Wanem we Yumi Stap Lanem mo Bae Yumi Neva Fogetem
Be, sapos yu lukluk long laef blong yu wetem prea, mi biliv se bambae yu luk plante wei we Lod i bin soem rod long yu tru long taem ia we i had.
Ol dia brata blong mi. Mi bin stap wet from onlaen miting ia wetem yufala. Las taem we yumi holem wan prishud sesen blong jeneral konfrens, i long Epril 2019. !Fulap samting i bin hapen long ol las tu yia! Sam long yufala i lusum ol famli. Sam oli lusum wok, wei blong laef, o gud helt. Sam moa oli lusum pis ia, o hop ia long fiuja. Hat blong mi i go long wanwan long yufala we i bin safa long olgeta samting ia, mo sam narawan moa. Mi prea oltaem se Lod bae i kamfotem yufala. Taem yufala i stap letem God i stap win insaed long laef blong yufala, mi save se Hem i gat hop long fiuja blong yu i bitim bifo.
Long medel blong ol lus we yumi bin go tru long olgeta, i gat olgeta samting tu we yumi bin faenem. Sam, oli faenem moa dip fet long Papa long Heven mo Pikinini blong Hem, Jisas Kraes. Plante oli bin faenem wan niu lukluk long laef—iven wan lukluk long taem we i no save finis. Maet yu gat moa strong rilesensip wetem olgeta we yu lavem olgeta, mo wetem Lod. Mi hop se yu gat wan moa paoa blong lisin gud long Hem, mo kasem revelesen we i blong yuwan. Ol had tes, plante taem oli givim ol janis blong groap, we bae i no save kam long eni nara wei.
Tingtingbak long ol las tu yia. ?Yu yu bin groap? ?Wanem nao yu bin lanem? !Maet bae yu wantem gobak long 2019, mo stap long ples ia! Be, sapos yu lukluk long laef blong yu wetem prea, mi biliv se bambae yu luk plante wei we Lod i bin soem rod long yu tru long taem ia we i had, i stap helpem yu blong kam wan man we i givim moa, mo i jenis moa—wan tru man blong God.
Mi save se Lod i gat ol bigfala mo gudfala plan blong yumi—wanwan mo olsem wan grup. Wetem lav mo sore, mo longfala tingting, Hem i talem:
“Yufala i ol smol pikinini, mo yufala i no andastanem yet se ol blesing blong Papa, we hem i … rere long hem from yufala, oli bigwan olsem wanem;
“Mo yufala i no save tekem evri samting naoia; be, yufala i stap glad, from we bambae mi lidim yufala i go.”1
Ol dia brata blong mi. Mi testifae se, i tru, Hem i bin, mo Hem i stap lidim yumi i go, taem yumi stap lukaotem blong lisin gud long Hem. Hem i wantem yumi blong groap mo lanem samting, iven tru—long, mo speseli tru—long wanem i save kam agens.
Samting we i kam agensem yumi, i wan bigfala tija. ?Wanem nao yu bin lanem long ol las tu yia we yu wantem blong tingbaot oltaem? Ol ansa, bae oli spesel long wanwan long yufala, be mi wantem givim fo lesen we mi hop se yumi evriwan i bin lanem mo bae yu neva fogetem.
Lesen 1: Hom I Senta blong Bilif mo Wosip
Plante taem, Lod i givim woning long yumi abaot ol denja blong ol las dei, Hem i givim kaonsel ia: “Yufala i mas stanap long ol tabu ples, mo no mas muv.”2 “Olgeta tabu ples ia,” insaed i gat ol tempol, mo ol mitinghaos. Be, from se yumi no save go mit tugeta long ol ples ia long sam level, yumi bin lanem se, wan long ol ples we i moa tabu long wol ia, hem i hom—yes, iven hom blong yu.
