ITULAU I LE LOTOIFALE

Ua na’o Volenitia le mea na fa’atonuina e le Foma’i, mo tagata Amerika Samoa

Potu o Tala Fou

O foma’i, ua valaauina o ni faifeautalai, o loo tuuina atu le tausiga e lē o maua i le teritori o le Pasefika seia oo mai i le taimi nei.

Faatasi ai ma le fesoasoani mai Le Ekalesia a Iesu Keriso o le Au Paia o Aso e Gata Ai, o foma’i volenitia mai ISA ua toe o mai i Amerika Samoa e fesoasoani e faaleleia atili le tausiga o gasegase.

I le lua tausaga talu ai, na valaauina ai le toatolu o foma’i ma o latou taitoalua o ni faifeautalai volenitia e galulue i le Falema’i o Lyndon B. Johnson i Pago Pago.

O Dr Audrey Tarr ma lona toalua o David sa nonofo i Oregon, lea na ia galue ai o se foma’i mo Fafine Ma’itaga [Obstetrics] ma Toala Fanau o Tamaitai [Gynaecology] faatasi ai ma se tomai faaopoopo mo gasegase i vaega o Ala Feau Vai [Urology]. Sa la taumafai ma David, o se inisinia na litaea talu ai nei, e fetuunai po o le a le isi laasaga mo i la’ua.

“Sa ou mafaufau e uiga i se taimi i le lumanai e galue ai o se faufautua faafoma’i i le eria mo se tasi o le tele o misiona a le Ekalesia,” na fai mai ai Dr. Tarr. “Ae sa ma maua se valaau mai le ofisa autu o le Ekalesia faatasi ai ma lenei avanoa e galulue ai nei o ni foma’i.”

Sa ia lagonaina le tāua tele mo ia lona sau, ona o ia o se fomai tamaitai sa galue e faalauiloa mataupu tau soifua maloloina o tamaitai. Ua popole Dr. Tarr i le maualuga o le aofai o tamaitai i Amerika Samoa ua aafia i le kanesa ma fuafua ai e fesoasoani i le Matagaluega o Soifua Maloloina e faaleleia atili le soifua maloloina o tamaitai i le lotoifale.

Ao i ai i Amerika Samoa, o loo galulue faatasi Elder David Tarr—o se inisinia atamai tele e mamanuina ma fausia vaalele—ma se vaega o inisinia ma le au lipea i le falemai. Fai mai a ia, sa manaia tele le olaga o se faifeautalai. “Talu ona fai la’u pine faifeautalai, ua iloa uma ai e tagata o a’u o se tagata o le Ekalesia. O se avanoa sili e tali ai fesili mai isi ma faasoa atu ai aafiaga faaleagaga o ia te a’u.”

O Jim ma Helen Gebhard e o mai mai Grand Junction, o se taulaga laitiiti i le itu sisifo o Colorado. O Jim o se fomai tipitipi ma e faapitoa i le togafitiina o gasegase e faaletonu ivitū.

E pei o le au Tarrs, sa mafaufau le au Gebhards e volenitia o ni faufautua faafoma’i i le eria ma talu ai la te tautatala i le faa-Sipaniolo, na la manatu ai e mafai ona la auauna atu i se atunuu e tautatala faa-Sipaniolo. Peitai, na valaauina foi i la’ua e o mai i Amerika Samoa, lea e le’i i ai muamua ai lava i le falemai se tagata tomai faapitoa i ma’i tau ivitū. Ina ua taunuu, na i ai se lisi umi lava a Dr. Gebhard o gasegase e vaai.

“Sa mafai ona ma fesoasoani i gasegase na pepē tino ona sa lē mafai ona vave iloa o latou gasegase,” o lana tala lea. “O le a tele le fesoasoani mo i latou pe a fai a matou taotoga iinei.”

E i ai le faailoga o le matuaofaiva o Sister Gebhard i le atina’ega o tamaiti ma aoaoina kosi i le kolisi faaitumalo i Grand Junction mo mātua e i ai a latou fanau i aoga faataitai. O loo faiaoga nei o ia i na lava vasega i le Kolisi Tuufaatasi a Amerika Samoa i le lima aso o le vaiaso.

Ua uma ona atia’e e le au Gebhards ni sootaga vavalalata ma gasegase. “Sa valaaulia foi i ma’ua i ni faaipoipoga se lua!”

O Robert Keddington sa galue i vailaau mo faalavelave faafuasei i Iutā ma na litaea i ni nai tausaga ua mavae. I le 2020 sa ia maua ai se valaau mai se taitai sinia o le Ekalesia i le Aai o Sate Leki ma fesili atu pe e le’i mafaufau lava e auauna atu i se misiona faafoma’i.

“Sa ma tatalo ma lo’u toalua o Sue ia iloa pe o se mea lenei e tatau ona ma faia ma sa maua se tali matagofie mai le Tama Faalelagi e tatau ona ma o.”

“Sa ou le mautinoa lelei le toe foi lea e fomai i le mavae ai o se taimi umi,” o le tala lea e Dr. Keddington. “Sa ou popole foi e uiga i le vaaia o gasegase e i ai ni faaletonu e fesootai ma le teropika, o se mea ou te lei vaaia lava i la’u galuega i Iuta. Ae ou te lei Malaga ese atu, na tuu mai e lo’u taitai o le ekalesia i le lotoifale se faamanuiaga ma ta’u mai o le a faamanuiaina au i le toe manatua e fesoasoani ai i tagata iinei. Sa ou iloaina pea lava pea pe a ou vaaia se gasegase, ou te manatua se mea na ou aoaoina i le aoga faafomai i le silia ma le 40 tausaga talu ai, o le mea tonu lena na manaomia e lea gasegase. O se faamanuiaga moni mai le Alii.”

Ia Iulai 2022, na faamaea ai e le au Keddingtons le lua tausaga o le la auaunaga i Pago Pago. Sa la talisapaia minute uma o le la taimi iina.

O Vincent Haleck, o le sa avea muamua ma Peresitene o le Eria i le Pasefika na saunoa i se sauniga faamavae mo le au Keddingtons. Na ia manatua le faigata tele mo gasegase i Amerika Samoa ona mauaina togafitiga manaomia. “Sa ou vaaia le toatele o tagatanuu o taumafai e malaga i Niu Sila mo togafitiga ae toaitiiti na mafai . . . na ou mafaufau i le matagofie o le mauaina o nei togafitiga iinei lava i Amerika Samoa.“ Faatasi ai ma se faamalosi’au mai ia Peresitene Russell M. Nelson, o ia o se fomai, na faatuina e Elder Haleck le polokalama lea na i’u ai ina oo mai le au Keddingtons ma isi fomai i le Pasefika.

I lana saunoaga faaiu, na faapea mai ai Dr. Keddington, “Ua ou vaaia le aao o le Alii i la’u galuega i tagata iinei,” na ia fai mai ai.

“O se aafiaga faamaualalo ma faamalieloto.”