Ueʻi ʻe he ʻMīsini Foakiʼ Kilisimasí ʻa e Kau Foakí, Tokoniʻi e Kakai Faingataʻaʻiá
ʻOku fakakakato ʻe he fuofua Mīsini Foaki ʻi he Hemisifia Fakatongá ʻi he Lōkani Haipatoumi ʻi Pilisipeini, ʻAositelēliá, ha polokalama ola lelei ke tāpuekina e moʻui ʻa kinautolu ʻoku faingataʻaʻiá.
ʻI he faʻahitaʻu Kilisimasi ko ʻeni ne toki ʻosí, ko e konga ʻo ha polokalama tokoni fakaemāmani lahi ne ui ko e “Fakamāmaʻi ʻa e Māmaní,” ne tuʻu ai ha mīsini ngalikehe ʻi he hemisifia fakatongá, ʻi Kuinisilani, ʻAositelēlia.
Naʻe tokoni ʻa e “mīsini foaki” ne nofotaha ʻi he tokoni ʻofá ke foaki ʻe he kau fakatau ʻi he Sōpingi Senitā Lōkani Haipatoumi ʻi Lōkani Sití, ki ha kautaha tokoni ʻofa fakalotofonua pe fakatuʻapuleʻanga ʻoku nau fili.
Ko e kau fakatau mo e kau ʻaʻahi kehe ʻe 2,700 tupu ne omi ki he senitaá, naʻa nau fakafeangai lelei ki he mīsini foakí, ʻo fakapaʻanga ai ha ngaahi naunau tokoni ʻofa ʻaki ʻenau foakí.
Naʻe foaki ha $92,785 ki ha ngaahi kautaha tokoni ʻofa fakalotofonua ʻe ono ʻi he māhina ko Tīsemá.
Ko e ngaahi kautaha tokoni ʻofa te nau fakaʻaongaʻi e paʻanga ne foakí ke tokoniʻi e fakafoʻituituí, ngaahi fāmilí, mo e tukui koló ko e: Angel Flight; Children’s Hospital Foundation; Community Involvement Solutions; GIVIT; Rosie’s – Friends on the Street; pea mo e Royal Flying Doctor Service.
Ko e tokotaha kotoa ʻoku foaki ʻi he mīsiní te ne lava ʻo fili mei ha ngaahi meʻa kehekehe ʻoku fakataumuʻa ke lelei ange ai e moʻui ʻa ha taha.
Naʻe kau ʻi he ngaahi foakí ʻa e:
Ngaahi Pēketi Fakatuʻupakē Mahuʻinga ʻe 293 maʻá e ngaahi fāmilí lolotonga ha nofo fakatuʻupakē ʻi he falemahakí
Foʻi vesa Kula Loto-toʻa ʻe 165 ke fakaʻilongaʻi ʻaki e loto-toʻa ʻa ha kiʻi leka lolotonga e ngaahi faitoʻo fakafalemahaki faingataʻá
Ngaahi Pēketi Tokangaekina ʻo e Maʻa Fakatāutahá ʻe 340 maʻá e houʻeiki fafine ʻi ha hūfangaʻanga mei he fakamamahi ʻi ʻapí mo e kē fakafāmilí
Kafu ʻe 380 maʻá e kakai ʻoku tukuhausiá
Meʻakai BBQ ki he Toko Tolu ʻe 101 maʻá e kakai ʻoku tukuhausiá
Tiupi Mānava ʻe 312 ke tokoni ke fakahaofi ha moʻui ʻi he taimi ʻoku ʻikai lava ai ha taha ʻo mānava pea fiemaʻu tokoni fakafaitoʻo fakavavevavé
Ko e niʻihi ʻo e ngaahi ngāue mahuʻinga ʻo e mīsini foakí ko e faingamālie ki he kau foakí ke ʻai honau tā ʻoku nau pukepuke ha fuʻu kaati lahi ʻo fakafofongaʻi ai e meʻaʻofa naʻa nau fakataú fakataha mo ha fanga kiʻi fakaʻilonga meʻaʻofa ke tautau ʻi he ʻakau Kilisimasí, ʻo fakahaaʻi e meʻaʻofa ʻoku foakí.
Naʻe ʻi ai ha ngaahi mīsini foaki ʻi he feituʻu ʻe 31 fakaemāmani lahi ʻi he faʻahitaʻu Kilisimasi ne toki ʻosí kau ai e 23 ʻi ʻAmelika, ua ʻi Mekisikou, ua ʻi Filipaini, ua ʻi Kuatemala, taha ʻi Kānata, mo e taha ʻi ʻAositelēlia.
Naʻe fuofua kamataʻi e polokalama mīsini foakí ʻi he 2017 pea fakapaʻanga ʻe he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko e konga ʻo ʻene polokalama #FakamāmaʻieMāmaní fakataʻú, pea ko e 100% ʻo e fakatau kotoa pē ʻoku ʻalu ia ki he kautaha tokoni ʻofa kuo fili ʻe he tokotaha foakí.
ʻI he hoko e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko e kau muimui ʻo Sīsū Kalaisí, ʻoku nau fāifeinga ke moʻui ʻaki e ongo fekau lalahí—ke ʻofa ki he ʻOtuá pea ʻofa ki honau kaungāʻapí.
Kuo pehē ʻe Lāsolo M. Nalesoni, ko e palesiteni ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimuí Ní: “Ko kinautolu ʻoku loto ke ui ko e kakai ʻa e ʻEikí ʻoku ʻ[nau] loto ke fefuaʻaki [ʻenau] ngaahi kavengá, … ke tangi fakataha mo kinautolu ʻoku tangí; … pea [ke] fakafiemālieʻi ʻa kinautolu ʻoku ʻaonga ki ai ʻa e fakafiemālié.ʼ”
ʻOku fekumi e kāingalotu ʻo e Siasí kiate kinautolu ʻoku faingataʻaʻiá pea tokoni ki he fānau kotoa pē ʻa e ʻOtuá ʻo ʻikai tokanga ki he tui fakalotú, matakalí, pe tangataʻi fonuá. Kuo fakatahaʻi ʻe he Siasí, mo hono kāingalotú mo e kaungāmeʻá ʻenau ngaahi foakí ʻi he ngaahi feinga taʻetotongi ke fakafiemālieʻi ʻa e faingataʻaʻiá mo langaki ʻa e moʻui fakafalala pē kiate kitá ʻi he funga ʻo e māmaní.