Elder Clark G. Gilbert

Hitu ’Ahuru Hui Mana Fa’atere Rahi

E rave rahi tei ’ite ē ’o Elder Clark G. Gilbert te peresideni nō BYU–Pathway Worldwide ’e ’ei peresideni tahito nō Brigham Young University–Idaho. E rave rahi ato’a tei mātau iāna i te fa’atupura’a i te mau fa’anahora’a ha’api’ira’a teitei a’e i ni’a i teie mau fare.

Tē parau nei Elder Clark ē e tāvinira’a faufa’a rahi nā te ’Ēkālesia—te tauturura’a i te feiā ’āpī tamaroa i roto i te ’oire nō Boston, Massachusetts, Fenua Marite—nō te fa’aineinera’a iāna ’ia amo i te mau rāve’a ha’api’ira’a i roto i te mau ta’ata e rave rahi. ’Ua tae mai taua taime tāvinira’a ra ’a ’ohipa noa ai ’oia i te fare ha’api’ira’a tuarua ’e te aupurura’a i te hō’ē ’utuāfare ’āpī.

« ’Aita teie feiā āpī tamāroa i tauturu rahi-hia. ’Ua riro mai rātou ’ei tuha’a nō tō mātou orara’a, ’e ’ua tupu mātou i te rahi nō tē here ia rātou », te nā reira ra ’oia. « ’Ua ha’api’i mai au i tē fa’aro’o i te Fatu ’e ’ua ’ite au ē tei roto ’oia i tō rātou orara’a. E nehenehe tā’u e fa’aro’o iāna ’ia parau mai iā’u i te mea e ti’a iā’u ’ia rave nō rātou ».

’Ua parau Elder Gilbert ē ’ua ha’api’i te Fatu iāna nō ni’a i te mau hina’aro ’o te tahi atu mau ta’ata. « E ’ere noa ā te fa’aineinera’a ’oia iā’u i te ha’api’ira’a, ’ua fa’a’ite mai rā ’oia iā’u i te mea tāna e nehenehe e rave i roto i te orara’a o te ta’ata mai te au i tōna iho fāito hōhonu ».

’Ua fānauhia ’o Clark Gordon Gilbert i Oakland, California, Marite, i te 18 nō Tiunu matahiti 1970, nā Paul ’e Susan Gilbert. ’Ua pa’ari ’oia i Phoenix, Arizona, Marite. I muri a’e i te tāvinira’a i roto i te misiōni nō Kobe Tapone, ’ua fa’aipoipo ’oia ia Christine Calder i te matahiti 1994 i roto i te hiero nō Roto Miti. E ono tamari’i tā rāua.

’Ua fāri’i ’o Elder Gilbert i te hō’ē parau tū’ite nō te mau aura’a na te ara i te matahiti 1994 i te fare ha’api’ira’a tuatoru nō Brigham Young, te hō’ē parau tū’ite master i roto i te mau ha’api’ira’a Asia i te matahiti 1995 i te fare ha’api’ira’a teitei nō Stanford, ’e te hō’ē parau tū’ite taote nō te fa’aterera’a i te ’ohipa putu faufa’a i te matahiti 2001 i te fare ha’api’ira’a tuatoru nō Harvard. ’Ua rave ’oia i te ’ohipa ’ei tauturu ’orometua i te fare ha’api’ira’a nō Harvard Business, ’ei mono i te pae ha’api’ira’a i BYU–Idaho, ’e ’ei peresideni ’e ’ei ra’atira fa’atere rahi nō te Deseret News ’e Deseret News ’e roro uira.

’Ei Hitu ’Ahuru ārea i te taime o tōna pi’ira’ahia, ’ua tāvini Elder Gilbert ’ei peresideni pupu peresibutero, ’ei tauturu i roto i te peresidenira’a Feiā ’Āpī Tamāroa nō te titi ’e te peresidenira’a titi, ’e ’ei ’ēpisekōpo.