Ol Magasin Oli Stret Folem Wol Nid

Oli mekem ol niu buk, we oli ol trifala wol pablikesen, we oli stat long Jenuware 2021; ol magasin ia, oli stap putumaot ol mesej we oli kam long ol lida blong Jos we oli stret wetem taem naoia, folem toktok blong Elda Quentin L. Cook blong Kworom blong Olgeta Twelef Aposol. Ol niu magasin ia, we wan i blong ol pikinini, wan blong ol yut mo wan blong ol adalt, “oli gat wan paoa long saed blong spirit mo doktrin,” hem i talem. Ol topik oli sapotem Kam Folem Mi kurikulom mo ol nara impoten mata.

“Ol magasin blong Jos oli wan impoten risos blong stap lanem abaot gospel blong Jisas Kraes mo stap filim se yu yu wan ples insaed long Jos ia blong Hem,” Fas Presidensi i talem long wan leta we i anaonsem ol niufala magasin ia. “Tingting blong hat blong mifala i we, evri memba long evri ples bae oli sabskraeb mo welkamem paoa ia blong holemtaet fet, long ol hat mo hom blong olgeta.”

Ol magasin ia, Liahona, blong ol adalt; Blong Ol Yut Oli Kam Strong, blong ol yangfala; mo Fren, blong ol pikinini, naoia, i mekem se i posibol blong:

Ol famli raon long 150 kantri oli gat janis ia blong pem plan blong kasem magasin speseli blong ol pikinini mo ol yut.
Ol magasin oli stap plante moa taem long wan yia long samfala eria mo lanwis.
Ol memba we oli kasem ol semmak mesej we i mekem oli kam wan, tru long ol wol magasin ia.
Ol atikol blong ol magasin ia oli kam moa plante long dijitol mo buk.

Oli leftemap tingting blong ol lokol lida blong givim, long ol niu konvet, wan plan blong wan yia long magasin ia we i stret long yia blong olgeta, mo tu, blong givim ol yia plan blong Fren o Blong Ol Yut Oli Kam Strong long ol pikinini mo ol yut we oli kam long jos, we i no gat papa mo mama blong olgeta.¹