Stap Resis I Go Stret long Mak
I no abaot hamas samting yumi stap go tru long hem long laef ia, be blong kam wanem kaen man.
Taem mi stap ridim buk blong Ol Wok mo ol leta blong Pol, mi sapraes long olsem wanem Pol i muv wetem lav mo fasin blong talem tangkyu, taem hem i stap givim seves, stap tij mo stap testifae abaot Jisas Kraes. ?Olsem wanem nao wan man olsem i save givim seves, wetem lav mo fasin blong talem tangkyu, speseli sapos yumi tingting long ol bigfala hadtaem blong hem? ?Wanem i pusum Pol blong givim seves? “I olsem we mi stap resis i go stret long mak, we i gat praes blong man we i win … we God i singaot yumi blong yumi joen long Jisas Kraes.”1
Blong resis i go stret long mak, i blong gohed blong stap fetful long “long rod we i stret mo i no isi we i lid i go long laef we i no save finis”2 wetem Sevya mo Papa blong yumi we i stap long Heven. Pol i tokbaot ol hadtaem blong hem olsem “taem we yumi stap tingbaot gudfala laef ya blong heven, … ol samting ya we … oli stap mekem yumi harem nogud tumas, oli olsem nating nomo.”3 Leta we Pol i raetem i go long Ol Man Filipae, long taem we oli sarem hem long kalabus, i wan leta blong glad mo harem gud we i bigwan tumas, mo i blong leftemap tingting blong yumi evriwan, speseli long taem naoia we tingting i fasfas. Yumi evriwan i nidim blong karem strong paoa long tingting blong Pol: “Mi luk olgeta samting blong laef blong mi bifo … nao mi lego olgeta blong mi … save Jisas Kraes, Masta blong mi. … mi sakemaot olgeta samting ya blong laef blong mi bifo. Mi luk olgeta olsem rabis nomo, blong mi save kasem Kraes.”4
Taem yumi lukluk long seves blong Pol, yumi kasem insperesen mo kam antap long ol “fasin we Pol i gat”, long dei blong yumi, mo we hem i givim seves tu, tij mo testifae wetem lav mo fasin blong talem tangkyu long medel blong ol jalenj we oli fesem long laef blong olgeta, mo long laef blong olgeta we oli lavem. Wan eksperiens we mi bin go tru long hem naen yia i pas, i bin helpem mi blong luksave se i impoten blong stap resis i go stret long mak.
Long 2012, taem mi stap wokbaot, olsem fastaem blong mi, i go long jeneral konfrens lidasip miting, mi no stop blong filim wan strong filing we i talem se mi no inaf blong mekem wok ia. Long maen blong mi i gat wan voes we i gohed blong stap ripitim toktok ia, “!Yu no blong ples ia! !Wan series mistek i bin hapen!” Taem mi stap wokbaot mo traem blong faenem wan ples blong sidaon, Elda Jeffrey R. Holland i luksave mi. Hem i kam long mi mo talem se: “Edward, i gud blong luk yu long ples ia,” mo hem i tajem slo fes blong mi. !Mi filim olsem wan bebi! Lav mo han blong hem i mekem mi filim welkam mo helpem mi blong filim spirit blong kam pat blong olgeta, mo gat spirit blong wok olsem ol brata. Long dei afta, mi wajem Elda Holland i stap mekem semmak samting we hem i bin mekem long mi long dei bifo, !i tajem slo fes mo welkamem Elda Dallin H. Oaks, we hem i senia blong hem!
Stret long taem ia, mi filim lav blong Lod tru long ol man ia we yumi sastenem olgeta olsem ol sia mo ol reveleta. Elda Holland, tru long kaen fasin mo ol nomol aksen blong evri dei, i helpem mi blong winim ol selfis tingting blong miwan mo ol filing blong tingting se mi no inaf. Hem i helpem mi blong lukluk nomo long tabu wok ia we i givim bigfala glad we oli bin singaotem mi long hem—blong karem ol sol i kam long Kraes. Hem, olsem Pol long taem blong bifo, i poenem mi blong stap resis i go stret long mak.
Wanem i gud tumas, i we, Pol i stap askem strong long yumi blong wokbaot i go wetem strong bilif, mo i stap singaotem yumi tu blong fogetem wanem we i stap biaen—ol fraet blong yumi we i bifo, wanem we tingting blong yumi stap nomo long hem we i blong bifo, ol mistek blong yumi we blong bifo, harem nogud blong yumi blong bifo. Hem i stap invaetem yumi, semmak olsem dia profet blong yumi, Presiden Russell M. Nelson: “Bae yumi stat yusum wan niu mo moa tabu wei.”5 Sevya i talem: “Man we i wantem sevem laef blong hem, hem bambae i lusum laef blong hem, be man we i lusum laef blong hem from mi, hem bambae i kasem laef blong hem.”6
Long fas toktok blong mi long jeneral konfrens, mi serem eksperiens blong mama blong mi we i stap tijim mi blong wok long garen. “Neva lukluk i gobak,” Mama i talem. “!Lukluk fored long wanem we yumi nid blong mekem yet!”7
Taem i stap go kolosap long en blong laef blong hem, mama i stap faet wetem kansa, hem i bin stap wetem Naume mo mi. Wan naet mi harem hem i stap kraekrae long rum blong hem. Soa blong bodi i kam tumas, iven hem i tekem las meresin blong hem blong dei ia we i mofin, tu aoa i pas.
