E nehenehe ’outou e ha’aputuputu ia ’Īserā’ela !

Nā Ahmad S. Corbitt

Tauturu hō’ē i roto i te peresidenira’a rahi o te Feiā ’Āpī Tamāroa

’Ua pāpū maita’i iā’u e nehenehe ’outou, te feiā ’āpī, e rave i te reira nō te mea e ’ohipa ta’a ’ē i roto i tō ’outou ihota’ata ’e e mana pūai i roto ia ’outou.

’Ua fātata e toru matahiti i teienei, ’ua ani manihini te peresideni Russell M. Nelson i te feiā ’āpī ato’a o Te ’Ēkālesia a Iesu Mesia i te Feiā Mo’a i te mau Mahana Hope’a nei « ’ia fa’aō mai i roto i te nu’u feiā ’āpī a te Fatu nō te tauturu i te ha’aputuputu ia ’Īsera’ela » i nā pae e piti o te pāruru. ’Ua parau ’oia ē, « Taua haʼaputuputuraʼa ra ʼo te ʼohipa faufaʼa rahi roa ïa ʼo tē tupu nei i niʼa i te fenua nei i teie mahana ».¹ ’Ua pāpū maita’i iā’u e nehenehe ’outou te feiā ’āpī e rave i te reira—’e ’ia rave maita’i a’e i te reira—nō te mea (1) e ’ohipa ta’a ’ē i roto i tō ’outou ihota’ata ’e (2) e mana pūai i roto ia ’outou.

E maha ’ahuru ma hō’ē matahiti i teienei, e piti misiōnare nō tā tātou ’Ēkālesia tei fa’auruhia e haere i roto i te hō’ē fare nō Niu Jersey i Marite. Nā roto i te tau, ma te temeio, ’ua bāpetizohia nā metua ’e nā ’ahuru tamari’i. Mai te au i te mau parau a te peropheta, « ’ua vaiiho rātou i te Atua ’ia upo’oti’a »² i roto i tō rātou orara’a. E parau atu vau « tō tātou orara’a ». ’O vau te toru o te tamari’i. E 17 matahiti tō’u, ’a fa’aoti ai au e rave i te hō’ē fafaura’a tāmau nō te pe’e ia Iesu Mesia. ’A feruri na e aha atu ā tā’u i fa’aoti ? E’ita vau e rave i te hō’ē misiōni rāve tāmau. ’Ua rahi roa ïa te reira. ’E e’ita te reira e tītauhia nō’u, ’aita roa ? E melo ’āpī roa vau i roto i te ’Ēkālesia. ’Aita tā’u e moni. Hau atu, nō fa’aoti noa atu nei au i tā’u parau tuite nō te ha’api’ira’a tuatoru, te fare ha’api’ira’a fifi rahi mau i te pae raro nō Philadelphia ’e ’ua fa’aruru vau i te mau tāmatara’a fifi mau, e mata’u huna tō’u ’ia feruri ē e fa’aru’e i te fare nō te roara’a e piti matahiti.

Tō ’outou ihota’ata mau

Nō ha’api’i noa mai nei rā vau ē i ora nā vau ’e te mau ta’ata ato’a i pīha’i iho i tō tātou Metua i te ra’i ra ’ei mau tamāroa ’e ’ei mau tamāhine vārua nāna hou tātou ’a fānauhia ai. E hina’aro vetahi ’ia ’ite, mai iā’u i ’ite, ’ua hia’ai mau ’oia [te Metua i te Ao ra] nō tāna mau tamari’i ato’a ’ia roa’a te ora mure ’ore ’e ’ōna. Nō reira, hou te ta’ata e tae mai ai i te fenua nei, ’ua vauvau ’oia i te tā’āto’ara’a i tāna ’ōpuara’a maita’i roa nō te fa’aorara’a ’e te ’oa’oa, ’e Iesu Mesia ’ei Fa’aora nō tātou. Ma te pe’ape’a mau, ’ua pāto’i Sātane i te ’ōpu’ara’a a te Atua.³ Mai te au i te fa’a’itera’a a te buka ’Āpōkalupo, « e tama’i rahi tei tupu i ni’a i te ra’i ra ! »⁴ ’Ua fa’ahema māite Sātane hō’ē tuha’a i ni’a te toru o te mau tamari’i vārua a te Atua, ma te vaiihora’a iāna ’ia upo’oti’a ’eiaha ra i te Atua.⁵ ’Eiaha rā ’outou ! ’Ua ’ite te ’āpōsetolo Ioane ē, ’ua upo’oti’a ’outou i ni’a ia Sātane « nā roto i te parau o tō [’outou] ’itera’a pāpū ».⁶

