Para sa mga Magulang

Pagtitiwala sa Kapangyarihan ng Panginoon at sa mga Propeta

sina Pangulong Nelson at Sister Nelson na binabati ang dalawang batang lalaki

Larawang kuha ni Ravell Call, Deseret News

Minamahal na mga Magulang,

Sa ating mundo na tumitindi ang kaguluhan, madaling makadama ng takot at kawalang-katiyakan. Pero kapag bumaling tayo kay Jesucristo para mapanatag, mabibigyan Niya tayo ng kapayapaan sa mga unos ng buhay. Basahin ang mga artikulo sa isyung ito para malaman kung paano kayo matutulungan ng Tagapagligtas na malampasan ang inyong mga hamon.

Mga Talakayan tungkol sa Ebanghelyo

Nag-aalok Kaagad ng Kapayapaan ang Tagapagligtas sa mga Panahon ng Kaguluhan

Kasama ang inyong pamilya, basahin ang artikulo ni Elder Uchtdorf sa pahina 4 kung paano makapagbibigay ng kapayapaan ang pagtitiwala sa nagbibigay-kakayahang kapangyarihan ni Cristo sa mahihirap na sitwasyon. Sama-samang talakayin ang ilang paraan na nag-aalok ng ginhawa si Jesus. Ano ang magagawa ninyo para maanyayahan ang Kanyang kapangyarihan sa inyong buhay?

Paano Pinagpapala ng Priesthood ang Ating Pamilya?

Basahin ang artikulo sa pahina 22 na tungkol sa mga basbas ng priesthood. Anyayahan ang mga kapamilya na magbahagi ng mga pagkakataon na nakatanggap sila ng basbas ng priesthood. Ano ang naramdaman nila? Paano nakatulong sa kanila ang basbas? May basbas ba na makakatulong ngayon sa isang kapamilya?

Ginagamit ng Panginoon ang Kanyang Propeta para Tulungan Tayong Magkaroon ng Lakas-ng-Loob o Tapang

Sa artikulo sa pahina 30, tinalakay ni Elder Sikahema kung paano nakatulong sa kanya ang pagsunod sa mga turo ng propeta na maging matatag sa kanyang mga paniniwala at pamantayan sa kanyang propesyon bilang isang propesyonal na manlalaro ng American football at sa buong buhay niya. Matapos basahin ang artikulong ito, maaari mong ipabahagi sa bawat miyembro ng iyong pamilya ang isang pagkakataon na nakatulong sa kanila ang pagsunod sa propeta para magkaroon ng lakas-ng-loob o tapang.

Katuwaan ng Pamilya sa Pumarito Ka, Sumunod Ka sa Akin

Lumalago nang Lumalago Araw-araw

Bilang mga miyembro ng ipinanumbalik na Simbahan ni Jesucristo, responsibilidad nating tumulong na mapalago ang kaharian ng Diyos sa lupa. Sabi sa Mateo 13:31–32:

“Ang kaharian ng langit ay tulad sa isang butil ng binhi ng mustasa na kinuha ng isang tao, at inihasik sa kanyang bukid.

“Iyon ang pinakamaliit sa lahat ng mga binhi, ngunit nang tumubo ay siyang pinakamalaki sa mga halaman at nagiging punungkahoy.”

1. Umupo sa isang bilog at mamaluktot na parang maliit na binhi ng mustasa.

2. Hayaang magsalitan ang lahat sa pagbibigay ng pangalan ng isang aktibidad na maaari nilang gawin bawat araw para tulungan ang Simbahan na lumago (magpatotoo, magbahagi ng isang talata ng banal na kasulatan sa social media, magbahagi ng katotohanan ng ebanghelyo sa isang kaibigan, atbp.).

3. Sa tuwing may babanggit ng isang aktibidad na tumutulong na mapalago ang Simbahan, uupo nang mas tuwid ang lahat at pagkatapos ay magsisimulang tumayo hanggang sa makatayo sila nang tuwid.

4. Talakayin sa inyong pamilya kung bakit mahalaga para sa bawat tao na gawin ang kanyang bahagi para makatulong sa paglago ng Simbahan.

Isinumite ni Brenda Slade

Mula sa Magasing Para sa Lakas ng mga Kabataan

bangka sa ibabaw ng mga alon

Notebook ng Kumperensya

Gamitin ang resource na ito para makapaghanda sa pangkalahatang kumperensya at mas matuto mula sa mga mensahe sa kumperensya.

Kapayapaan sa mga Unos ng Buhay

Itinuro ni Elder Uchtdorf kung paano mapapayapa ng Tagapagligtas ang mga unos sa ating buhay at maghahatid sa atin ng kapayapaan.

Handang Magmisyon

Habang naghahandang magmisyon ang mga kabataan, narito ang ilang mahahalagang bagay na mapagtutuunan nila ng pansin.

Paano Pinahalagahan ng Tagapagligtas ang Kababaihan

Tingnan kung paano naging matapang ang Tagapagligtas sa pagpapakita ng kabaitan at paggalang sa kababaihan, at matutong tularan ang Kanyang halimbawa.

Mula sa Magasing Kaibigan

batang babaeng binibinyagan

Paghahanda para sa Binyag

Maghanap ng mga kuwento at aktibidad sa Kaibigan sa buwang ito para tulungan ang inyong mga anak na matuto tungkol sa binyag at sa mga una nilang tipan.

Kapayapaan sa Unos

Basahin ang isang inilarawang kuwento sa banal na kasulatan tungkol sa pagpapayapa ni Jesus sa bagyo. Pagkatapos ay alamin ang tungkol sa isang batang babae mula sa Peru na nakadama ng kapayapaan nang magkaroon ng lindol.

Pagsunod kay Jesus sa Kiribati

Kilalanin ang kaibigan naming si Scott at alamin kung paano niya sinusunod si Jesus. Pagkatapos ay basahin ang iba pa tungkol sa mga pulo ng Kiribati.

Para sa Maliliit na Kaibigan

Maghanap ng mga kuwento at aktibidad lalo na para sa ating mga pinakabatang mambabasa, gayundin sa mga tulong sa pag-aaral para magturo ng mga alituntunin mula sa Pumarito Ka, Sumunod Ka sa Akin sa maliliit na bata.