Mi go insaed long rum blong hem mo krae wetem hem. Mi prea laod blong sobodi i kamaot mo blong i harem gud. Mo afta, hem i mekem semmak samting we hem i bin mekem long garen, long sam yia i pas: hem i stop mo tijim mi wan lesen. Bae mi neva fogetem fes blong hem long taem ia: i wik, harem nogud mo fulap long sobodi, i luk stret long mi wetem fes we i sore bigwan long boe blong hem. Hem i smael tru long ol wota blong ae blong hem, i luk stret long ae blong mi mo talem: “I no yu o eniwan, be i stap long God nomo blong i talem, sapos se soa ia bae i finis o no.”
Mi sidaon kwaet. Hem tu, i sidaon kwaet nomo. Memori ia i klia mo stap oltaem long maen blong mi. Long naet ia, tru long mama blong mi, Lod i bin tijim mi wan lesen we bae i stap wetem mi blong oltaem. Taem mama blong mi i serem filing blong hem blong akseptem tingting blong God, mi tingbaot risen ia se, Jisas Kraes i harem nogud bigwan long garen blong Getsemane mo long kros, long Golgota. Hem i talem: “Luk, mi bin givim long yufala gospel blong mi, mo hem i gospel we mi bin givim long yufala—se mi bin kam long wol blong mekem wanem we Papa blong mi i wantem, from Papa blong mi i bin sendem mi.”8
Taem mi stap tingting long dia profet blong yumi Presiden Nelson, kwestin blong hem long yumi long las jeneral konfrens. Presiden Nelson i bin askem: “?Yu yu wantem letem God i stap win insaed long laef blong yu? ?Yu yu wantem letem God i paoa ia we i moa strong insaed long laef blong yu? … ?Bae yu yu letem voes blong Hem i kam faswan … long evri nara bigfala tingting we yu yu gat? ?Yu yu wantem se tingting blong yu i draon insaed long tingting blong Hem?”9 Mama blong mi i save ansa wetem krae, be wetem wan strong “yes,” mo ol narafala fetful memba blong Jos raon long wol oli save ansa wetem krae tu, be wetem wan strong “yes.” Presiden Nelson, tangkyu blong givim insperesen mo blong leftemap tingting blong mifala wetem ol kwestin blong wan profet.
I no longtaem i pas, mi bin gat wan storian long Pretoria, Saot Afrika, wetem wan bisop we i berem waef mo adalt gel blong hem, long semmak dei. Tufala i lusum laef blong tufala from koronavaeres, wol sik ia. Mi askem hem sapos hem i oraet. Ansa blong bisop Teddy Thabete i givim paoa long desisen blong mi blong folem ol toktok mo kaonsel blong ol profet, ol sia, mo ol reveleta blong Lod. Ansa blong bisop Thabete, i we, i gat hop kamfot i stap oltaem mo blong save se Sevya i bin tekem long Hemwan ol soa bodi blong ol pipol, mo we Hem i save olsem wanem blong helpem yumi.10 Wetem fet we i dip, hem i testifae: “Mi mi glad bigwan from plan ia blong sevem man o plan blong hapines.” Afta hem i askem wan kwestin long mi: “?I no hemia nao we profet blong yumi i stap traem blong tijim yumi long las konfrens ia?”
From we ol jalenj blong laef ia bae i kam long yumi evriwan long ol defdefren wei, letem yumi lukluk nomo long gol blong yumi blong “stap resis i go stret long mak,” we i “praes blong man we i win mo praes ya, hemia we God i singaot yumi.”11
Wetem tingting i stap daon, mi stap invaetem yumi evriwan blong !neva givap! Oli singaotem yumi blong “yumi mas lego ol samting we oli stap blokem yumi, mo ol sin we oli stap holemtaet yumi, nao yumi mas mekem tingting blong yumi i strong, blong yumi resis long rod ya we i stap long fes blong yumi mo … luk long Jisas we hem nomo i stamba blong bilif blong yumi, i stat long stat blong hem gogo i kasem en blong hem.”12
I no abaot hamas samting yumi stap go tru long hem long laef ia, be blong kam wanem kaen man. I gat glad taem yumi stap resis i go stret long mak. Mi testifae se Hem we i winim evri samting, bae i helpem yumi blong lukluk i go antap long Hem. Long nem blong Jisas Kraes, amen.