Te ’itera’a i tō’u ’ihota’ata mau, tauturuhia e tō’u ha’amaita’ira’a patereareha, ’ua hōro’a iā’u i te itoito ’e te fa’aro’o ’ia fāri’i i te tītaura’a manihini a te peresideni Spencer W. Kimball ’ia ha’aputuputu ia ’Īsera’ela.⁷ Mai te reira ato’a nō ’outou, e te mau hoa here. Te ’itera’a ē ’ua upo’oti’a ’outou i ni’a ia Sātane nā roto i parau o tō ’outou ’itera’a pāpū i nā mua a’e, e tauturu ia ’outou ’ia here, ’ia fa’a’ite, ’e ’ia ani manihini⁸ i teienei ’e i te mau taime ato’a—’ia ani manihini ia vetahi ’ē ’ia haere mai e hi’o, ’ia haere mai e tauturu, ’ia haere mai e ’ia fa’aea roa mai, mai teie ā tama’i nō te mau tamari’i vārua a te Atua e tupu rahi nei.

Te mana pūai o te fa’aro’o i roto ia ’outou

E aha te huru nō teie mana pūai i roto ia ’outou ? ’A feruri na i teie : ’Ua ’ūmere ’outou i te ’oa’oa⁹ nō te haere mai i roto i te hō’ē ao tei hi’a i reira te tā’āto’ara’a e fa’aruru ai i te pohe pae tino ’e te pohe pae vārua. E’ita roa tātou e manuia i ni’a i te tahi ’aore rā i te tahi nā roto ia tātou iho. E mamae tātou ’eiaha noa i tā tātou iho hara nō tā vetahi ato’a rā hara. E ’ite mau te ta’ata i te rau o te mau huru ’āmahamahara’a ’e te fa’ahapara’a¹⁰—te tā’āto’ara’a mā te hō’ē pāruru nō te mo’era’a i ni’a i tō tātou vārua ’e te ’enemi ’ino roa a’e o te ao e tāmau noa nei i te tūtonu ’e i te fa’ahema ia tātou. Te tīa’ira’a mau nō te ho’i ma te ti’afa’ahoura’a ’e te mā i mua i te aro mo’a o te Atua, tei ni’a te tā’āto’ara’a i te hō’ē noa Ta’ata e tāpe’a nei i tāna fafaura’a.¹¹

E aha te mana te tura’i ia tātou ’ia haere i mua ? ’Ua ha’api’i te peresideni Henry B.Eyring, « e tītauhia i te fa’aro’o ia Iesu Mesia nō te pāturu i te ’ōpuara’a nō te ’oa’oa ’e te ti’ara’a o Iesu Mesia i roto i te reira, nō te iti o tō ’outou ’ite i te mau tītaura’a tā ’outou e fārerei i roto i te tāhuti nei ».¹² I te taime ’a fafau ai Iesu Mesia e haere mai ’oia i roto i te tahuti nei ’e e hōro’a i tōna ora nō te ha’aputuputu¹³ ’e nō te fa’aora ia tātou, ’aita ’outou i ti’aturi noa iāna. ’Outou, « te mau vārua ti’amā »¹⁴ i te « fa’aro’o hau atu i te rahi » ’o tā ’outou i ’ite e mea pāpū tāna fafaura’a.¹⁵ E ’ore roa ’oia e ha’avare, nō reira ’ua ’ite ’outou iāna mai te mea ra ’ua mani’i a’ena tōna toto nō outou, nā mua roa i tōna fānaura’a.¹⁶

I roto i te mau parau tāpa’o a Ioane ’ua « upo’otia ’outou i ni’a ia [Sātane] nā roto i te toto o te ’Ārenio ».¹⁷ ’Ua ha’api’i te peresideni Dallin H. Oaks ē i roto i tera ao « ’ua ’ite [’outou] te hope’ara’a mai te ha’amatara’a ».¹⁸