Ol dia brata. !Yufala i holem prishud blong God! “Ol raet blong prishud, oli joen nomo long ol paoa blong heven be oli no save seperet.”3 Yufala mo famli blong yufala i kasem ol tabu prishud odinens ia. Hem i long “insaed long ol odinens blong hem, i gat paoa we i olsem hemia blong God, i kamaot.”4 Paoa ia i stap blong yu mo famli blong yu, insaed long hom blong yufala taem yufala i stap kipim ol kavenan we yufala i bin mekem.5
Jes 185 yia i pas, tedei stret, long 3 Epril 1836, Elaeja i bin putumbak ol ki blong prishud blong letem ol famli blong yumi oli sil tugeta blong oltaem. Hemia nao from wanem hem i gud tumas blong pasem mo blesem sakramen long hom blong yufala. ?Long tingting blong yu, olsem wanem hemia i tajem ol memba blong famli blong yu blong luk yu—we yu papa, bubuman, hasban, boe, o brata blong olgeta—i mekem wok blong tabu odinens ia? ?Wanem nao bae yu mekem blong holemtaet tabu filing ia insaed long famli blong yu?
Maet bae yu filim se i gat yet moa samting blong yu nidim blong mekem blong hom blong yu i rili kam wan tabu ples blong fet. Sapos i olsem, !mekem! Sapos yu mared, toktok wetem waef blong yu olsem ikwol patna blong yu long impoten wok ia. I gat samfala samting blong mekem we oli moa impoten bitim hemia. Bitwin taem naoia mo taem ia we Lod bae i kambak bakegen, yumi evriwan i nid blong mekem ol hom blong yumi oli ol ples blong pis mo sekiuriti.6
Ol fasin mo ol aksen blong yumi we oli stap invaetem Spirit, bambae oli mekem se i gat moa tabu fasin insaed long hom. Semmak, wanem i tru, i we, tabu fasin bae i lis sapos i gat eni samting long fasin o ples blong yu we i mekem Tabu Spirit i harem nogud, from sapos i olsem, “ol heven, oli kamaot long yumi olgetawan nomo.”7
?Yu yu askem yuwan finis se from wanem Masta i wantem yumi mekem hom blong yumi i senta blong lanem gospel mo laef folem gospel? I no nid blong jes mekem yumi rere, mo helpem yumi blong gotru long wan wol sik. Ol stop we oli stap blong yumi kam tugeta wanples, bambae i finis yet. Be, komitmen blong yu blong mekem hom blong yu i fas tabu ples blong fet, i neva mas en. Taem we fet mo tabu fasin oli godaon long wol ia we i stap foldaon, nid blong yu blong gat wan tabu ples bae i kam antap moa. Mi askem strong long yufala blong mekem hom blong yufala i rili kam wan tabu ples, “mo no muv”8 aot long stamba gol ia.
Lesen 2: Yumi Nidim Wanwan long Yumi
God i wantem yumi blong wok tugeta mo helpem wanwan long yumi. From hemia nao, Hem i sendem yumi long wol ia, insaed long ol famli, mo i oganaesem yumi long ol wod mo ol stek. From hemia nao, Hem i askem yumi blong givim seves mo givhan long wanwan long yumi. From hemia nao, Hem i askem yumi blong laef insaed long wol ia, be i no folem fasin blong wol ia.9 Yumi save mekem moa i hapen tugeta, bitim we yumi save mekem yumiwan.10 Plan blong God blong stap hapi, bae i no save hapen sapos ol pikinini blong Hem oli stap olgetawan.
Wol sik ia we i stap hapen, i bin wan kaen ia nomo, from se, hem i tajem evriwan long wol ia long sem taem. I gat sam oli safa moa long ol narawan, be evriwan i bin gat jalenj long sam wei. From hemia, semmak tes ia blong yumi i gat paoa blong help blong mekem ol pikinini blong God oli kam wan, i bitim bifo. So, mi askem: ?tes ia we yumi evriwan i gat, i bin pusum yu i go kolosap moa long ol neba blong yu?—?long ol brata mo sista blong yu we oli stap narasaed rod mo raon long wol?
Long saed ia, tufala bigfala komanmen i save lidim yumi: faswan, blong lavem God, mo sekenwan, blong lavem neba blong yumi.11 Yumi stap soem lav blong yumi taem yumi stap givim seves.
Sapos yu save eniwan we i stap hemwan, go luk hem—!iven sapos yu tu yu filim se yu stap yuwan! Yu no nid blong gat wan risen o wan mesej o wan bisnis blong go luk hem. Jes go talem halo mo soem lav blong yu. Teknoloji i save helpem yu. Wol sik o no, wanwan impoten pikinini blong God i nid blong save se !hem i no stap hemwan!
