Kaligdong: Usa ka Kristohanong Hiyas

Ni Elder Jack N. Gerard

Sa Seventy

Ang pagpuyo og usa ka kinabuhi sa kaligdong nagkinahanglan kanato nga mahimong matinuoron ngadto sa Dios, ngadto sa usag usa, ug ngadto sa atong balaanong pagkatawo.

Sa kataposang mga oras sa pangalagad sa Manluluwas, miadto Siya ngadto sa Bukid sa mga Oliba diha sa usa ka tanaman nga gitawag og Getsemani ug gidapit ang Iyang mga disipulo nga maghulat.¹ Karon nag-inusara, Siya nag-ampo sa Iyang Amahan, “Kon buot ka, kuhaa kining kupa gikan kanako.”² Naghingutas, ang Iyang pag-antos nakapahimo Kaniya, “gani ang Dios, ang labing halangdon sa tanan, sa pagkurog tungod sa kasakit, ug sa pag-agas sa dugo sa matag lungag sa panit, … ug buot nga [Siya] unta dili moinom sa mapait nga kopa, ug mobiya.”³ Apan dinha nianang gutloa sa grabe nga kasubo, ang Manluluwas wala mobiya apan “nakaambit ug nakahuman sa [Iyang] mga pagpangandam alang sa mga katawhan.”⁴

Isip ang Bugtong Anak sa Amahan, si Jesukristo adunay gahom batok sa kamatayon, kasakit, ug pag-antos apan wala mobiya. Gituman Niya ang pakigsaad nga Iyang gihimo ngadto sa Iyang Amahan ug, sa pagbuhat sa ingon, mipakita og Kristohanon nga hiyas nga nagkadako ang importansiya sa kalibotan diin kita nagpuyo—ang hiyas sa kaligdong. Nagpabilin Siyang matinuoron ngadto sa Dios, sa matag usa kanato, ug sa Iyang balaanon nga pagkatawo.

Kaligdong

Si Jesukristo mao ang atong Ehemplo. Ang pagpuyo og usa ka kinabuhi sa kaligdong nagkinahanglan kanato nga mahimong matinuoron ngadto sa Dios, ngadto sa usag usa, ug ngadto sa atong balaanong pagkatawo. Ang kaligdong naggikan sa unang dakong sugo sa paghigugma sa Dios. Tungod kay nahigugma kamo sa Dios, matinud-anon kamo Kaniya sa tanang higayon. Nakasabot kamo nga adunay husto ug sayop ug nga adunay hingpit nga kamatuoran—ang kamatuoran sa Dios. Ang kaligdong nagpasabot nga dili ninyo paubsan ang inyong mga sumbanan o kinaiya aron makapadani o mahimong dawaton sa uban.⁵ Kamo “[mobuhat] gyod kon unsa ang matarong” ug “bisan unsa pay mahitabo.”⁶ Ang bag-ohay lang nga mga pag-usab ngadto sa Isangyaw ang Akong Ebanghelyo nga manwal sa misyonaryo pihong midugang sa kaligdong isip usa ka Kristohanon nga hiyas.⁷

Pipila ka tuig kaniadto, gitudlo si Elder Uchtdorf sa pag-organisar og usab sa among stake. Atol sa among interbiyo, nangutana siya kanako og usa ka pangutana nga wala nako malimti: “Aduna bay bisan unsa sa imong kinabuhi nga, kon ipakita ngadto sa publiko, mahimong usa ka kaulawan kanimo o sa Simbahan?” Nasorpresa, dali nakong girebyo ang akong mga binuhatan sa akong tibuok nga kinabuhi, misulay sa paghinumdom niadtong mga higayon sa dihang tingali ako nagkulang ug nangutana sa akong kaugalingon, “Kon ang uban nahibalo sa tanan nga akong nabuhat, unsa kaha ang ilang hunahunaon kanako o sa Simbahan?”

Nianang higayona, nagtuo ko nga si Elder Uchtdorf nangutana lamang mahitungod sa pagkatakos, apan akong nasabtan nga kadto usa gayod ka pangutana mahitungod sa kaligdong. Matinuoron ba ko sa unsay akong gituohan? Makakita ba ang kalibotan og pagkamakanunayon tali sa akong mga pulong ug sa akong mga buhat? Makakita ba ang uban sa Dios pinaagi sa akong gawi?