’A feruri na i te hō’ē mahana hou ’outou ’a haere ai i te ha’api’ira’a, ’ua rave te hō’ē o tō ’outou nā metua i te hō’ē fafaura’a pāpū mau ē, ’ia ho’i mai ’outou nā te fare ha’api’ira’a e fana’o ’outou i te mā’a au-roa-hia e ’outou ! E ’oa’oa rahi te tupu ia ’outou ! I te fare ha’api’ira’a, tē feruri ra ’outou i te amura’a i taua mā’a ra, ’e ’ua nehenehe ato’a ia ’outou e tāmata i te reira. Tei mātauhia, e fa’a’ite ’outou i tā ’outou parau ’āpī maita’i ia vetahi. Te hina’aro rahi e ho’i oioi i te fare ’ua fa’a’oa’oa ïa ia ’outou, e au ra ’ua māmā te mau hi’opo’ara’a ’e te mau teimahara’a o te ha’api’ira’a. ’Aita roa hō’ē mea e nehenehe e ’īriti i tō ’outou ’oa’oa ’aore rā e tutāperepere, nō te mea e mea pāpū te fafaura’a ! ’Oia ato’a, hou te fānaura’a o tō ’outou « vārua ti’amā », ’ua ha’api’i mai ’outou i te hi’o i te mau fafaura’a a te Mesia ma te pāpū, ’e ’ua tāmata ho’i ’outou i tāna fa’aorara’a.¹⁹ Tō ’outou fa’aro’o rahi e au mai te mau ponapona e pūai noa atu ’ia fa’aetaeta rahi ’outou i te reira, terā rā mai te reira a’ena i roto ia ’outou.

E nāhea ’outou i te fa’aara i teie fa’aro’o rahi tō ’outou i te Mesia ’e ’ia fa’a’ohipa i te reira nō te ha’aputuputu ia ’Īsera’ela i teienei ’e ’ia upooti’a fa’ahou i ni’a ia Sātane ? Ma te ha’api’i-fa’ahou-ra’a mai i te hi’o i mua ’e ’ia hi’o ma teie ā ta’ara’a nō te fafaura’a a te Fatu ’ia ha’aputuputu ’e ’ia fa’aora i teie mahana. ’Ua fa’a’ohipa iho ā ’oia i te Buka a Moromona ’e i tāna mau peropheta nō te ha’api’i ia tātou e nāhea. Hou te Mesia, « te mau peropheta ’āti Nephi, te mau tahu’a, te mau ha’api’i… [i te fa’aitoitora’a i te nuna’a] ’ia hi’o i mua i te Mesia, ’e ’ia fa’aro’o iāna ’o tei tae mai, mai te mea tei i’ō nei ’oia i teienei ».²⁰ ’Ua ha’api’i Abinadi, « ’e teienei, ’āhiri ’aita te Mesia i tae mai i te ao nei, ’aita ato’a e fa’aorara’a. Tē parau nei i tā te tae mai, mai te mea ra ē ’ua tupu mau te reira i teienei ».²¹ Mai ia Alama, Abinadi « te hi’o ātea atu na ānei… ma te mata fa’aro’o »²² ’e ’ua ’ite i te fafaura’a pāpū o te fa’aorara’a mai te mea ra ē ’ua tupu a’ena. « ’Ua upo’oti’a rātou [i ni’a ia Sātane] nā roto i te toto o te ’Ārenio ’e… te parau o tō rātou ’itera’a pāpū » hou te Mesia ’a fānauhia ai, mai ia ’outou. ’E ’ua hōro’a te Fatu ia rātou te mana nō te ani manihini ’e ’ia ha’aputuputu ia ’Īsera’ela. E nā reira ato’a ’oia nō ’outou mai te mea e hi’o ātea ’outou ma te fa’aro’o, ’ia hi’o ia ’Īseraela ’ia ha’aputuputuhia—te tā’āto’ara’a ’e i roto i tō ’outou « auhoara’a »²³—’e ’a tītau manihini i te tā’āto’ara’a !