Lesen 3: Prishud Kworom blong Yu I blong Mekem Moa bitim blong Jes gat Miting
Long taem blong wol sik ia, oli bin kanselem ol kworom miting blong Sandei. Samfala kworom, naoia oli save mit onlaen. Be wok we Lod i bin givim long ol kworom blong prishud, Hem i neva minim blong i stap hapen nomo long wan miting. Ol miting oli wan smol pat nomo blong stamba tingting blong gat kworom mo wanem hem i save mekem.
Ol brata blong mi long Aronik Prishud, mo ol kworom blong ol elda, gat moa bigfala visen abaot risen blong gat ol kworom. ?Olsem wanem nao Lod i wantem yu blong yusum kworom blong yu blong mekem wok ia blong Hem—naoia? Lukaotem revelesen we i kam long Lod. !Putum tingting blong yu i stap daon! !Askem! !Lisin! Sapos oli singaotem yu blong yu lidim man, toktok tugeta olsem wan presidensi, mo wetem ol memba blong kworom. I nomata wanem prishud ofis, o koling blong yu, letem God i win insaed long komitmen blong yu olsem wan memba blong kworom blong yu, mo long seves blong yu. Gat eksperiens ia wetem glad, long stret mo gud fasin ia we bae i hapen taem yu stap “wok wetem strong tingting long wan gud wok.”12 Ol kworom, oli stap long wan posisen we i blong olgeta nomo, blong oli muvum wok blong karem Isrel i kam tugeta i go hariap, hemia long tugeta saed blong vel.
Lesen 4: Yumi Harem Jisas Kraes Moa Gud Taem Yumi Stap Kwaet
Yumi stap laef long wan taem we oli talem tru long profesi longtaem finis i kam, wan taem we “evri samting bambae oli muvmuv olbaot; … hat blong man i nomo strong; from fraet bae i kam long evri pipol.”13 Hemia i bin tru bifo long wol sik ia, mo bambae i tru yet afta. Muvmuv long wol ia, bambae i gohed blong kam antap. Long nara saed, voes blong Lod i no “voes blong wan bigfala nogud noes, … hem i wan kwaet voes we i sofsof stret, olsem se i wan slo toktok, mo i go tru i go kasem sol.”14 Blong save harem kwaet smol voes blong Hem, yu tu, !yu mas stap kwaet!15
Blong wan smol taem, wol sik ia i bin kanselem ol aktiviti we bae oli fulumap laef blong yumi. I no longtaem, bae yumi save jusum blong fulumap taem ia bakegen wetem noes mo muvmuv blong wol. O, bae yumi jes save yusum taem blong yumi blong lisingud long voes blong Lod we i stap wispa tingting blong Hem, i givim kamfot mo pis. Kwaet taem i wan tabu taem—wan taem we i mekem se yu save kasem revelesen we i blong yuwan, mo i putum pis i kam.
Disiplinim yuwan blong gat taem yuwan, mo wetem olgeta we yu lavem. Openem hat blong yu long God long prea. Tekem taem blong draonem yu long ol skripja, mo wosip long tempol.
Ol dia brata blong mi. I gat plante samting we Lod i wantem yumi blong lanem aot long ol eksperiens blong yumi long taem blong wol sik ia. Mi putum fo nomo long lis ia. Mi stap invaetem yufala blong mekem lis blong yufalawan, tingting gud long hem, mo serem wetem olgeta we yu lavem.
Fiuja i save saen long ol pipol blong God we oli stap kipim kavenan.16 Lod bambae i singaot moa long ol wokman blong Hem we oli stap klin inaf, we oli holem prishud, blong oli blesem, givim kamfot, mo mekem ol man oli kam strong moa, mo blong help blong mekem wol ia mo ol pipol blong hem oli rere from Seken Kaming blong Hem. I stap long wanwan long yumi blong kasem mak ia blong tabu odinesen we yumi bin kasem. !Yumi save mekem ! Mi testifae olsem, mo talemaot lav blong mi long wanwan long yufala, ol brata we mi lavem, long tabu nem blong Jisas Kraes, amen.