Ana Iteraniba te Aono
E Kakukureia Nanou te Anene ae nako man te Nano
70 te ririki ni beku e waaki man te titiraki ae beebete.
Walnetta Broederlow McCall ai tibwa ruaiwa ana ririki ngke mitinare a titiraki ngkana iai ae e kona ni katanga te biano ibukiia kain te taromauri aika a boou. “I karaurau ni katea baiu!” e kauringnga. Te mitinare, Elder Charles W. Ashman, e aki tabe ma ana ririki ke ngkana e kabi. E angan Walnetta te boki n anene bwa e na kataneiai, ao te wiiki are imwiina e a riki bwa te tia biano n aia bootaki.
Ngke a mwananga ana utu Walnetta mai Biti nako Devonport iaon Auckland’s North Shore tabeua te ririki imwiin te Kauoua ni Buaka n te Aonaaba, tamana, Oscar P. Broederlow bon ti ngaia te membwa n Ana Ekaretia Iesu Kristo ibukiia Aika Itiaki ni Boong Aika Kaitira n te aono anne. Ma a kanakoaki mitinare bwa ana mwkauri ao n te tai ae uarereke e a tau mwaitiia aika rairaki aika a boou ibukin karaoan te bootaki n te Devonport Labour Hall, are e kairaki iroun tinan Walnetta, Hilda E. Lobendahn Broederlow.
N te tai are e kateaki iai te Bootaki n Aine ikekei, aia kurubu aine ae uarereke a kakaitibo ni katoa wiiki ni mweengan Titita Norma Roberts. Tinan Walnetta e kakairia bwa e aonga ni kona ni katanga te biano are e airi ibukiia ‘Aia Anene Tiina’. “Te Moanrinan e tuai kateaki ngkanne,” e kauringnga, “ngaia are N tainako I aki toki n tanrikaaki ma te mimi iaan te koaua are irou, iriirakin te Bootaki n Aine ao e otinako imwiina te Moanrinan!”
Ana konabwai Walnetta ni katangitang e kakorakoraki ngkai e reitinako ni beku. E kakoaua n rikiraken te Ekaretia ae kamimi n ana aono, ao n raonaki ma anne bon tibwangana ni karikirakean ana tarena. Ngke tebwii tabun ana ririki, ana mwaanga e a riki bwa te kanimaua ni Uoote i Auckland, ao ana umwantabu ae boou iai inanona te aokan ae te bwaibu ae maiu man te iti. Walnetta e tuai man kakatanga te aokan mai imwaina. “Teuare e moan karaoia e anganai te boki ae uarereke ao e rang baiti naba kairakiu n rinanoana—tao bon ti tebwi ma nimaua te miniti,” e taku. Tao bon tii te kaetieti ibukin te bwai ni katangitang n te aokan ae e kona ni karekea. . .ma e aki rawa iai. “I ataia bwa e na buokai iai te Uea. Imwiina I karikia bwa tabeu n reiakin ni kabane ake I kona ni kataneiai, ma ni kataneiai, ni kataneiai!”
Inanon 70 te ririki ngkai, kabaeakin Walnetta n te katangitang e a tia ni kakabwaiaia aika a mwaiti. Ngke Beretitenti Steve Midgely, te titeiki beretitenti mai imwaina n te Whangarei, e aki roko n te reke ana tia piano ibukin te maungatabu n te titeiki, Walnetta e kukurei ni butimwaea ana bubuti ni katang biano ibukina. Ao, ni katoa tai are tararua iai te Beretitenti n te Aono ae Beretitenti David Baxter n te bootaki n toa i Takapuna, e na bae n tei irarikin te aokan imwiin te taromauri ni karabwa Walnetta ibukin te katangitang.
“Au kantaninga bwa I taetae ibukiia taan katangitang ni kabane ngkana I taekinna ae I namakina te kakaitaua ngkana taari ao membwa a kakaitau ibukin te katangitang are ti katauraoi,” e taku. “I a tia ni katangitang ibukin te uoote, titeiki ao bootakin Aonon te Betebeke [ao] n raoniia kain te kuaea n te Ekaretia, riki n te kabo n te anene irouia kain te aba.” E namakina te karineaki ngkai e kona ni mwakuri ma taan anene aika a tarena aika a mwaiti ao taan katangitang n te Aro ngke a karaoi kamataku iaon taian anene.
Inanon ririki aika a bati Walnetta e a tia ni beku n nakoa riki tabeua ao e rang kukurei inanon taneiai naba akanne. N te tai aei e rang kakaitau n anga te katangitang imwain te taromauri n ana uoote Taupo are mena iai ngkai, ni kaoa te Tamnei ae Raoiroi ao ni katea tein te katangitang ae karinerine ibukin aia bootaki n toa. Uringan ana tangira ibukin nakoana, e rang kakaitau ibukin te bwaintangira are e anganna Elder Ashman inanon ririki aika bwakanako ngke e kakaea te tia katang biano ae anganano. “Ana kakao ibukin te katangitang n ara bootaki ao [ana] onimaki irou e a tia ni kakabwaia maiu,” e taku.
Te katangitang e waekoa n riki bwa kaotan ana tangira nakon Tamana are i Karawa ao Iesu Kristo, ao ni kuna n taromauri nako ake e a tia n reiakini a tiku bwa uringakia. Te moan kuna are e a tia ni katangnga bon, “Lord, Dismiss Us with Thy Blessing.”
“Bon te tataro are Tamnein te Atua e na raoniira n tainako,” e taku Walnetta, “ao inanon ririki aika a bati, te koaua anne e a tia ni kakoauaki inanon maiu.”
E kona n rinea te kuna ae tatangiria? Imwiina iangoana, ana kaeka Walnetta bon, akea. “Te bwai ae kakaawaki riki irou bwa te anene are I katangnga e aki rinorino, I kukurei n tainako n namakina te Tamnei ngkai I katanga te kuna anne.” E reitia: “Spencer W. Kimball (1895–1985) e taekinna n te taina, ‘Ti riki bwa taan katangitang, ngkai ti kona n riing nanoia naake a ongora.’1
“I namakinna bwa anne tibwangau.”