Elder Karl D. Hirst

Kinatibuk-ang Awtoridad nga Seventy

Si Elder Karl D. Hirst miisip sa iyang kaugalingon nga “usa ka ordinaryo nga tawo nga anaa sa usa ka dili ordinaryo nga calling.”

Ang bag-o nga Kinatibuk-ang Awtoridad nakakita sa iyang pagpamatuod ug sa mga kasinatian nga nagkompirma niini nga medyo ordinaryo usab. “Walay mga pagbisita sa langitnong mga binuhat, wala gayoy talagsaong espirituwal nga kasinatian—ug mihunong na ako nga mabalaka mahitungod niana tungod kay ako kontento ra kaayo sa paagi nga gipili sa Dios sa pagpamulong ngari kanako, bisan kon Siya mopili sa pagpamulong ngadto sa ubang tawo sa lahi nga paagi,” miingon si Elder Hirst. “Dili kini talagsaon, apan buhong.”

Ang amahan ni Elder Hirst, si Jack, adunay gamay nga shop sa eskina. Nakahibalo siya sa Ang Simbahan ni Jesukristo sa mga Santos sa Ulahing mga Adlaw pinaagi sa mga kustomer ug mipasakop sa Simbahan pipila ka tuig human matawo si Karl niadtong Pebrero 28, 1972, sa Bury, Lancashire, England.

Ang pagpamatuod ni Elder Hirst bahin ni Jesukristo nagsugod sa dihang iyang nakat-onan ang mga istorya sa Manluluwas ug mikanta og mga himno samtang nagtambong og Sunday School sa laing simbahan sa bata pa uban sa iyang inahan, si Vivien Ruth Meakin Hirst, ug sa lola.

Unya ang batan-ong Karl mitambong og mga miting sa Santos sa Ulahing mga Adlaw ug nakadawat og imbitasyon gikan sa usa ka magtutudlo sa Primary nga magpabunyag, nga iyang gidawat sa edad nga 10. Paglabay sa lima ka dekada sa kinabuhi, si Elder Hirst nakapadayon sa iyang sama sa bata nga hugot nga pagtuo ug pagpamatuod.

“Ang Dios nakapamulong ngari nako sa akong kasingkasing sa samang paagi nga Iyang gibuhat sa dihang ako anaa sa Primary ug sa samang paagi nga Iyang gibuhat sa dihang ako anaa sa Sunday School,” miingon si Elder Hirst.

Nakigminyo siya ni Claire Elizabeth Wright niadtong Mayo 29, 1993, sa Burnley, Lancashire. Unya naselyo sila nianang adlawa sa London England Temple.

Si Elder Hirst nakadawat og bachelor of law degree niadtong 1996 gikan sa Lancaster University ug master of business administration degree gikan sa Alliance Manchester Business School niadtong 2016. Sukad sa 1997, nagtrabaho siya isip usa ka manlalaban (abogado).

Ang mga ginikanan sa unom ka anak, ang mga Hirst nagpuyo sa Bolsover, Chesterfield, England, ug nagserbisyo nga mga direktor sa sesyon sa Alang sa Kalig-on sa mga Kabatan-onan sa panahon sa iyang tawag.