Noda Tabana

Era Sotava na Yalododonu mai Niue na Reki ena nodra Sokalou ena Valetabu ni Oti e Volekata e 30 na Yabaki

Rumu ni iTukutuku

“Au vakila ni sa vaka me ra sa takali yani na noqu leqa kei na nuiqawaqawa kecega.”

Ena imatai ni gauna ena loma ni 27 na yabaki, era a lakova kina rauta ni 2,484 na kilomita na lewenilotu ena Tabana o Lakepa-Toi Niue, e dua na ivavakoso lailai ni Lotu i Jisu Karisito ni Yalododonu Edaidai mai na nodra yanuyanu mera lai sokalou vata ena Valetabu e Hamilton Niu Siladi ena Janueri ni 2023.

Era a maroroi ilavo na tamata yadua kei na matavuvale, vakumuni ilavo, masumasu ka lolovaka me yaco na nodra ilakolako.

Era a vakaitavi talega ena dikevi ni tuva kawa ni matavuvale, ka sokumuni itukutuku ena vukudra e 120 na wekadra lomani era sa takali yani.

Ena loma ni valetabu, era a veisosomitaki na lewenilotu mai Niue ena vukudra na nodra daulomani mera ciqoma na nodra papitaiso kei na vei cakacaka vakalotu tabu tale eso ni valetabu.

E vakaraitaka na mataveilawa ni valetabu ni Lotu: “Na vunau ni cakacaka vakalotu ni veisosomitaki (cakacaka ena vukuna e dua) sa dau tiki tu ga ni kosipeli i Jisu Karisito. Na kena dina, na Nona Veisorovaki sa ikoya na cakacaka cecere duadua ni veisosomitaki ena itukutuku kei vuravura. Mai na Nona solibula, a vakayacora o Koya me baleta na tamata kecega na ka eda sega ni rawa nida vakayacora vakai keda ga. Ena Vukuna, era na tucaketale na tamata kecega. Na tamata kecega era na rogoca na kosipeli, ka na soli kina tamata kecega na madigi mera lesu rawa vei rau na noda iTubutubu Vakalomalagi.”¹

A kaya o Peresitedi Timothy Wilson, na iliuliu vakatawa ni Tabana o Lakepa-Toi Niue, “Esa dua dina na ka cecere meda raica e vuqa na noda lewe ni Tabana . . . nira sa vakayacora tiko na cakacaka tabu me baleti ira era sa takali yani.”

A vakuria, “Keimami vakila vakavoleka sara na neimami iVakabula o Jisu Karisito ena valetabu. E dua dina na veilaveti vakayalo vei au, vei ira na lewenilotu ena Tabana era sa yali tu vakadede mai na valetabu, ka vakakina vei ira na noda itabagone era se qai gole vakadua e valetabu.”

O Mereoni e yabaki 13 a gole vata kei tacina, o Karis, kei tubuna o Tapu Pihigia.

“Niu taubale yani kina matani valetabu, au vakila ni sa vaka mera sa takali yani na noqu leqa kei na nuiqawaqawa,” a kaya o Mereoni. “Au sa vakila na vakacegu.”

A vakuria o tubuna, “Sa sega ni cegu o rau na makubuqu ena nodrau talanoataka tiko na ilakolako oya ni rau sa lesu mai vale. Keimami na sega ni guilecava na ilakolako oqo kina valetabu.”

Era tukuna na Yalododonu Edaidai ni valetabu sa vanua tabu cecere duadua e vuravura ka vanua era vakasaqara kina me ra volekata na iVakabula ka sa vanua me tawamudu kina na veiwekani mareqeti vakavuvale.

O Peresitedi Alan Leuluai, e dua na lewe ni Mataveiliutaki ni Kaulotu e Niu Siladi Okaladi, a sota kei ira na itabagone ni bera na ilakolako lesu ki Niue.

A vakasalataki ira mera “nanuma tiko na veika era a vakila e valetabu.”

E vakatauvatana o Peresitedi Leuluai na valetabu kina Kalokalo kei Tevita a liutaki ira na tamata vuku vua na gonelailai na Karisito ka vakayaloqaqataki ira na itabagone mera vuku sara ka “vakatara na valetabu me nodra kalokalo, me dusimaka na nodra sala kina bula tawamudu.”

Era 11 na itabagone era tiki ni ilawalawa, era tiko tale ga kina na MST, Me iSakisaki ni iTabagone, e dua na koniferedi ni itabagone e qarava na Lotu ka vakayacori e Okaladi, Niu Siladi ena itekivu ni Janueri.