Amy A. Wright

Tauturu piti i roto i te peresidenira’a rahi o te Paraimere

E pae matahiti i ma’iri a’e nei, ’ua fāri’i te tuahine Amy A. Wright i te parau ē, e ma’i māriri ’aita’ata nō te punare’a [ovaire] 4 tōna. Te rāve’a noa i roa’a ai i tōna ’utuāfare ’ia upo’oti’a i tāna mau rapa’aura’a fifi, ’ua parau ’oia, ’o te fa’atumura’a ïa i ni’a i te Fa’aora ia Iesu Mesia.

« I te tupura’a te reira i ni’a iā’u, ’ua riro te ao nei ’ei hō’ē vāhi pōiri mau », tē ha’amana’o ra ’oia. « I te taime rā ’a fāriu ai tō’u fa’atumura’a i rāpae, ’ia tūtava ana’e au i te tāvini ia vetahi ’ē ’e ’ia haere mai tā te Mesia i haere, tē vai ra te māramarama ’e te oaoa, ’oia ato’a i te mau taime māuiui ’e te mamae rahi ».

’Ua fa’ata’a mai te tuahine Wright i tāna arora’a i te ma’i māriri ’aita’ata mai te hō’ē ’itera’a nō « te ha’amāninara’a ’e te ha’amaita’ira’a »—hō’ē ’o tei « fa’ata’a-ta’a-’ē-hia » nō te tauturu iāna ’ia ’ite mau i te Fa’aora ma te rāve’a hōhonu o te ta’ata iho. ’Ua ha’api’i ato’a mai te reira iāna ē, ’ua riro te mā’imira’a nō te ha’api’i mai ’e nō te hāro’aro’a i te mau tāmatara’a rau o vetahi ’ē ’ei pūai hau atu.

« Tē tāvini nei tātou pā’āto’a i roto i te mau tuha’a rau o te ’ō vine a te Fatu i te mau taime rau o tō tātou orara’a. Tera rā, hō’ē ē ’ō vine ’e hō’ē ā Fatu », tāna ïa i parau.

« Hō’ē ā ato’a tō tātou ti’aturira’a, ’oia ho’i, te ora mure ’ore ’e te fa’ateiteira’a. ’O te mea ïa tā tātou e hina’aro nei nō teie mau tamari’i ri’i faufa’a roa, ’ia riro te Fa’aora ’ei tuha’a i roto i tō rātou tere, ’e ’ia ho’i rātou i te fare iāna ra ».

’Ua fānauhia Amy Eileen Anderson Wright i te 6 nō Tēnuare 1972, i Roto Miti, Utaha, Fenua Marite, nā Robert ’e Joy Anderson. ’Ua fa’aipoipohia ’oia ia James McConkie Wright i te matahiti 1994 i roto i te hiero nō Roto Miti. E toru tamari’i tā rāua.

’Ua fāri’i te tuahine Wright i te parau tu’ite nō te ha’amāhie te ta’ata ’e te tuatāpapara’a ’utuāfare i te fare ha’api’ira’a tuatoru nō Utaha i te matahiti 1998. ’Ua ’ohipa ’oia ’ei ha’apa’o nō te tai’ora’a ’e ’ei fa’atere nō te piha tōro’a ’e ’ua riro ’ei ta’ata hōro’a i tōna taime nō te Ta’atira’a te mau metua ’e te ’orometua ha’api’i. ’Aita i maoro a’enei, ’ua ’āmui atu ’oia i te fa’anahora’a ’e i te fa’atīanira’a nō te hō’ē piha tōro’a taote niho.

’Ua tāvini te tuahine Wright i roto i te ’āpo’ora’a rahi a te Feiā ’Āpī Tamāhine mai te matahiti 2018. Tōna mau pi’ira’a tahito ’ei peresideni Paraimere nō te titi ’e te pāroita, ’ei tauturu i roto i te peresidenira’a Paraimere pāroita, ’ei ’orometua ha’api’i nō te Ha’api’ira’a tumu o te ’Evanelia, ’e ’ei ti’a fa’atere nō te louveteaux.