Si Presidente Spencer W. Kimball mitudlo, “Ang kaligdong” mao ang atong “pagkamauyunon ug abilidad sa pagsunod sa atong mga pagtuo og mga pasalig.”⁸

Matinuoron ngadto sa Dios

Ang usa ka kinabuhi sa kaligdong nagkinahanglan kanato nga una ug labing importante nga magmatinuoron ngadto sa Dios.

Gikan sa atong sayong pagkabata, atong nakat-onan ang istorya ni Daniel diha sa langob sa mga liyon. Si Daniel kanunayng matinuoron ngadto sa Dios. Ang iyang masinahon nga mga kauban “nangitag paagi nga ilang ikasumbong [siya]”⁹ ug nagmugna og usa ka kamandoan nga nagsugo og mga pag-ampo ngadto sa ilang mga dios lamang. Si Daniel nasayod sa kamandoan apan mipauli ug—“gipangablihan niya ang mga bentana”¹⁰—miluhod ug nag-ampo og katulo sa usa ka adlaw ngadto sa Dios sa Israel. Isip resulta, si Daniel gitambog ngadto sa langob sa mga liyon. Pagkabuntag, nakaplagan sa hari nga ang Dios ni Daniel miluwas kaniya ug mipagawas og bag-ong kamandoan nga ang tanan kinahanglan “moyukbo ug mosimba sa Dios ni Daniel: kay siya buhi nga Dios.”¹¹

Ang hari nahibalo sa Dios pinaagi sa kaligdong ni Daniel. Ang uban makakita sa Dios pinaagi sa atong—mga pulong ug mga buhat. Sama lang ni Daniel, ang pagkahimong matinuoron ngadto sa Dios mas molahi kanato gikan sa kalibotan.

Ang Manluluwas nagpahinumdom kanato, “Paantoson kamo sa kalibotan apan ayaw kahadlok kay nabuntog ko na ang kalibotan.”¹² Si Presidente Russell M. Nelson mitambag: “[Ang pagbuntog sa kalibotan] nagpasabot sa pagbuntog sa tintasyon sa labaw nga pag-atiman sa mga butang niini nga kalibotan kay sa mga butang sa Dios. Kini nagpasabot sa pagsalig sa doktrina ni Kristo labaw kay sa mga pilosopiya sa mga tawo.”¹³ Sa samang paagi, kinahanglan gayod nato nga batokan ang tintasyon nga maglakaw “sa [atong] kaugalingon nga paagi, ug sama sa hulagway sa [atong] kaugalingon nga dios, kansang hulagway sama sa kalibotan.”¹⁴

Ang katugbang nga bira niini nga kalibotan usa ka mahinungdanon nga bahin sa plano sa Dios sa kaluwasan. Sa unsang paagi kita motubag ngadto sa pagbira mao ang mahinungdanon kon kinsa kita—usa ka sukod sa atong kaligdong. Ang kalibotanong pagbira mahimong ingon ka direkta sa pagguba sa pagkamatinud-anon sa kaminyoon o ingon ka dili dayag sama sa pag-post og wala mailhi nga mga komento nga nagsaway sa doktrina o kultura sa Simbahan. Ang pagpakita og kaligdong diha sa atong mga pagpili usa ka makita nga pagpadayag sa kaugalingong pasalig sa pagsunod sa Manluluwas nga si Jesukristo.

Matinuoron ngadto sa Uban

Sama lang nga ang kaligdong naggikan sa unang dakong sugo sa paghigugma sa Dios, ang pagkahimong matinuoron ngadto sa usag usa naggikan sa ikaduha, sa paghigugma sa atong silingan sama sa atong kaugalingon. Ang usa ka kinabuhi sa kaligdong dili usa ka kinabuhi sa pagkahingpit; kini usa ka kinabuhi diin kita maningkamot kada adlaw nga labing importante nga mahimong matinuoron ngadto sa Dios ug diha niana nga konteksto mahimong matinuoron ngadto sa uban. Si Presidente Oaks mipahinumdom kanato, “Ang atong kadasig [sa] pagsunod sa ikaduhang sugo kinahanglan gayod nga dili makahimo kanato sa pagkalimot sa una.”¹⁵

Ang kalibotan mas nanglimbasog sa kaligdong pinaagi sa pagpahamtang og mga lagda o palisiya sa husto nga mga binuhatan nga nagdumala sa mga relasyon tali sa mga tawo ug mga institusyon. Samtang maayo, kini nga mga lagda sa kinatibuk-an wala nakabase sa hingpit nga kamatuoran ug kasagaran mausab base sa kultural nga pagdawat. Susama sa gipangutana ni Elder Uchtdorf, ang uban nga mga organisasyon nagbansay sa ilang mga empleyado sa pagkonsiderar kon unsa kaha ang ilang mga desisyon o proseso sa paghimo og desisyon kon imantala sa online o diha sa atubangang pahina sa usa ka dako nga mantalaan. Samtang ang Simbahan mogawas gikan sa kangiob ug kangitngit,¹⁶ kita, sama ni Daniel, kinahanglang mobuntog sa impluwensiya sa kalibotan ug mahimong representante sa tinuod ug buhi nga Dios sa tanang panahon ug sa tanang dapit.¹⁷

