?Wanem Nao Sevya I Bin Mekem blong Yumi?
Jisas Kraes i bin mekem evri samting we i nid blong wokbaot blong yumi tru long laef ia i go long fiuja ples olsem i stap long plan blong Papa blong yumi long Heven.
Long wan Satedei naet miting, long wan stek konfrens plante yia i pas, mi mitim wan woman se i talem se ol fren blong hem oli bin askem hem blong kambak long jos afta plante yia we hem i no stap kam, be hem i no save tingting long wan risen blong kambak. Blong leftemap tingting blong hem mi talem: “Be sapos yu tingting long evri samting we Sevya i bin mekem blong yu, yu gat plante risen blong kambak blong wosip mo givim seves long Hem.” Mi sek taem hem i ansa: “?Be Hem i mekem wanem blong mi?”
?Wanem nao Jisas Kraes i bin mekem blong wanwan long yumi? Hem i bin mekem evri samting we i nid blong wokbaot blong yumi tru long laef ia i go long fiuja ples olsem i stap long plan blong Papa blong yumi long Heven. Bae mi tokbaot fofala stamba pat blong plan ia. Long wanwan pat ia, Wan Stret Pikinini Ia blong Hem, Jisas Kraes, hem i stamba man. Wanem i stap biaen long evri samting ia, hem i : “lav blong God, we i seraotem hemwan i go long evri ples long hat blong ol pikinini blong ol man; taswe, hem i samting we evri man i wantem moa i bitim evri narafala samting” (1 Nifae 11:22
1.
Jes bifo Ista Sandei, i stret taem blong tokbaot fastaem Laef Bakegen long Ded blong Jisas Kraes. Laef Bakegen long Ded i stamba pos ia blong bilif blong yumi, we i mekem tingting i kwaet. Hem i ademap mining long doktrin blong yumi, i pusum yumi blong muv, mo gat hop long fiuja.
From se yumi stap bilivim ol stori long tugeta ia, Baebol mo Buk blong Momon, long saed blong Laef Bakegen long Ded blong Jisas Kraes, yumi stap bilivim tu samfala skripja tijing se wan semfala laef bakegen long ded, bae i kam long evriwan we i bin stap laef long wol ia.1 Olsem we Jisas i bin tijim: “From we mi bambae mi laef, yufala tu bambae i save laef” (Jon 14:19). Mo Aposol blong Hem i bin tijim se “ol dedman oli laef bakegen, we bambae oli no moa save ded bakegen samtaem,” mo “bodi ya we i save ded, bambae i mas jenis blong kam we i no moa save ded samtaem”(1 Korin 15:52, 54).
Be Laef Bakegen long Ded i givim moa bitim wan kwaet save se bodi bae i nomo save ded. Hem i jenisim wei we yumi luk laef long wol ia.
Laef Bakegen long Ded i givim yumi lukluk ia mo paoa blong stap strong tru long ol jalenj blong laef ia yumi wanwan mo olgeta we yumi lavem oli fesem. Hem i givim yumi wan niu wei blong lukluk ol samting olsem bodi, tingting mo filing we i go daon, sam yumi kasem taem yumi bon i kam, mo sam taem yumi go tru long olgeta long taem blong laef blong yumi long wol ia. Hem i givim yumi paoa blong gotru long ol harem nogud, ol taem yumi mestem rod, mo filing i harem kros smol. From se wanwan long yumi i kasem kwaet save ia se bae yumi laef bakegen long ded, yumi save se ol samting ia we yumi no strong long olgeta long wol ia, oli blong sot taem.
Laef Bakegen long Ded i givim tu wan strong tingting blong stap obei long ol komanmen blong God long taem blong laef blong yumi long wol ia. Taem yumi girap long ded mo gohed from las jajmen blong yumi, bae yumi wantem se yumi kwalifae from ol bes blesing we oli promesem long olgeta we oli laef bakegen long ded.2
Antap long hemia, promes ia se Laef Bakegen long Ded i save tekem janis ia blong stap wetem ol memba blong famli blong yumi—hasban, waef, pikinini mo papa mo mama, mo famli laen afta—i wan paoa long tingting blong mekem ol famli responsabiliti long wol ia. Mo tu, i helpem yumi blong laef tugeta wetem lav, long laef ia, mo i givim kamfot long taem blong ded blong olgeta we yumi lavem. Yumi save se yumi seperet blong wan sot taem, mo yumi luk fored blong stap glad blong stap tugeta bakegen. Laef Bakegen long Ded i givim hop mo paoa long yumi blong save wet longtaem, taem yumi stap wet. Mo tu, i mekem yumi rere wetem strong paoa long tingting mo gud fes blong fesem ded blong yumiwan—iven wan ded we yumi save singaotem se i kwik tumas.
