Para sa mga Magulang

Ang Panguluhang Diyos at Pagmamahal sa Kapwa

illustration of Godhead

Mahal Naming mga Magulang,

Kasama sa isyu sa buwang ito ang mga paksang tulad ng Panguluhang Diyos, ang responsibilidad ng mga magulang, pagpapatawad, at paglilingkod sa lahat ng anak ng Diyos—saanman sila nanggaling o saanman sila papunta. Ang mga artikulo sa ibaba ay makatutulong sa pagtuturo ninyo ng mga alituntuning ito sa inyong tahanan.

Mga Talakayan tungkol sa Ebanghelyo

Ang Panguluhang Diyos

Gamitin ang “Mga Pangunahing Alituntunin ng Ebanghelyo” sa pahina 6 upang ituro sa inyong mga anak ang tungkol sa Panguluhang Diyos. Ano ang Kani-kanyang gawain ng Ama sa Langit, ni Jesucristo, at ng Espiritu Santo? Paano Sila nagtutulungan upang maisakatuparan ang Kanilang mga layunin? Paano magtutulungan nang may lubos na pagkakaisa ang inyong pamilya upang maisakatuparan ang mga dakilang bagay?

Mga Family Council

Itinuro sa atin na noon pa man ay kailangan na ang mga family council at ang mga ito ay walang hanggan (tingnan sa M. Russell Ballard, “Mga Family Council,” Liahona, Mayo 2016, 63). Ang artikulo sa pahina 12 ay nagbibigay ng ilang tagubilin para maging epektibo ang mga family council. Paano ginagawa ng inyong pamilya ang mga iyon?

Pagiging Magulang

Sa pahina 8, ibinahagi ni Elder Jeffrey R. Holland ng Korum ng Labindalawang Apostol kung paano niya natutuhan ang isang mahalagang aral tungkol sa pagiging malapit sa kanyang anak. Isiping basahin ang artikulong ito kasama ang inyong asawa at talakayin kung paano ninyo mas mapapanatiling malapit sa inyong puso ang inyong mga anak.

Pagtulong sa mga Refugee

Hinilingan tayong mapanalanging paglingkuran ang mga taong napilitang iwan ang kanilang tirahan, kabilang na ang mga refugee, na nakatira sa ating komunidad. Basahin ang artikulo sa pahina 18. Talakayin kung ano ang kailangan ng mga tao sa inyong lugar, at planuhing paglingkuran at kaibiganin sila.

Suporta sa Pumarito Ka, Sumunod Ka sa Akin

Tingnan sa mga pahina 34–37 ang materyal na sumusuporta sa pag-aaral ng inyong pamilya ng Doktrina at mga Tipan sa buwang ito.

Masayang Pag-aaral ng Pamilya

Paikutin Sandali

Doktrina at mga Tipan 64:33

1. Umupo nang pabilog ang lahat. Pag-usapan ang ilang maliliit na kabutihan na magagawa ng mga miyembro ng pamilya sa isa’t isa.

2. Maglagay ng isang lapis sa gitna ng bilog.

3. Magsalitan sa pag-ikot ng lapis.

4. Sinuman ang ituro ng lapis ay dapat iarte ang maraming kabutihan na maiisip niya sa loob ng isang minuto.

5. Magpatuloy hanggang sa magkaroon ng pagkakataon ang bawat isa.

Talakayan: Anong kabutihan ang magagawa natin para sa ating mga kapitbahay, miyembro ng ward, at sa ating sarili? Paano humahantong sa mga dakilang bagay ang maliliit at mga simpleng kabutihan?

Isinumite ni Mitzi Schoneman

Sundin ang Propeta

Doktrina at mga Tipan 69

Si Oliver Cowdery ay naatasang magdala ng manuskrito ng Aklat ng mga Kautusan sa Independence, Missouri. Iniutos ng Panginoon kay John Whitmer na sumama kay Oliver (tingnan sa Doktrina at mga Tipan69:2).

1. Magkunwaring inutusan ka ng Panginoon na ihatid ang manuskrito ng Aklat ng mga Kautusan (na kalaunan ay naging Doktrina at mga Tipan).

2. Ano ang kailangan mong gawin para maingatan ang mahalagang aklat na ito?

3. Mag-isip ng isang pagkakataon na pinagkatiwalaan ka ng isang tao na tapusin ang isang mahalagang gawain.

4. Anong mga hakbang ang ginawa mo para matapos ang gawain?

Talakayan: Bakit mahalagang sundin ang tagubilin ng mga lider ng Simbahan? Paano tayo mapoprotektahan ng pagsunod sa ating propeta at iba pang mga lider ng Simbahan?