Rave rahi hānere misiōnare tei turu’i i ni’a i tō rātou fa’aro’o pūai nō te ao vārua i te Mesia, ma te feruri i te feiā tā rātou i fārerei ’aore rā i ha’api’i ’ahuhia i te ’ahu bāpetizora’a ’e o te hiero. I roto i te hō’ē a’ora’a tei pi’ihia « Begin with the End in Mind [Ha’amata ma te hope’a i roto i te ferurira’a] »²⁴ ’ua hōro’a mai te peresideni Nelson i te hō’ē hi’ora’a nōna iho i te reira ravera’a ’e ’ua ani i te feiā fa’atere misiōni ’ia ha’api’i atu i te reira i tā tātou mau misiōnare. I te ’itera’a ē ’ua fa’a’ohipa rātou i teie fa’aro’o pūai ia Iesu Mesia i roto i te ao vārua ’ua riro mai ’ei tauturu rahi nō tā tātou mau misiōnare here « ’a fa’aro’o iāna »²⁵ ’e ’ia ha’ape’epe’e i tō rātou fa’aro’o rahi nō te ha’aputuputu ia ’Īsera’ela mai tā te Fatu i fafau mai.

’Oia mau, te ferurira’a i te mau ha’avare e tōtōā i te fa’aro’o.²⁶ E tō’u mau hoa, ma te mana’o tae e hi’o ’aore rā e hi’ohi’o atu i te mau mea ’o te fa’ahape i tō ’outou hīro’a mau, te mau hōho’a faufau iho ā ra, e ha’aparuparu te reira i tō ’outou fa’aro’o i te Mesia ’e ’ia ’ore ’outou e tātarahapa e mou roa te reira. ’A fa’a’ohipa i tō ’outou ferurira’a nō te fa’anui i tō ’outou fa’aro’o i te Mesia, ’eiaha ra e ha’amou i te reira.

Te fa’anahonahora’a a te mau tamari’i ’e te feiā ’āpī

’Ua riro te fa’anahonahora’a a te mau tamari’i ’e te feiā ’āpī ’ei mauiha’a tohu nō te tauturu ia ’outou te feiā ’āpī ’ia ha’apūai i tō ’outou fa’aro’o. ’Ua ha’api’i te peresideni Oaks, « ’ua hāmanihia teie fa’anahonahora’a nō te tauturu ia ’outou ’ia riro mai tō tātou Fa’aora i roto i nā tuha’a e maha : Te pae vārua, te pae tōtiare, te pae tino, ’e te pae ferurira’a ».²⁷ ’Outou te feiā ’āpī—tē arata’i nei—’outou i te orara’a i te ’evanelia, te aupurura’a ia vetahi ’ē, te ani-manihini-ra’a i te ta’ata ato’a ’ia fāri’i i te ’evanelia, te tāhō’ēra’a i te mau ’utuāfare nō te ao a muri atu, ’e te fa’atupura’a i te mau ’ohipari’i ’oa’oa,²⁸ te fa’aro’o rahi i te Mesia tā ’outou i fāri’i i te ao vārua e māpiha fa’ahou mai ’e e hōro’a ia ’outou te mana’o nō te rave i tāna ’ohipa i roto i teie orara’a !

’Oia ato’a, tā ’outou iho mau fā, « te mau fā tau poto iho ā ra »,²⁹ e tauturu ia ’outou ’ia fa’aoraora i tō ’outou fa’aro’o pūai. ’Ia ha’amau ana’e ’outou i te hō’ē fā pāpū maita’i, e hi’o ātea ’outou, mai tā ’outou i nā reira i mua a’enei, ma te hi’o e aha tā tō ’outou Metua i te ao ra e hina’aro ia ’outou ’aore rā ’ia vetahi ’ē ’ia riro mai.³⁰ I muri iho e fa’anaho ’e e ’ohipa pūai nō te fa’aoti i te reira. ’Ua ha’api’i ’o Elder Quentin L. Cook, « ’eiaha roa atu e ha’afaufa’a ’ore i te faufa’a nō te tapurara’a, te fa’anahora’a i te mau fā… ’e te [ani manihini ia vetahi ē]—’ia hi’o ’āmuihia i te reira nā roto i te mata nō te fa’aro’o ».³¹