Ang pagsulti nga kita adunay kaligdong dili paigo kon ang atong mga aksiyon wala nahiuyon sa atong mga pulong. Sa samang paagi, ang Kristiyano nga kamabination dili usa ka puli alang sa kalidong. Isip usa ka katawhan sa pakigsaad, ug isip mga lider sa Iyang Simbahan, kita kinahanglan nga gawasnon sa bisan unsang pagpanaway ug nahiuyon ngadto sa mga sumbanan nga gitakda sa Ginoo.

Ang paglihok inubanan sa kaligdong makapalambo sa hugot nga pagtuo ug pagsalig ug mopaneguro sa uban nga kita nagtinguha lang sa paghimo sa kabubut-on sa Ginoo. Sa atong mga konseho, batokan nato ang impluwensiya sa kalibotan ug sundon ang gipadayag nga proseso sa Ginoo, sa pagtinguha og mga panabot gikan sa matag tawo ug molihok nga nahiuyon sa dinasig nga tambag nga nadawat.¹⁸

Ang atong pagtutok anaa sa Manluluwas, ug mainampingon kita sa paglikay sa mga aksiyon nga mahimong makita nga nag-alagad sa atong kaugalingon nga mga interes, nagbenepisyo sa atong pamilya, o nagpabor sa usa ka tawo nga makadaot sa laing tawo. Mohimo kita og espesyal nga paningkamot aron likayan ang bisan unsang panghunahuna nga ang atong mga aksiyon mahimong naimpluwensiyahan sa mga pasidungog sa mga tawo,¹⁹ aron makadawat og personal nga pag-ila, makamugna og mas daghang mga like, makutlo o mamantala.

Matinuoron ngadto sa Atong Balaanong Pagkatawo

Sa kataposan, ang usa ka kinabuhi sa kaligdong nagkinahanglan kanato nga magmatinuoron ngadto sa atong balaanong pagkatawo.

Nasayod kita og pipila nga wala magmatinuoron. Ang adunay piho nga kamahinungdanon mao ang anti-Kristo nga si Korihor, kinsa milingla sa mga kasingkasing sa daghang tawo, nagdani kanila sa ilang “hunahuna sa mga butang nga tawhanon.”²⁰ Apan, sa kataposan nga mga higayon sa iyang kinabuhi, siya mitug-an, “Ako sa kanunay nasayod nga adunay Dios.”²¹ Si Presidente Henry B. Eyring mitudlo nga ang pagpamakak “sukwahi ngadto sa kinaiya sa atong mga espiritu,”²² atong balaanong pagkatawo. Si Korihor miilad sa iyang kaugalingon, ug ang kamatuoran wala diha kaniya.²³

Agig kalainan, si Propeta Joseph Smith masaligong mipahayag, “Ako nasayod niini, ug ako nasayod nga ang Dios nasayod niini, ug ako dili makalimod niini.”²⁴

Ang igsoon nga lalaki ni Joseph nga si Hyrum gihigugma sa Ginoo “tungod sa kaligdong sa iyang kasingkasing.”²⁵ Siya ug si Joseph nagpabilin nga matinuoron hangtod sa kataposan—matinuoron ngadto sa ilang balaanong pagkatawo, sa kahayag ug kahibalo nga ilang nadawat, ug matinuoron ngadto sa tawo nga sila nasayod nga sila mamahimo.

Panapos

Hinaot nga kita mopakig-uli sa atong kaugalingon “ngadto sa kabubut-on sa Dios”²⁶ ug palamboon ang Kristohanon nga kinaiya sa kaligdong. Hinaot nga atong sundon ang atong Ehemplo, ang Manluluwas sa kalibotan, ug dili mobiya apan magpakabuhi nga matinuoron ngadto sa Dios, sa usag usa, ug sa atong balaanong pagkatawo.

Sama sa gisulti ni Job, “Mahimong timbangon ako sa Dios, ug makita niya nga ako dili sad-an.”²⁷ Sa sagradong ngalan ni Jesukristo, amen.