Tē tāmau noa nei te haerera’a o te hiero i mua

I roto i tāna mau parau ’ōpanira’a i roto i te ’āmuira’a rahi, ’ua fa’aara te peresideni Russell M. Nelson i te mau fa’anahora’a nō te patu e 20 hiero ’āpī nā te ao nei (hi’o ’api 127). Te fāito rahi o te mau hiero e patuhia tei fa’aarahia i te hō’ē taime, tei ni’a ïa i te 12 hiero tei fa’aarahia e te peresideni Nelson i te 7 nō ’Ātopa 2018.

’Ua fa’aara te peresideni Gordon B. Hinckley i te mau fa’anahora’a nō te patu e 32 hiero ’āpī i te ’āmuira’a rahi nō ’Ēperēra 1998, ’aita rā ’oia i tāpura i te mau vāhi pāpū.

Mai te taime ’a riro mai ai ’oia ’ei peresideni nō te ’Ēkālesia i te matahiti 2018, ’ua fa’aara te peresideni Nelson i te patura’a o te mau hiero ’āpī e 69. ’Ua fa’aara ’oia 19 hiero i te reira matahiti, 16 i te matahiti 2019, ’e 14 i te matahiti 2020. E 43 hiero tei roto i te patura’a ’aore rā i te tātā’ira’a i teie taime, ’e noa atu te ma’i pe’e, ’ua tāpūhia te repo nō te mau hiero ’āpī e 21 i te matahiti 2020. I teienei, e 251 hiero tā te ’Ēkālesia tei fa’aarahia, tei roto i te patura’a, ’aore rā, te tere nei.

Ta’a ’ē atu te fa’aarara’a nō te hiero, ’ua vauvau mai te peresideni Nelson i nā tuha’a e maha nō te ’īritira’a i te mau hiero ’ia iti ana’e te ma’i pe’e.