Nā ’outou e mā’iti ! ’Ua parau te Fatu nō ’outou, « te mana [nō te mā’iti] tei roto īa ia rātou ».³² ’Ua tātara mai ’o Elder Neil L. Andersen, « e tupu tō ’outou fa’aro’o ’eiaha ra ma te pea e nā roto rā i tā ’outou mā’itira’a ».³³ ’Ua parau ato’a ’oia, « [te tahi atu ā] mau uira’a tano [tā ’outou]… e riro te reira i te fa’a’āfarohia ma te fa’a’oroma’i ’e te mata nō te fa’aro’o ».³⁴

Tē fa’a’ite pāpū nei au ē (1) tō outou ihota’ata mau ’e (2) te rahi o te mana pūai o te fa’aro’o i te Mesia e vai nei i roto ia ’outou, e fa’ati’a te reira ia ’outou ’ia « tauturu i te fa’aineine i te ao nei nō te ho’ira’a mai ’o te Fa’aora, nā roto i te tītau-manihini-ra’a i te mau ta’ata ato’a ’ia haere mai i te Mesia ra ’e ’ia fāri’i i te mau ha’amaita’ira’a o tōna tāra’ehara ».³⁵ ’Ia hōro’a tātou pā’āto’a i te ’oa’oa nō te fafaura’a pāpū maita’i o te Buka a Moromona :

« Te feiā parauti’a tei fa’aro’o i te mau parau a te mau peropheta, ’e… ’o tē ti’aturi noa ra i te Mesia ma te tīa’i māite… ’ore noa atu te mau fa’a’inora’a mai… ’o rātou te feiā e ’ore e pohe.

« Teie rā [Mesia]… e fa’aora ’oia ia rātou, e hau tō rātou i roto iāna ».³⁶

I te i’oa o Iesu Mesia, ’āmene.

Fa’ata’ara’a

1. Russell M. Nelson, « Ti’aturira’a nō Ziona » (purera’a nō te feiā ’āpī ’ati a’e i te ao, 3 nō Tiunu 2018), HopeofIsrael.ChurchofJesusChrist.org.

2. Russell M. Nelson « ’A vaiiho i te Atua ’ia upo’oti’a », Liahona, Novema 2020, 92.

3. Hi’o Gospel Topics, « Plan of Salvation », topics.ChurchofJesusChrist.org ; hi’o ato’a Henry B. Eyring, « Te mana o te fa’aro’o pāturu », Liahona, Mē 2019.

4. Hi’o ’Āpōkalupo 12:7–8.

5. Hi’o Te Parau Ha’api’ira’a ’e te mau Parau Fafau 29:36–37.

6. ’Āpōkalupo 12:11.

7. Hi’o Spencer W. Kimball, « It Becometh Every Man », Ensign, ’Ātopa 1977, 2-7.

8. « Sharing the Gospel », ChurchofJesusChrist.org/share.

9. Hi’o Ioba 38:4–7.

10. Hi’o Gospel Topics, « Plan of Salvation » ; hi’o ato’a « Be Still, My Soul », Hymns, no. 124, verse 3.

11. Hi’o Gospel Topics, « Plan of Salvation » ; hi’o ato’a Dallin H. Oaks, « Te fa’anahora’a rahi », Liahona, 2020, 93–94, 96.

12. Henry B. Eyring, « The Power of Sustaining Faith », 58.

13. Hi’o 3 Nephi 27:14.

14. Russell M. Nelson, « Hope of Israel », HopeofIsrael.ChurchofJesusChrist.org ; hi’o ato’a Te Parau Ha’api’ira’a ’e te mau Parau Fafau 138:55–56.

15. Hi’o Alama 13:2–4 ; hi’o ato’a ’Āpōkalupo 12:11 ; Te mau Hīro’a Fa’aro’a 1:5. Tē ha’apāpū nei te Buka a Moromona ē te feiā e « fa’aro’o hau atu i te rahi » e hi’o i te mau fa’aura’a a te Atua ē ’ua tupu a’ena. Hi’o 1 Nephi 5:5 ; Mosia 3:11–13 ; 4:1–3 ; Alama 27:28 , 28:12 (« ’ua ti’a mai rātou » matahiti 77–76 HM) ; hi’o ato’a Exodo 3:13 , Isaia 53 ; Te Parau Ha’api’ira’a e te mau Parau Fafau 130:7 ; Mose 7:47.

