2021
Yumaniterian Wok I Karem Help I Kam
Mei 2021

Yumaniterian Wok I Karem Help I Kam

Jos i stap gohed blong mekem moa wok blong helpem olgeta we oli stap long nid raon long wol, mo blong givim yumaniterian help long taem blong trabol.

Long yumaniterian help we i moa bigwan long histri blong Jos, Latter-day Saint Charities (we i yumaniterian han blong Jos) i bin helpem plante pipol long taem blong KOVID 19 wol sik ia, i givim mane mo ol samting blong help blong stopem sik ia mo blong help blong tritim olgeta we oli sik. Wok ia i bin givim tu ol samting mo trening long ol helt kea profesonol, we insaed, i gat tu wei blong givim sapot long saed blong bodi, tingting mo filing.

Ol faktri blong Jos blong mekem ol tin mo putum kaekae long tin o paket, oli jenisim sam samting blong mekem se i save sapotem nid we i kam moa bigwan, blong mekem ol prodak mo samting we bae oli rere i stap blong yusum; olgeta we blong yusum oli ol lida blong Jos, ol komuniti ofis, ol skul kaekae program, ol bank blong kaekae, mo ol nara oganaesesen we oli kam patna wetem Jos, we i tekem ol gavman tu, ol intanasonol non-gavman oganaesesen, mo ol nara yumaniterian grup. Kasem tedei, Latter-day Saint Charities i bin sapotem 1,050 KOVID 19 help projek long 152 kantri.

Stat long las jeneral konfrens i kam, Latter-day Saints Charities mo ol lida long ol rijin mo ol lokol lida blong Jos:

  • Oli oganaesem ol help wok wetem Ol Han blong Help volontia, afta we i gat trifala hariken i kilim Golf Kos long Y.S stat long SaotIs Teksas i go kasem Florida.

  • Oli wok wetem ol patna, mo wetem ol lokol lida blong Jos, oli kodinetem wok blong givim help afta ol taefun (bigfala strong win) we i kilim Filipin. Oli bin yusum foti mitinghaos blong Jos blong stap olsem haed senta.

  • Oli helpem ol viktim blong ol busfaea long 23 stek long Kalifonia, Aedaho, Oregon, mo Wasington, YSA.

  • Oli wok wetem wan patna blong givim 180 tan blong kaekae blong helpem ol pipol long nid long Waeoming, Merilan, Mijigan, Nibraska, Saot Karolina, Kolorado, Masajusets, mo Not Karolina, YSA.

  • Oli givim 1 milian dola long Salvation Army blong sapotem wok blong serem ol kaekae long moa long 150 ples raon long Yunaeted Stet.

  • Oli givim kaekae long 200 lokol haos we oli givim kaekae long Niu Yok, YSA.

  • Oli givim 17,000 kilo blong klos mo 77,640 kilo kaekae long Honduras, we oli wok wetem gavman mo komuniti lida blong givim help i go long olgeta we oli bin laef afta long tu hariken i pas.

  • Oli bin help blong givim mane blong lukluk long ol program we bae i givim 30 milian kaekae long ol skul long naen kantri long Afrika.

  • Oli givim mane blong holem 200 taem blong kolektem blad raon long 14 stet long eria blong Jos long Not Amerika Sentrol Eria.

  • Oli givim long 200,000 dola blong pem ol tul blong protektem bodi blong man blong ol medikol profesonol oli yusum, mo ol mask blong ol skul pikinini long Botswana. I gat leven lokol Jos kongregesen we oli kam olsem wan grup mo somap 8,000 mask blong helpem wok ia.

  • Oli komitim blong givim 20 milian dola grant blong sapotem wok blong stopem wol sik KOVID 19, we UNICEF (Wol Pikinini Imejensi Basket blong Yunaeted Nesen) bae i yusum blong givim stik meresin long 196 kantri.

  • Oli bin givim 358,519 kilo blong kaekae; 17,000 kes blong wota; ol matres, mo ol nara saplae i go long olgeta long nid long Teksas mo Oklahoma afta long ol strong winta hariken ia.