Evri samting ia we Laef Bakegen long Ded i tekem i kam, oli pat blong fas ansa long kwestin ia: “?Wanem nao Jisas Kraes i mekem blong mi?”
II.
Long plante long yumi, janis blong kasem fogivnes from ol sin blong yumi, i stamba mining blong Atonmen blong Jisas Kraes. Long wosip, yumi singsing wetem respek:
Hem i pas tru long doa blong ded.
Hem i sing salvesen long man.
Hem i singaotem ol man long sin
Blong joenem hem long heven.3
Sevya mo Ridima blong yumi i bin go tru wan safaring we man i no save andastanem blong mekem se, Hemwan, Hem i stap olsem wan sakrifaes from ol sin blong evriwan we i wantem sakem sin. Sakrifaes ia i givim wan las gud samting—Smol Sipsip ia we i klin gud mo i no gat mak, from ol rabis fasin blong devel, ol sin blong ful wol. I openem doa long wanwan long yumi blong kam klin aot long ol sin blong yumiwan, blong mekem se oli save letem yumi stap bakegen long ples we God, Papa blong yumi We I No Save Finis i stap long hem. Open doa ia i stap blong evriwan long ol pikinini blong God. Long wosip yumi singsing:
Mi sapraes we Jisas i bin kam daon long heven
Blong sevem wan man olsem mi we mi fulap sin,
Jisas i givim bigfala lav blong hem long mi.4
Bigfala samting we man i no save andastanem we Atonmen blong Jisas Kraes i mekem long man, i stanap long lav ia we God i gat wanwan long yumi. I talem se toktok blong Hem i tru, we i talem se “praes blong ol sol”—we i evriwan we i kam long wol ia—”i bigwan tumas long ae blong God” (Doktrin mo Ol Kavenan 18:10). Long Baebol, Jisas Kraes i bin eksplenem hemia long saed blong lav blong Papa long Heven: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis” (Jon 3:16). Long revelesen blong tedei, Ridima blong yumi, Jisas Kraes, i bin talem se Hem i lavem wol ia tumas mekem se hem i givim laef blong hemwan bakegen, blong mekem se hamas bae oli bilif bae oli kam ol pikinini blong God” (Doktrin mo Ol Kavenan 34:3).
Hem i no wan sapraes, we, Buk blong Momon, “wan nara Testeman blong Kraes,” i en wetem tijing ia se, blong kam “stret evriwan” mo blong “kam tabu long Kraes” yumi mas “lavem God wetem ful paoa blong tingting, ful maen mo ful paoa blong [yumi]” (Moronae 10:32–33Moronae 10:32–33). Plan blong Hem, we lav i stap biaen long hem, oli mas akseptem wetem lav.
III.
?Wanem moa Sevya, Jisas Kraes, i bin mekem blong yumi? Tru long ol tijing blong ol profet blong Hem, mo tru long seves blong Hem, Jisas i bin tijim yumi long saed blong plan blong fasin blong sevem man. Plan ia, insaed i gat Kriesen, stamba tingting blong laef, nid blong gat samting i agens, mo presen ia we i fasin blong mekem joes. Mo tu, Hem i tijim yumi ol komanmen mo ol kavenan we yumi mas obei long olgeta, mo ol odinens we yumi mas gat eksperiens long olgeta blong tekem yumi i gobak long papa mo mama long heven.
Long Baebol, yumi ridim tijing ia blong Hem: “Mi nao, mi olsem laet blong ol man long wol. Man , we i biaen long mi, bambae hem i no save wokbaot long tudak. Hem bambae i gat laet blong laef.” (Jon 8:12). Mo long revelesen blong tedei, yumi ridim: “Luk, mi mi Jisas Kraes, … mi wan laet , we tudak i no save haedem” (Doktrin mo Ol Kavenan 14:9). Sapos yumi stap folem ol tijing blong Hem, Hem i stap givim laet long rod blong yumi long laef ia, mo i meksua se yumi gat wan fiuja long nekis laef.
