Mauaina o le Malosi i le Alii: Faafoisia Faalelagona

Saunia e Lillian Arp

Na tatalaina talu ai nei e Le Ekalesia a Iesu Keriso o le Au Paia o Aso e Gata Ai se kosi fou o se vaega o lana polokalama faaleaoaoga o le Ola Tutoatasi. E lē pei o vasega muamua, e lē taulai atu lenei kosi i le ausia o sini faaletino pe tautupe. Nai lo o lena, o loo talanoaina ai o tatou soifua manuia faalelagona.

I le amataga o le 2022, o le kosi o le Mauaina o le Malosi i le Alii: Faafoisia Faalelagona na avanoa mo uarota uma i le Siteki o Papatoetoe i Niu Sila, ma e 17 tagata o le Uarota a Massey Park na lesitala ma le naunauta’i.

O Brother ma Sister Tagavaitau na faatautaia le vasega, lea na faatasitasi i taeao o Aso Toonai taitasi mo le 12 vaiaso. Ona o tapu o le KOVITI-19, na faia ai vasega i le Zoom, ae na tumau pea le toatele o le auai i le semesa atoa. Na manaia anomea o le kosi, ma na fegalegaleai le vasega i faasoaga o tauiviga ma manuia a o latou aoao faatasi taiala musuia mo le faaleleia o le faafoisia faalelagona.

O se vaega o le galuega faatino, na fefaasoaa’i ai tagata auai o le kosi i a latou molimau e uiga i lesona e fiafia i ai mai le kosi. O nisi nei o latou manatu:

Sister Theresa Tagavaitau

Ou te matua’i faafetai lava mo le vasega ‘Faafoisia Faalelagona’ o le Ola Tutoatasi . . . aemaise lava mo lesona i le “faatoilaloina o le ita”. E i ai taimi e vave ai lo’u ita ma ua ou nofouta i lena mea ma manao e sui.

Ou te manao e faasoa atu le upusii lenei e fesoasoani e faataatia ai se vaaiga mamao mo a’u . . .

“O le ola ai ma le ogatasi ma Iesu Keriso e mafai ona fesoasoani e te lagona ai le filemu nai lo le ita. O le “liuga tele” o le loto (Alema 5:14) lea e sau mai i le faaōgatusaina ma Iesu Keriso e mafai ona fesoasoani e faamagalo ai isi, “fai mea lelei e lē aunoa” (Mosaea 5:2), ma “faatalitali i le Alii” (Salamo 37:9). O le a faatumulia oe e le Agaga Paia i le “alofa, olioli, filemu, onosai, mataalofa, agalelei, faamaoni, agamalu, (ma le) lē gaoia” (Kalatia 5:22–23).”¹

Ua faamanatu mai e lenei vasega ia te a’u afai ou te manao moni lava ia suia, e le mafai ona ou faia na o a’u. O le faaogatusaina ma Keriso o le a fesoasoani ai ia te au i la’u faigamalaga e avea moni ma se e maufetuunai faalelagona.

Brother John Tagavaitau

Sa ou faasoa atu lenei mea i lou aiga ona na tulaga ese: E mafai ona tatou lagonaina le olioli e tusa lava pe i ai se aso leaga, vaiaso leaga, po o se tausaga leaga!

“O’u uso e ma tuafafine pele, o le olioli ua tatou lagonaina e itiiti lava se mea e faatatau i tulaga o tatou olaga ao mea uma o loo faatatau i le taulaiga o ō tatou olaga.

“Afai o le taulaiga o tatou olaga e i le fuafuaga o le faaolataga a le Atua . . . ma ia Iesu Keriso ma Lana talalelei, e mafai ona tatou lagona le olioli e tusa lava po o a mea o tutupu—pe lē o tutupu foi—i o tatou olaga. O le olioli e sau mai [ia te Ia] ma ona o Ia. O Ia o le puna o le olioli uma”².

Brother Ephraim Vaisa

“Faaeteete i le auala e te faailogaina ai lou tagata. Aua le faailogaina pe faamatalaina oe lava i ni uiga lē tumau. Na pau lava le uiga e tasi e tatau ona tatou iloa ai o i tatou o se atalii po o se afafine o le Atua. O lena mea moni e sili atu nai lo isi uiga uma, e aofia ai le lanu, galuega, uiga faaletino, mamalu, po o faalapotopotoga faalelotu”³.

Ou te fiafia tele i lenei upusii auā i le olaga lenei ua tuuina mai ia i tatou ni igoa valaau mai o tatou alalafaga, nuu po o faapotopotoga, suafa matai mai o tatou aganuu, galuega, po o ausiaga . . . ma e i ai taimi e faaigoa ai i tatou i ni upu faatiga lea e masani ona tatou talitonu i ai. E leai se tasi o na mea e tāua i le vaaiga e faavavau. Na o le pau le faalagiga po o se igoa valaau e mau ma i tatou e oo i le faavavau, o i tatou o atalii ma afafine o le Atua.

E lē mafai e se tasi ona aveesea lena mea mai ia i tatou.

Brother Desmond Maugatai

“O oe o se atalii/afafine o le Atua. O Ia o le Tama o lou agaga. I le faaleagaga o oe o se aloalii, o se alo o le Tupu o le Lagi. Faamau lena upumoni i lou mafaufau ma tumau ai.”⁴

Na manatu le Pato Auleaga e leai sona aogā seia oo ina ia iloa lona faasinomaga moni o se kusi. Ona ia iloa lea e matuā tāua tele ma alofagia o ia.

O lenei tala na suia atoa ai la’u vaaiga. E ui ina tatou mafaufau tatou te vaivai ma faatauvaa, e tatau ona tatou manatua o i tatou o se atalii/afafine o le Atua. O se tasi o mea na ia tuuina mai ia i tatou o lo tatou gafatia lea e faatoilalo ai mea, e pei ona sa faia e Iesu Keriso. Tatou te lē atoatoa [e pei ona i ai o Ia], ae afai tatou te vaai atu i la tatou faataitaiga atoatoa e tasi, e mafai foi ona tatou faatoilalo o tatou lava tauiviga ma vaivaiga.