Ana Iteraniba te Aono
Te Ninikoria N Titiraki
Maiun Awhina man uarerekena e aki rau. E kaikawaaki iroun tibuna te unaine ni karokoa 8 ana ririki, ao imwiina e mwaing man te mweenga teuana nakon teuana, are a kakai reke iai turaki ao kakeru nakon karekean te amwarake ke te onimaki. “Akea ae tataekina te Atua,” e taku, “Akea te maroro ae karekea te raunnano ao te ikabwarabure . . . I rikirake ma te boitin n riribai ao te kakai un ibukina bwa I aki reireiaki ae tamaroa riki.”
Ngke tebwi tabun ana ririki, e bon bua. “Akea ae kairai, akea ae kamanoai, akea ae katea te banna ni katoto ae tamaroa ibukin kairakiu. E aki rau au iango ao akea te tabo are N na karekea iai te rau” e ururing rikaaki. E ti ata aekakin maiuna ngkekei, ao n tokina, e a kairia nakon te tabo ni kamarurung ibukin te anua ae kareke n nimakin te arekooro.
E aki maan imwiin kaotinakoana, e kaitibo ma mitinaren Ana Ekaretia Iesu Kristo ibukiia Aika Itiaki ni Boong Aika Kaitira. E a tia n nonoria n ririaki, ngaia are e a kinaiia, ma tao iai bukina, Te Awhina e namakina ae e kabaeaki bwa e na weteiia.
“Iai au titiraki,” e uringnga. “Kam na bae n iangoia bwa e burababa te titiraki aei, ma ngkana ko ikawairake n akea ataakin te Atua . . . I bon aki ataia.” E taku nakoia mitinare, “Ngkana kam kona ni kaeka au titiraki, N na ongora n [ami rongorongo].”
Imwiina e titiraki: “Te mwaane te Atua ke te aine?”
Temanna te mitinare e kaeka, “Te Atua bon Tamara are i Karawa ae tatangira.”
Te kaeka aei e uota te namakin ae e aki kantaningaia ae matata ao e rau nakon Te Awhina. E kan atatai riki. “Ngaia,” e taku nakoia mitinare. “I a ongora iroumi.”
Ai 10 te ririki imwiin bwabetitoan Te Awhina n riki bwa te membwa n Ana Ekaretia Iesu Kristo ibukiia Aika Itiaki ni Boong Aika Kaitira. E riki bwa te mitinare, n te tai ae waekoa imwiin ana bwabetito, ao e beku n te Brisbane Mition i Aotiteria. Imwiina, n 2020, e mareaki ma Josh, ‘te mwaane are I nooria ni miiu.’ A ingainga taanga aikai ni kabaeaki imarenaia—n te tai aei ao n akea tokina—n te tai ae waekoa iai ni manga kaukaki iai te New Zealand Hamilton Tembora.
N ana ururing rikaaki n te mwananga ae tamaroa are e waaki man te titiraki ae beebete, Te Awhina e ataia bwa te Burabeti Iotebwa Timiti e karekea naba ana kaotioti ae korakora ibukin ninikoriana n titiraki nakon te Atua . . . ao n ai aron Iotebwa Timiti, Te Awhina e reiakinna bwa n tabetai te kaeka e aki waekoa n roko.
Ngke a moan kabwarabwara taekan Tuan te Mauri mitinare nakoina, ana moan kaeka Te Awhina, “E a tau, kam rarabwa.” Ma e ngae ngke e inimaki ma te kantaninga are e nang katikui bwaai aika a kaorakia, e mimi ibon irouna n aron waekoana n ongotaeka. Te bwai ae riki, “N tokin au reirei ma [mitinare], I a tia ni katoka nimakin te koobe,” e ngare.
Aki riki bwaai ni kabane n akean te mwakuri, ma katokana Te Awhina e a tia n anganaki kaniwanga ae te kamarurungaki ao kabwarakin ana bure n ana Mwakuri ni Kamaiu Iesu Kristo. Inanon ririki aika a bati, e a tia n uota te korakora ao te kantaninga n ataia bwa te kairake are Iotebwa Timiti e inimaki naba inanon te rotongitong, bon imwaina ae e noora te kakai n te Moan Mii, are e kauka moan rokon euangkerio iaon te aba.
Ana taeka Unimwaane Jeffrey R. Holland e a tia ni buoka Te Awhina ni matata n te baeten aei:
“Bon te koaua ae matata bwa imwain te bwai ae korakora, ni koauana bon imwain te tai ae korakora n te maiu n tamnei, ikanne are e kona n roko iai te ikakorakora, te kaitara, ao te rotongitong. Iai taai akanne inanon maiura ae ririki nakoira, ao n tainako a roko ngkana tia kaitara ma te babaire ae moan te kakaawaki ke te mwaneka ae kakaawaki inanon maiura.”1
“Ngkai I bukamarua au ka 10 n ririki n rin inanon te nanai, I a tia ni kunea te kamarurungaki are e ti kona n reke ngkana ti tara Kristo ao n rairi nanora,” e taku Te Awhina. “I kakaitau ibukiia mitinare, ibukin te koaua are a tia n reireinai. . . ao ibukin te bwai are e a tia ni karaoia te euangkerio inanon maiu.”