IRIIRA TE BURABETI
E na Kaukaki Mataroan te Maiu n Tamnei: Rongorongon te tembora iroun Beretitenti Nelson
Kona ata aron kaukan te rabuna are bwenaua karawa ao aon te aba, aron butimwaeakiia ana anera te Atua bwa a na buokiko, ao aron karekean te kairiiri mai karawa ae tamaroa riki.
“N te tai aei tina rairaki nakon atuun te maroro iaon taian tembora,” e taku ara burabeti ao ara Beretitenti Russell M. Nelson n te Maungatabu ni Kabuta n Okitobwa 2018.
Inanon ana kateitei aika a tabu ti kona n riki bwa banna ni katoto irouia aika a Itiaki ni Boong aika Kaitira, e a tia ni kaungaira bwa tina bitii mweengara bwa te tienta ibukin reiakinan te euangkerio ao ni kauringiira kakaawakin kabonganaan aran ana ekaretia ara Tia Kamaiu ae eti: Ana Ekaretia Iesu Kristo ibukiia Aika Itiaki ni Boong Aika Kaitira.
Imwiina, e karaurau ni kaoti nakon te bootaki n taromauri bwa a na karika te tembora bwa te moanibwai.
“Ti ataia bwa ara tai inanon te tembora e rang kakaawaki ibukin kamaiuakira ao karietatakira,” e taku:
“Imwiin karekean ara entaumente n te tembora ao karaoan ara berita ma te Atua, ngaira n tatabemaniira ti riai ni kateimatoa kakorakorakin maiura n tamnei ao reiakinara are ti kona ti inanon ana auti te Uea. Ao ara bakatibu a kainnanoira bwa tina riki bwa taan tei ibukiia.
“Iangoa ana nanoanga ae korakora ao ana momotiraoi te Atua, imwain katean aan te aonaaba, e katauraoa te kawai n anga kakabwaia n te tembora nakoia ake a tia ni mate ake a tuai n ongo te euangkerio. Bwaai aika a kakaraoaki aika a tabu aikai bon man rimoa rimoa. Iroun taai akekei a rang kakukurei ao bon teuana naba kakoauakin ae a bon koaua.
“Tariu ao mwaneu aika kam tangiraki, ana kamaemae te kaitara a rikirake ni birimwaaka, ni korakoraia ao n tein aekakiia nako. Kainnanoan kaean te tembora ae e aki bwakabwaka e a kainanoaki riki ngkai. I bubuti ngkami bwa kam na taraia bwa ko kanga ni kabongana ami tai. Karekei ami tai n taai aika a na roko ao aia tai am utu. Ngkana iai am kona n roko n te tembora, I kaungako bwa kona karekea am tai ni kakarekea am tai ma te Uea n tainako—n rin n Ana auti ae tabu—ngkanne kateimatoa am tai n roroko anne iaon taina ma te kimwareirei. I berita nakoim bwa te Uea e na uoti kakai ake e ataia bwa ko kainnanoi ngkai ko kabanea am tai ni beku ao n taromauriia inanon Ana tembora.”1
N ana maroro riki teuana, Beretitenti Nelson e taekinna, “N te tai are e kaoti iai te kanganga n aekaia nako inanon maium, te tabo ae mano iai tamneim bon maiuakinan am berita n te tembora.”2
E moana ana maroro man kabwarabwaraan te kateitei ae kakaawaki are e kainnanoa kamatoan te Tembora are i Salt Lake are kateaki man rimoa rimoa—ni karokoa te Mireniuam—bwa ena kaitara korakoran mwaingigin te aonaaba. Imwiina, e kabwarabwara kakaawakin kakorakorakin aan maiura n tamnei, ibukina bwa ngkai, e a korakora riki nakon are mai imwainia, kamaiuakira n te maiu are akea tokina e a rootaki man kangaangan te maiu.
“Tariu ao mwaneu aika a tangiraki, tai aikai bon boong aika kaitira. Ngkana ngkoe ao ngai tina tei ni kaitarai angibuaka ao kataaki aika a ana roko, e kakaawaki bwa e na iai aara ae matoatoa are e kateaki iaon te Tia Kabooi Maiura, Iesu Kristo” (taraa Ereman 5:12).