Isinumite ni Lisa Thomas

Paghahanap ng Kayamanan ng Ninuno

Doktrina at mga Tipan 69:8

Iniutos ng Panginoon kay John Whitmer na tipunin at itala ang kasaysayan ng Simbahan, “nagsusulat, nagsisipi, pumipili, at kumukuha ng lahat ng bagay na para sa ikabubuti ng simbahan, at para sa bumabangong salinlahi” (Doktrina at mga tipan 69:8). Pansinin kung gaano kahalaga ang pag-iingat ng talaan sa Simbahan.

1. Hanapin ang isang ninuno sa FamilySearch.org o sa iba pang mga family history record.

2. Basahin ang kanyang journal o ang mga alaala ng mga miyembro ng pamilya tungkol sa taong ito.

3. Bumanggit ng ilang mabubuting bagay tungkol sa iyong ninuno.

4. Paano ka natutulad sa iyong ninuno?

5. Paano naging kayamanan ang mga rekord na ito para sa iyo?

Talakayan: Pag-usapan ang mga bagay na nagawa ng inyong mga ninuno. Talakayin kung paano pinagpala ng kanilang buhay ang inyong buhay. Magbahagi kung paano natutulad ang inyong buhay sa kanila. Pag-usapan kung paano naiiba ang inyong buhay sa kanila.

Isinumite ni Crystal Wallace

Sa Magasing Para sa Lakas ng mga Kabataan sa Buwang Ito

“Maibabahagi Mo nang Natural ang Ebanghelyo”

Kung minsan tila nakakatakot magbahagi ng ebanghelyo sa iba. Ang artikulong ito ay nagbabahagi ng dalawang kuwento na nagtuturo sa mga kabataan kung paano maaaring maging masaya at madali ang pagiging missionary! Ibahagi sa inyong pamilya at talakayin ang iba pang mga paraan na maibabahagi ninyo ang ebanghelyo sa iba.

“Maging Matatag”

Sa artikulong ito, ibinahagi ni Sister Lisa L. Harkness, Unang Tagapayo sa Primary General Presidency, ang tatlong alituntunin mula sa Josue 24:15 kung paano mananatiling matatag sa ebanghelyo.

Mga Tanong at mga Sagot

Nahihirapang kumonekta sa inyong mga anak na tinedyer? Subukang magbasa ng mga ideya at mungkahi mula sa mga kabataan sa iba’t ibang panig ng mundo kung paano sila bumubuo ng ugnayan sa kanilang mga magulang. Talakayin bilang pamilya kung paano ninyo mas mapagbubuti ang inyong ugnayan. Kasama rin sa artikulong ito ang isang tanong tungkol sa kahalagahan ng sarili at kung paano nais ng Panginoon na maging mapagpakumbaba tayo nang hindi ibinababa ang tingin sa ating sarili.

Pahina ng Katuwaan

Ang bahaging ito ay tungkol sa katuwaan! Tingnan kung malulutas ninyo ng anak mong tinedyer ang misteryo ng riddle seed o mabubuo ang picture puzzle.

Ngayong Buwan sa Magasin na Kaibigan

Pumarito Ka, Sumunod Ka sa Akin para sa mga Bata

Maghanap ng lingguhang mga ideya at aktibidad sa pag-aaral ng pamilya sa “Masayang Oras para sa Pag-aaral ng mga Banal na Kasulatan.” Para sa maliliit na bata, maghanap ng iba pang mga tulong sa lesson sa Pumarito Ka, Sumunod Ka sa Akin sa bahaging Para sa Maliliit na Bata.

Buwanang Kuwento sa mga Banal na Kasulatan

Basahin ang tungkol sa katapangan nina Mary Elizabeth at Caroline Rollins nang iligtas nila ang mga pahina ng Aklat ng mga Kautusan mula sa galit na mga mandurumog.

Imbitasyon ng mga Matulunging Kamay

Tulungan ang inyong mga anak na gawin ang aktibidad sa buwang ito mula sa grupo ng Mga Matulunging Kamay! Humanap din ng isang espesyal na mensahe mula kay Sister Sharon Eubank, Unang Tagapayo sa Relief Society General Presidency, tungkol sa iba pang mga batang naglilingkod sa iba’t ibang panig ng mundo.

Matutong Maging Matatag

Turuan ang inyong mga anak tungkol sa katatagan sa pahina ng journal ng buwang ito.

Pagmiministering sa Tahanan

Basahin ang “Isang Panalangin para kay Papi” para malaman kung paano nahikayat ang isang batang babae mula sa Guatemala na maglingkod sa kanyang ama.