16. Hi’o 2 Nephi 31:15 ; Etera 3:11–13, 6–9 Te fa’aro’o nō te ’ite i te fafaura’a fa’aora a te Mesia ē ’ua tupu a’ena e tītau-pāpū-hia ’ia ’ite mau e ’aita te Mesia e ha’avare. Nō teie huru fa’aro’o ’o te hō’ē ïa tāpaʼo pāpu o te feiā ha’apa’o maita’i i te ao vārua, tō tātou iho ā ra feiā ’āpī. « ʼUa faʼaherehere tō tātou Metua i te Ao ra e rave rahi o tāna mau vārua tei hau atu i te maita’i—penei a’e, e nehenehe ta’u e parau ē, tāna pupu ’o’oi roa a’e—nō teie tuhaʼa hopeʼa. Taua mau vārua hau atu i te maitai ra—taua feiā ha’uti maitaʼi roa aʼe, taua mau ’aito ra—ʼo outou ïa! » Russell M. Nelson, « Hope of Israel », HopeofIsrael.ChurchofJesusChrist.org. Hi’o ato’a Ioane 1:1 ; 14:6, 17.

17. ’Āpōkalupo 12:11 ; hi’o ato’a Etera 3:6–9.

18. Dallin H. Oaks, « The Great Plan », 93.

19. Hi’o Alama 36:24–26 ; hi’o ato’a Salamo 34:8 ; Iakoba 3:2 ; Mosia 4:11.

20. Iaroma 1:11.

21. Mosia 16:6.

22. Alama 5:15.

23. Hi’o « Gospel Living : Circles », New Era, ’Ātopa 2020, 15.

24. Hi’o Russell M. Nelson, « Begin with the End in Mind » (’aora’a i hōro’ahia i te seminaire nā te mau peresideni misiōni ’āpī, 22 nō Tiuni 2014).

25. Hi’o Russell M. Nelson, « Fa’aro’o iāna », Liahona,, Mē 2020, 88–92.

26. ’Ei hi’ora’a, ’ua parau Alama i tōna nuna’a nō ni’a i te hi’ora’a ātea nā roto i te mata fa’aro’o i te taime e ti’a ai rātou i mua i te aro o te Atua, terā rā ’ua a’o ’oia ia rātou ē e’ita e nehenehe ia rātou i te fa’a’ohipa noa nā roto i te mana’o pāpū ’e te hau maori rā ’ia tātarahapa rātou i tā rātou mau hara (hi’o Alama 5:15–17).

27. Mata ’e Mata ’e te Peresideni ’e te tuahine Oaks (ha’apurorora’a nā te feiā ’āpi ’e te mau tamari’i ati a’e te ao nei, 23 nō Fepuara 2020), facetoface.ChurchofJesusChrist.org.

28. Hi’o Buka arata’i rahi : Tāvinira’a i roto i Te ’Ēkālesia a Iesu Mesia i te Feiā Mo’a i te mau Mahana Hope’a nei, 1.2; 10.2.1.3; 11.2.1.3, ChurchofJesusChrist.org.

29. Mata ’e Mata ’e te Peresideni ’e te tuahine Oaks, facetoface.ChurchofJesusChrist.org.

30. Hi’o ’Ia Poro Haere i Ta’u nei ’Evanelia : Hō’ē arata’i nō te ’ohipa misiōnare (2018), 156, ChurchofJesusChrist.org; see also Alama 5:15–17.

31. Quentin L. Cook, « Purpose and Planning » (’aora’a i hōro’ahia i te seminaire nā te mau peresideni misiōni ’āpī, Tiuni 2019).

32. Te Parau Ha’api’ira’a ’e te mau Parau Fafau 58:28.

33. Neil L. Andersen, « Faith Is Not by Chance, but by Choice », Liahona, Novema 2015, 66.

34. Neil L. Andersen, « Te mata o te fa’aro’o », Liahona, Mē 2019.

35. « Te parau tai’o a te pupu Autahu’ara’a a Aarona », ChurchofJesusChrist.org.

36. 2 Nephi 26:8–9