Bae Yu Fri
Jisas Kraes i laet ia we yumi mas leftemap iven long ol taem blong laef blong yumi we i tudak long laef blong yumi long wol ia.
Ol brata mo sista blong mi we mi lavem tumas. Mi talem tangkyu from spesel janis ia blong stap long Afrika mo blong save givim toktok long yufala. Hem i wan blesing blong gat teknoloji tedei mo blong yusum long ol wei we i gat fulap yus blong kasem yufala long weaples yufala i stap long hem.
Taem Sista Mutombo mo mi i stap givim seves olsem ol lida blong Merilan Baltimoa Misin long Septemba 2019, mitufala i bin gat spesel janis ia blong visitim sam long ol histri ples blong Jos long Palmaera, Niu Yok, taem mitufala i bin go long wan lidasip semina. En blong visit blong mitufala i bin long Tabu Bus. Mitufala i no bin gat tingting ia blong kasem wan eksperiens we i kam long heven o wan visen taem mitufala i visitim Tabu Bus ia, be mitufala i filim we God i stap long tabu ples ia. Hat blong mitufala i fulap long tangkyu from Profet Josef Smit.
Long rod blong mifala i kambak, Sista Mutombo i luk se mi gat wan bigfala smael mekem se hem i askem, “?Yu stap glad from wanem?”
Mi ansa, “Dia Nathalie blong mi, oltaem bae trutok i win ova long mistek, mo tudak bae i no gohed long wol from gospel ia blong Jisas Kraes we i kambak long wol.”
God we i Papa mo Jisas Kraes, Tufala i bin visitim yangfala Josef Smit blong mekem samting we i haed i kam long laet, mekem se yumi save kasem “save long ol samting olsem we oli stap, … olsem we oli bin stap, mo olsem we bambae oli kam blong stap” (Doktrin mo Ol Kavenan 93:24).
Afta long kolosap 200 yia, fulap man i gohed yet blong lukaotem ol trutok we oli nidim blong save fri aot long sam kastom mo ol giaman we enemi i stap spredem truaot long wol. Fulap oli “blaen from ol waes giaman wok blong ol man” (Doktrin mo Ol Kavenan 123:12). Long leta blong hem i go long ol pipol blong Efesas, Pol i tijim, “Yu we yu stap slip, yu wekap, yu girap long ded, yu laef. Nao Kraes bambae i givim laet long yu” (Efesas 5:14). Sevya i bin promesem se bambae Hem i stap olsem laet long olgeta evriwan we oli harem ol toktok blong Hem (luk long 2 Nifae 10:14).
Long tetifaef yia i pas, papa mo mama blong mi tu, oli bin blaen mo wantem tumas blong faenemaot trutok mo tufala i wari abaot weaples nao bae tufala i go blong faenem trutok. Papa mo mama blong mi oli bon long vilej long ples we kastom i strong insaed long laef blong wanwan man, woman mo famli. Tufala tugeta i lego vilej blong tufala taem tufala i yang mo kam long siti blong faenem wan laef we i moa gud.
Tufala i mared mo statem famli blong tufala long wan simpol wei nomo. Mifala kolosap eit man insaed long wan smol haos—papa, mama, tufala sista blong mi mo mi, mo wan kasen we i bin stap stap wetem mifala. Mi bin stap tingting long miwan sapos i tru se mifala i rili bin wan famli from oli no letem mifala blong kakae long semmak tebol wetem papa mo mama blong mifala. Taem papa blong mifala i kambak long wok, long semmak taem we hem i kam insaed long haos, bae mifala i mas aot mo go aotsaed. Mifala i stap silip smol taem nomo long naet from mifala i no save silip from fasin blong stap wan mo tru lav i no gat insaed long mared blong papa mo mama blong mifala. Saes blong hom blong mifala i no smol nomo, be hem i wan ples we i tudak tu. Bifo mifala i bin mitim ol misinari, mifala i bin stap go long ol defdefren jos evri Sandei. I klia se papa mo mama blong mifala tufala i stap lukaotem wan samting we wol i no save givim long olgeta.
