong tanem yuwan i go long wol blong makem hamas yu impoten mo faenem rod blong yu.
I no longtaem i pas, mi visitim wan famli afta we hem i bin go stap long hospital. Hem i talem long mi wetem hat i fulap se, taem we hem i bin stap slip long bed blong hospital, wanem we hem i bin wantem wan man blong singsing long hem, i: “Mi Pikinini blong God.” Tingting ia nomo hemwan, hem i talem, i bin givim pis we hem i bin nidim long aoa blong hadtaem ia.
Blong save huia yu, i jenisim wanem yu filim mo wanem yu mekem.
Blong andastanem huia stret yu, i priperem yu moa gud blong luk save mo tingbaot rod blong yu we i gobak long hom blong yu long heven mo wantem blong stap fri.
Nambatu, Yumi Save Tingbaot Fandesen we i Protektem Yumi.
Paoa i kam long yumi taem yumi stap stret, tru mo fetful long Papa long Heven mo Jisas Kraes, nomata se ol narawan oli no tingbaot tumas ol komanmen mo prinsipol blong fasin blong sevem man.2
Long Buk blong Momon, Hileman i tijim ol boe blong hem blong tingbaot se oli mas bildim fandesen blong olgeta long Jisas Kraes blong mekem se oli save gat paoa blong stanap agensem ol temtesen blong enemi. Ol strongfala win mo strong win blong Setan, oli fas long yumi, be oli no gat paoa blong pulum yumi i go daon sapos yumi putum tras blong yumi long ples we i moa sef—long Ridima blong yumi.3
Mi save aot long eksperiens blong miwan se, taem yumi jusum blong lisingud long voes blong Hem, mo folem Hem, bae yumi kasem help blong Hem. Bae yumi kasem wan bigfala lukluk long ol situesen blong yumi mo wan dip andastaning long stamba tingting blong laef. Bae yumi filim ol strong pul long saed blong spirit we bae i lidim yumi i gobak long hom we i stap long heven.
Nambatri, Yumi Save Tingbaot blong Stap Prea
Yumi laef long wan taem, we, wetem wan fingga o voes i givim oda yumi save stat blong lukaotem ol ansa long kolosap evri topik insaed long bigfala data we oli kipim mo oganaesem long wan bigfala mo had netwok blong kompiuta.
Long narasaed, yumi gat simpol invitesen blong stat lukaotem ol ansa we oli kam long heven. “Prea oltaem, mo bambae mi kapsaetem Spirit blong mi long yufala … Mo Lod i promesem: “Mo blesing blong yu bae i bigwan—yes, bae i moa bitim sapos yu kasem ol rij samting blong wol ia.”4
God i save fulwan wanwan long yumi mo i rere blong lisin long ol prea blong yumi. Taem yumi tingbaot blong prea, yumi faenem lav blong Hem we i leftemap yumi, mo moa yumi prea long Papa blong yumi long Heven long nem blong Kraes, moa yumi karem i kam Sevya long laef blong yumi mo bae yumi luk save moa gud rod we Hem i mekem i go long hom blong yumi long heven.
Nambafo, Yumi Save Tingbaot blong Givim Seves long Ol Narawan
Taem yumi traehad blong folem Jisas Kraes, taem yumi givim seves mo soem kaen fasin long ol narawan, yumi mekem wol i wan moa gud ples.
Ol aksen blong yumi oli save blesem bigwan laef blong olgeta raon long yumi mo laef blong yumiwan. Givim seves wetem lav, i ademap mining long laef blong tugeta, man we i givim, mo hem we i kasem.
Yu no mas ting daon long hamas yu gat paoa blong jenisim ol narawan blong gud, tugeta tru long seves blong ol aksen blong yu mo tru long seves blong eksampol blong yu.
Blong givim seves wetem lav long ol narawan, i gaedem yumi folem rod we i go long hom blong yumi long heven—rod ia blong save kam olsem Sevya.
Long 1975, olsem ansa blong wo, Arnaldo mo Eurgenia Teles Grilo mo ol pikinini blong olgeta oli mas aot mo lego biaen hom blong olgeta mo evri samting we oli gat we oli bin bildim longtaem wetem plante hadwok. Long kantri blong olgeta long Potugal, Brata mo Sista Teles Grilo i bin fesem jalenj blong statem bakegen long stat. Be sam yia afta, afta we oli joenem Jos Ia blong Jisas Kraes blong Ol Lata‑Dei Sent, oli talem, “Mifala i bin lusum evri samting we mifala i bin gat, be i bin wan gudfala samting from se i fosem mifala blong tingbaot hamas i impoten ol blesing we i no save finis.”5
Oli bin lusum hom blong olgeta long wol, be oli faenem rod we i gobak long hom blong olgeta long heven.
Nomata wanem yu mas lego biaen blong folem rod i go hom, bae wan dei, i luk olsem i no wan sakrifaes nating.
Yumi gat Jisas Kraes, stret eksampol blong folem, mo rod we i gohom blong yumi we i no save finis i posibol tru nomo long ol tijing blong Hem, laef blong Hem, mo atonmen sakrifaes blong Hem—mo tu, ded blong Hem mo Laef Bakegen long Ded blong Hem.
Mi invaetem yu blong eksperiensem glad ia blong stap tingbaot se yumi ol pikinini blong God, mo se Hem i lavem wol ia tumas, Hem i sendem Pikinini blong Hem6 blong soem rod long yumi. Mi invaetem yu blong tingbaot blong stap fetful, blong tanem laef blong yu i go long Sevya mo bildim fandesen blong yu long Hem. Tingbaot blong stap prea oltaem long rod blong yu mo givim seves long ol narawan folem rod ia.
Ol dia brata mo sista. Long Ista Sandei ia, mi talem testemoni blong mi se Jisas Kraes i Ridima mo Sevya blong wol. Hem i man ia we i save lidim yumi i go long tebol blong wan hapi laef mo gaedem yumi long rod blong yumi. Bae yumi tingbaot mo folem Hem i gobak hom. Long nem blong Jisas Kraes, amen.