2021
E pāhono te mau ve’a i te mau hina’aro o te ao nei
Me 2021

E pāhono te mau ve’a i te mau hina’aro o te ao nei

E mea ’āpī te fa’anaho-ra’a-hia ’ei nā ha’apararera’a e toru nā te ao nei, ha’amata i te ’āva’e Tēnuare 2021, tē vauvau nei te mau ve’a a te ’Ēkālesia i te mau parau poro’i nō roto mai i te feiā fa’atere o te ’Ēkālesia, e mau parau poro’i « tano maita’i ’e nō teie tau », ’ia au i te parau a Elder Quentin L. Cook, nō te Pupu nō Te Tino ’Ahuru Ma Piti ’āpōsetolo. « E mana pae vārua ’e te parau ha’api’ira’a », tō te mau ve’a ’āpī nā te mau tamari’i, te feiā ’āpī, ’e te feiā pa’ari, tāna ïa parau. E pāturu te mau tumu parau i te fa’anahora’a ha’api’ira’a Mai pe’e mai ’e i te tahi atu mau mea faufa’a rahi.

« ’Ua riro te mau ve’a a te ’Ēkālesia ’ei rāve’a faufa’a rahi nō te ha’api’i mai nō ni’a i te ’evanelia a Iesu Mesia ’e nō te ’itera’a i te hō’ē tā’amura’a i te hō’ē mea i roto i tāna ’Ēkālesia », te parau ïa a te peresidenira’a mātāmua i roto i te hō’ē rata nō te fa’aara i te mau ve’a ’āpī. « Tō mātou hina’aro maori rā, ’ia tāpa’o te mau melo i tō rātou i’oa ’e ’ia fāri’i maita’i i teie fa’aurura’a ’o tē pāturu i te fa’aro’o i roto i tō rātou ’ā’au ’e tō rātou fare ».

Te Liahona, nō te feiā pa’ari ; Nō te pūai o te feiā ’āpī, nō te feiā ’āpī ; ’e te Hoa, nō te mau tamari’i, i teienei, e tauturu te reira :

  • I te mau ’utuāfare i roto fātata 150 fenua ’ia fāri’i i te rāve’a nō te tāpa’o i tō rātou i’oa nō te fāri’i i te mau ve’a nō te mau tamari’i ’e te feiā ’āpī iho ā rā.

  • I te mau ve’a ’ia roa’a pinepine a’e i roto i te tahi mau ārea ’e te tahi mau reo.

  • I te mau melo ’ia fāri’i ato’a i te mau parau poro’i tāhō’ē nā roto i te mau ve’a nā te ao nei.

  • I te mau parau pāpa’i ’ia roa’a rahi te reira i roto i te rorouira ’e te nene’ira’a.

Tē fa’aitoitohia nei te feiā fa’atere nō te fenua iho ’ia hōro’a i te feiā fa’afāriu ’āpī i te hō’ē tāpa’ora’a nō te roara’a hō’ē matahiti ia fāri’i i te hō’ē ve’a e tano i tō rātou matahiti, ’e ’ia hōro’a i te Hoa ’aore rā Nō te pūai o te feiā ’āpī i te mau tamari’i ’e te feiā ’āpī e haere mai nei i te purera’a ’aita tō rātou mau metua.1