Hemia i bin gohed olsem kasem taem mifala i mitim Elda mo Sista Hutchings, ol fas senia misinari kapol we oli bin singaotem olgeta blong givim seves long Sahir (we oli save tedei olsem DR blong Kongo o Kongo-Kinsasa). Taem mifala i stat blong stap luk ol gudfala misinari ia we oli olsem ol enjel we oli kam long God, mi luksave se wan samting i stat blong jenis long famli blong mifala. Afta long baptaes blong mifala, fasin blong laef blong mifala i stat blong jenis sloslo from gospel ia we i kambak long wol. Ol toktok blong Kraes i stat blong leftemap sol blong mifala. Oli stat blong givim moa laet long save blong mifala mo i kam swit long mifala from we mifala i bin save luksave ol trutok ia we mifala i kasem mo luk laet ia, mo laet ia i stap kam moa braet evri dei.
Andastaning ia long stamba tingting blong gospel ia i stap helpem mifala blong kam moa olsem Sevya. Saes blong hom blong mifala i no jenis; sosol situesen blong mifala i no jenis tu. Be mi bin witnesem wan jenis blong hat insaed long papa mo mama blong mifala, taem mifala i prea evri dei, moning mo naet. Mifala i stadi long Buk blong Momon; mifala i mekem famli haos naet; mifala i bin kam wan famli tru. Evri Sandei mifala i wekap long 6 klok moning blong rere blong go long jos, mo bae mifala i travel blong fulap aoa blong go long ol miting blong Jos evri wik mo no komplen. Hem i bin wan naesfala eksperiens tumas blong witnesem. Mifala, we long pas mifala i bin wokbaot long tudak, mifala i ronemaot tudak ia long medel blong mifala (luk long Doktrin mo Ol Kavenan 50:25) mo luk “bigfala laet” (2 Nifae 19:2).
Mi tingbaot wan dei, taem mi no bin wantem blong wekap long eli moning blong mekem famli prea, mi komplen long ol sista blong mi se: “I tru se i nomo gat wan nara samting blong yumi mekem long haos ia be prea, prea, prea nomo.” Papa blong mi i bin harem toktok blong mi. Mi tingbaot wei we hem i ansa long mi taem hem i tijim mi wetem lav mo talem strong se: “Nomata hamas taem we bae yu stap insaed long haos ia, bae yu prea, prea, prea.”
Ol toktok blong papa blong mi i ring long sora blong mi evri dei. ?Yu ting se Sista Mutombo mo mi i mekem wanem wetem ol pikinini blong mitufala tedei? Mitufala i prea, prea, mo prea. Hemia i laef stori blong mifala.
Man ia we i blaen taem i bon i bin kasem hiling long Jisas Kraes, mo afta we ol neba blong hem mo Ol Farisi oli stap kwestinim hem, hem i talem:
“Man ia we nem blong hem Jisas, hem i tekem sofmad i putum long ae blong mi, nao i talem long mi se: Yu go long Saeloam, yu wasem ae blong yu. Ale mi go, nao taem mi wasem ae blong mi, mi save luk olgeta samting. …
“… Wan samting nomo we mi mi save, fastaem mi mi blaen, be naoia mi save lukluk” (Jon 9:11, 25).
Mifala tu, mifala i bin blaen be naoia mifala i save lukluk. Gospel we i kambak long wol i bin gat paoa long famli blong mifala stat long taem ia. Andastaning ia long stamba tingting blong gospel ia i bin blesem tri jeneresen blong famli blong mi mo bae i gohed blong blesem plante moa jeneresen we bae i kam.
