E fa’atupu te mau ’ohipa nā te ātea i te tāhō’ē

’Ua fa’atupu te mau ’ohipa nā te ātea e rave rahi rāve’a nō te mau melo o te ’Ēkālesia ’ia ’ite i te hō’ēra’a i roto i te mau ’ōpuara’a ’e te hāro’aro’ara’a o te ’evanelia.

Te hoa i te hoa

Pāturuhia e te peresidenira’a rahi o te Paraimere, ’ua fa’anahohia teie ’ohipa nō te mau tamari’i, nō te mau metua ’e te feiā fa’atere nā te hō’ē tamaiti ’e hō’ē tamāhine tei paraparau i tō rāua reo tumu, te reo peretāne, paniōra ’aore rā pōtītī. ’Ua fa’a’ite mai te tahi atu mau tamari’i i te mau parau fa’a’ite i ni’a i te tahua natirara ’ati a’e te ao nei. I roto i te reira fa’a’ite’itera’a tē vai ra te mau ’ā’amu video nō ni’a ia Iesu Mesia, hō’ē parau poro’i nā te mau tamari’i nā te peresideni Russell M. Nelson, hō’ē uiuira’a nō ni’a i te mau fafaura’a ’o te bāpetizora’a ’e ’o Elder Ulisses Soares nō te pupu nō te Tino ’Ahuru Ma Piti ’āpōsetolo, ’e te mau ’āparaura’a ’e te peresidenira’a rahi nō te Paraimere. Tē vai ato’a ra te mau ha’api’ipi’ira’a nō te pāpa’i hōho’a, te mau ’ohipara’a anoihi, ’e te hīmenera’a. ’Ua hurihia te reira ’ohipa ’e e nehenehe e māta’ita’i i roto i te tahi atu mau reo. E roa’a ato’a te reira i roto i te tahi mau tuha’a poto a’e e fa’a’ohipahia i roto i te tuatapapara’a ’evanelia i te fare.

Te fa’ahanahanara’a a te Feiā ’Āpī Tamāhine

’Ua fa’atupu te peresidenira’a rahi o te Feiā ’Āpī Tamāhine i te tahi ’ohipa nā te ātea tei fa’a’ite i te 150ra’a o te matahiti o te fa’anahonahora’a a te Feiā ’Āpī Tamāhine. ’Ua ha’apūrorohia nā roto e 11 reo. ’Ua fa’aharuharu te peresideni Nelson i te hō’ē parau poro’i, ’e ’ua pāhono te feiā fa’atere o te Feiā ’Āpī Tamāhine i te mau uira’a nā roto i te reo peretāne, paniora e pōtītī. Nā te feiā ’āpī tamāhine nō Norevetia e nō Tairane i hōro’a i te mau pure. I te matahiti 2020, ’ua fa’aitoitohia te feiā ’āpī tamāhine nā te ao ato’a nei ’ia rave e 150 ’ohipa tāvinira’a.

Tū’atira’a RootsTech

’Ua hau i te mirioni ta’ata ’ana’anatae i te ’ohipa ’ā’amu ’utuāfare tei ’āmui atu i roto i te ’ohipa nā te ātea nō te Roots Tech i te ’āva’e Fepuare 2021 ’O te fāito rahi a’e ïa o te ta’ata tei ’āmui atu i roto i te fa’ahanahanara’a rahi a’e o te ’ā’amu ’utuāfare i te ao nei. ’Ua fa’a’ōhie te RootsTech i te fa’ananeara’a o te hō’ē vaira’a buka ha’api’ipi’ira’a nā te ātea ’o tē vai noa i te roara’a o te matahiti. ’O Elder Jeffrey R. Holland nō te pupu nō te tino ’ahuru ma piti ’āpōsetolo ’e tāna vahine, ’o Patricia, nā manihini paraparau i roto i te mahana nō te ’itera’a i te ’utuāfare, hō’ē te reira tuha’a matahiti o te putuputura’a.

Heivanui nō te pehe nā te feiā ’āpī

’Ua fa’a’ite mai te heivanui nō te pehe nā te feiā ’āpī o te ’āva’e Māti i te mau tāreni nō te pehe ’e te mau ’itera’a pāpū. ’Ua fa’atupu te feiā ’āpī nō Niu Terani, Beresiria, te Rēpūpirīta Dominika, Helemani, ’Āfirita Apato’a, ’e te fenua Philipino i te reira fa’anahora’a, tei ha’amauhia i ni’a i te tumu parau a te feiā ’āpī nō te ’Ēkālesia nō 2021, « E ’ohipa rahi » (hi’o i Te Parau Ha’api’ira’a ’e te mau Parau Fafau 64:33–34).. Ta’a ’ē noa atu te mau hīmene ’e te mau parau poro’i fa’atumuhia i ni’a i te Mesia mai roto mai i tō rātou mau hoa, ’ua fa’aro’o ato’a te feiā ’āpī i te peresideni Nelson ; te peresideni Bonnie H. Cordon, peresideni rahi nō te Feiā ’Āpī Tamāhine ; ’e te peresideni Steven J. Lund, peresideni rahi nō te Feiā ’Āpī Tamāroa.

Mau rāve’a nō te mau vahine

’Ua riro te peresideni Jean B. Bingham, peresideni rahi nō te Sotaiete Tauturu, ’ei ta’ata ’ōrero tumu i roto i te paera’a o te symposium matahiti o te mahana o te mau vahine nā te ao nei. Ma te pāturuhia e te ti’a mana o te repupirita nō Senegal, nō roto mai teie ’ohipa nā te ātea i te ’oire nō Los Angeles, Karifonia (Fenua Marite). ’Ua parau te peresideni Bingham i te mau ti’a fa’atere ’ohipa nō te ao nei ’e te mau ti’a hau ē, te ha’api’ira’a, ’o te tāviri ïa o te manuia nō te mau vahine ’e te mau tamāhine nā te ao ato’a nei. ’Ua fa’a’ite ’oia i te mau hi’ora’a o te mau vahine tei ha’amaita’ihia nā roto i te fa’anahora’a Ha’api’ira’a ’evanelia a te ’Ēkālesia.

Te mau hīmenera’a Noela

’Ua hāpono te mau melo o te ’Ēkālesia ’e te mau hoa nō te tahi atu mau fa’aro’o nā te ao ato’a nei i te mau ha’uti video Noela tei patahia i roto i te mau ’āru’i hīmenera’a ’e tei ha’apūrorohia i ni’a i te ChurchofJesusChrist.org i te roara’a o te pu’e tau Noela ’ei tuha’a nō te porora’a matahiti Tūrama i te ao nei o te Noela.