From se Hem i lavem yumi, Hem i stap givim jalenj long yumi blong lukluk nomo long Hem, be i no long ol samting blong laef long wol ia nomo. Long bigfala toktok blong Hem long saed blong bred blong laef, Jisas i bin tijim se yumi no sapos blong stap wetem olgeta we ol samting blong wol ia i stap pulum ae blong olgeta—ol samting we oli sapotem laef long wol ia, be oli no fidim yumi blong kasem laef we i no save finis.5 Taem we Jisas i stap invaetem yumi, bakegen mo bakegen mo bakegen: “Folem mi.”6
IV.
Laswan, Buk blong Momon i stap tijim se, olsem pat blong Atonmen blong Hem, Jisas Kraes “i harem nogud long ol soa blong bodi mo fulap hadtaem mo temtesen blong evri kaen; mo samting ia bae i mekem profesi i hapen we i talem se, boe ia bae i tekem long hem ol soa blong bodi mo ol sik blong ol pipol blong hem” (Alma 7:11).
?From wanem Sevya blong yumi i safa long ol “evri kaen” jalenj ia long wol? “Mo bae hem i tekem long hem ol samting blong olgeta we oli no strong, blong mekem se insaed blong hem i save kam fulap long sore, long saed blong bodi blong mit mo bun, mekem se hem i save, long saed blong bodi blong mit mo bun, olsem wanem blong helpem ol man blong hem long saed blong ol samting blong olgeta we oli no strong long olgeta” (Alma 7:12).
Sevya blong yumi i filim mo i save ol temtesen blong yumi, ol hadtaem blong yumi, ol soa blong hat blong yumi, mo ol safaring blong yumi, from we Hem i bin glad blong gotru long olgeta evriwan olsem pat blong Atonmen blong Hem. Ol nara skripja oli talem hemia i tru. Niu Testeman i talem: “i harem nogud finis mo ol samting ya oli traem hem finis hem i save helpem olgeta we oli stap kasem ol temtesen” (Hibrus 2:18). Aesea i tijim tu: “!Yufala i no fraet; Mi mi stap wetem yufala. Mi mi… mi bambae mi mekem yufala i strong, Mi bambae mi givhan long yufala!” (Aesea 41:10). Evriwan we i safa eni kaen hadtaem long laef ia i mas tingbaot se Sevya blong yumi i gotru long kaen soa ia tu, mo we, tru long Atonmen blong Hem, Hem i givim wanwan long yumi paoa blong tekem ol samting ia.
Profet Josef Smit i talemsot evri samting ia long nambatri toktok blong bilif blong yumi: “Mifala i biliv we tru long Atonmen blong Kraes, bae evri man oli save stap sef, taem oli stap obei long ol loa mo olgeta odinens blong Gospel.”
“?Wanem nao Jisas Kraes i bin mekem blong mi?” Sista ia i bin askem. Anda long plan blong Papa blong yumi long Heven, Hem “i bin krietem ol heven mo wol” (Doktrin mo Ol Kavenan 14:9) blong mekem se wanwan long yumi i save gat wan eksperiens long laef, we i nid, blong lukaotem fiuja ples blong yumi. Olsem pat blong plan blong Papa, Laef Bakegen long Ded blong Jisas Kraes i bin winim ded, blong meksua se wanwan long yumi bambae i nomo save ded samtaem. Sakrifaes blong Jisas Kraes, we i pem praes, i givim long yumi wanwan, wan janis blong sakem ol sing blong yumi, mo stap klin mo gobak long hom blong yumi long Heven. Ol komanmen mo ol kavenan blong Hem oli soem rod long yumi, mo prishud blong Hem i givim atoriti blong mekem ol odinens we i nid blong kasem fiuja ples ia. Mo Sevya blong yumi, i glad blong gotru long evri sobodi mo trabol blong laef ia blong mekem se Hem i save hao blong helpem o mekem yumi kam strong moa long taem blong ol hadtaem blong yumi.
Jisas Kraes i bin mekem evri samting ia from se Hem i lavem evriwan long ol pikinini blong God. Lav i biaen long evri samting ia, mo i bin olsem long stat finis. God i bin talem long yumi, tru long revelesen blong tedei, se “hem i bin mekem … man mo woman, folem pikja blong hem … mo hem i givim ol komanmen long olgeta se bae oli mas lavem hem mo wok blong hem (Doktrin mo Ol Kavenan 20:18–19).
Mi testifae abaot evri samting ia mo prea se bae yumi evriwan i tingbaot wanem we Sevya blong yumi i bin mekem blong wanwan long yumi, mo bambae yumi evriwan i lavem mo wok blong Hem, long nem blong Jisas Kraes, amen.