Jisas Kraes i laet ia we i stap saen long tudak. Olgeta we oli folem Jisas “bambae [oli] no save wokbaot long tudak. Bambae [oli] gat laet blong laef” (Jon 8:12).
Blong kolosap wan yia bitwin 2016 mo 2017, ol pipol long eria blong Kasahi oli bin go tru long wan taem blong trabol. Hem i bin wan taem blong tudak blong ol pipol ia from wan raorao bitwin wan grup blong ol soldia long vilej mo ol soldia blong gavman. Vaelens i stat long ol taon blong Kasahi Sentrol provins go kasem ol bigfala eria blong Kasahi. Plante pipol oli ronwe long ol hom blong olgeta blong stap sef mo haed long bus. Oli no bin gat kaekae o wota, o eni samting nomo, mo long medel blong ol pipol ia i bin gat sam memba blong Jos Ia blong Jisas Kraes blong Ol Lata-dei Sent long Kananga eria. Ol soldia oli kilim sam long ol memba blong Jos.
Brata Honoré Mulumba blong Ngansa Wod long Kananga mo famli blong hem i bin sam long ol smol pipol ia we oli stap mo haed nomo long haos blong olgeta, from oli no save weaples blong go oli stap sut long masket long evri strit blong olgeta. Wan dei, sam neba we oli ol soldia oli faenem se Brata Mulumba mo famli blong hem oli stap haed long haos blong olgeta taem oli bin traem blong kam aotsaed blong faenem sam vejetebol long famli garen blong olgeta blong kakae. Wan grup blong ol soldia oli kam long haos blong olgeta mo pulumaot olgeta i kam aotsaed mo talem long olgeta blong jus blong folem ol kastom blong olgeta olsem ol soldia, sapos no, bae oli kilimded olgeta.
Wetem strong tingting, brata Mulumba i talem long olgeta se: “Mi mi wan memba blong Jos Ia blong Jisas Kraes blong Ol Lata-dei Sent. Famli blong mi mo mi i bin akseptem Jisas Kraes mo gat fet long Hem. Bae mifala i gohed blong stap fetful long ol kavenan blong mifala mo bae mifala i akseptem blong ded.”
Oli talem long olgeta se: “From se yu bin jusum Jisas Kraes, bae ol dog bae oli kakae ol bodi blong yufala,” mo oli promes se bae oli kambak. Be oli neva kambak, mo famli ia i stap longwe blong tu manis, mo oli neva luk olgeta bakegen. Brata Mulumba mo famli blong hem oli gohed blong mekem se faea blong fet blong olgeta i laet i stap. Oli bin tingbaot ol kavenan blong olgeta mo oli kasem proteksen.
Jisas Kraes i laet ia we yumi mas leftemap iven long ol taem blong laef blong yumi we i tudak long laef blong yumi long wol ia (luk long 3 Nifae 18:24). Taem yumi jusum blong folem Kraes, yumi jusum blong jenis. Wan man o woman we i jenis from Kraes, bae Kraes i kapten blong hem, mo bae yumi askem olsem we Pol i askem: “[?Lod, wanem nao yu wantem blong mi mekem?” (Ol Wok 9:6). Bae yumi “biaen long Hem” (1 Pita 2:21). Bae yumi “[laef olsem we Hem i bin laef]” (1 Jon 2:6). (Luk long Ezra Taft Benson, “Born of God,” Tambuli, Oct. 1989, 2, 6.)
Mi testifae abaot Hem we i bin ded, we oli bin berem Hem, mo Hem i bin girap bakegen long nambatri dei, mo i go antap long heven, mekem se yu mo mi i save kasem ol blesing blong laef we i no save finis mo kam olsem wan god. Hem i “laet, … laef, mo trutok” (Ita 4:12). Hem i laet mo meresin blong konfius ia we i stap long wol. Hem i stret eksampol long olsem wanem yumi save kam olsem wan god, we i Jisas Kraes. Long nem blong Jisas Kraes, amen.