“Ngaia are I a titirakini ngkami, matoatoara aan ami kateitei? Ao tera kamatoakin ami koaua ao ami ataibwai n te euangkerio aika a kainnanoaki?
“Te tembora e riki bwa te tienta ibukin kakorakorakin ara onimaki ao maiura n tamnei ibukina bwa te Tia Kamaiu ao Ana tua bon ngaia boton raoi te tembora. Bwaai ni kabane a reiakinaki inanon te tembora, rinanon kaetieti ao rinanon te Tamnei, e karikirakea ara atatai iroun Iesu Kristo. Ana otenanti aika kakaawaki are e kabaeira ma Ngaia rinanon te berita ae tabu n te nakoanibonga. Ngkanne, ngkai ti kawakin ara berita, E na karikirakeira ni mwaakana ni kamaiu, ni kakorakora (taraa Reirei ao Berita aika Tabu 109:15, 22). Ao o, tina rang kainnanoa Mwaakana ni boong aika imwaira.
“Ti a tia n tuangaki n te berita bwa ‘ngkana [ti] tauraoi [ti] na aki maaku,’ (Reirei ao Berita aika Tabu 38:30; taraa Reirei ao Berita aika Tabu 10:55). Te kauring aei e a tia ni kaotaki mwiina ni boong aikai. Te Uea e a tia ni katanoata bwa e ngae ngke e korakora kangaanga ni boong aikai, naake a katea aaia iaon Iesu Kristo, ao a tia n reiakinna bwa a na kanga ni karekea mwaakana, a riai n aki taenikai n tabeaianga ni boong aikai.”3
Beretitenti Nelson e reitia, “nakoimi n tatabemani ngkami ake kam a tia ni karaoi berita n te tembora, I bubuti ngkami bwa kam na ukoukoria—n tataro mwaaka ao ni kateimatoa—n atai berita aika tabu n te tembora ao otenanti. Mataroan te Maiu n Tamnei a na kaukaki. Kona ata aron kaukan te rabuna are bwenaua karawa ao aon te aba, aron butimwaeakiia ana anera te Atua bwa a na buokiko, ao aron karekean te kairiiri mai karawa ae tamaroa riki. Am mwakuri korakora ni karaoi ana kantaninga e na kairoroa ao ni kamatoa aan maiun tamneim. . . .
“Taiaoka ni kakoauai ngkana I taekinna bwa ngkana e kateaki aan maiun tamneimi iaon Iesu Kristo, kona riai n aki maaku. Ngkai ko kokoaua nakon am berita ae tabu ake ko karaoi n te tembora, ko na kakorakoraaki ni Mwaakana. Ngkanne, ngkana e roko kataakin te maiu n tamei, ko na kona n tei ni matoatoa ibukina bwa aan maium n tamnei e matoatoa ao e aki kamwaingiingaki.”4
Beretitenti Nelson e tangiriira bwa tina uringnga bwa tembora a bon kakaawaki inanon maiuira ngaira aika a Itiaki ni Boong aika Kaitira, ibukina, n tokin te tai, a na kairiirira nakon ara Tia Kamaiu Iesu Kristo.
N te witeo are e a tibwa otinako ni bukamaruan manga kaukan te Washington D.C. Tembora, ara burabeti e taku:
“Ti rang kakabwaiaaki ni karekean taian tembora. E na mwaiti riki taian tembora ngkai e rikirake te Ekaretia. Ma tiaki mwaitina, ao tiaki naba te tabo are e mena iai. Tiaki te kateitei. Bon te otenanti are inanona.
“Ngkana ko taraa te tembora, ko riai n ataia bwa bon te kanikina ibukin Iesu Kristo, ngkai te Tia Tei ibukira ma iroun te Tama. Bon tii mai Irouna ao rinanona ti kona n roko iroun Tamara are i Karawa.
“Bon ngaia naba te kanikina n ara onimaki inanon te maiu imwiin te mate. Tembora nako a tei bwa te mwaneka, te mwaneka ae tabu nakon te maiu ae akea tokina ibukira ma ara utu.”5