Elder Gregorio E. Casillas

Kinatibuk-ang Awtoridad nga Seventy

Si Gregorio Enrique Casillas natawo sa Tijuana, Baja California, Mexico, niadtong Agosto 26, 1975. Nagpuyo siya didto hangtod nagserbisyo siya isip full-time nga misyonaryo sa Mexico Tampico Mission.

Siya ug si Alma Angelina Obeso Gonzalez naselyo sa San Diego California Temple niadtong Hunyo 1999. Mga ginikanan sila sa tulo ka anak.

Sa wala pa maminyo ang duha, nagpuyo sila og 100 ka milya (161 ka kilometro) ang gilay-on sa usag usa samtang nag-eskwela siya sa Tijuana, ug si Alma nag-eskwela sa Mexicali. Sa mga bulan sa wala pa ang ilang kaminyoon, nag-ampo sila ug nagpuasa aron makahibalo asa mopuyo ug mosugod sa ilang pamilya. Si Elder Casillas nahinumdom sa iyang gibati gikan sa Espiritu Santo.

“Nahinumdom ko samtang kami nagpuasa, nakadungog nga miingon ang Ginoo, ‘Kon ang imong bukid mao ang La Rumorosa [usa ka dako nga bukid nga nahimutang tali sa duha ka siyudad], kuhaon Nako kini,’” miingon si Elder Casillas.

Miingon siya nga ang Ginoo mihawan sa dalan alang sa magtiayon aron makaadto sa Mexicali sa dihang ang unibersidad didto sa wala damha midawat kaniya isip usa ka mibalhin nga estudyante.

Sa Mexicali, “nahimamat namo ang mga tawo nga kinahanglan namong mahimamat. Ug kami nagserbisyo sa mga calling diin kami kinahanglan nga moserbisyo,” miingon siya.

Kini nga kasinatian nagpahimutang og sundanan alang sa ilang kinabuhi nga manag-uban. “Kon unahon nato ang Dios, ang tanang uban nga butang mapahimutang sa ilang lugar,” miingon si Elder Casillas. “Nagkinahanglan kini og gamay nga hugot nga pagtuo ug gamay nga aksiyon, ug dayon ang Ginoo motuyhad sa Iyang kamot sa pagpanalangin kanato.”

Si Elder Casillas nakaangkon og bachelor’s degree sa civil engineering gikan sa Universidad Autónoma de Baja California. Nakaangkon usab siya og master of business administration gikan sa Xochicalco University. Nakatrabaho siya sa pagdumala sa proyekto sa kontruksiyon ug karong bag-o lang isip usa ka manedyer sa mga pasilidad sa templo sa area alang sa Simbahan sa Mexico Area.

Si Elder Casillas nakaserbisyo isip usa ka Area Seventy, presidente sa misyon sa Mexico Mexico City South Mission, presidente sa stake, bishop, high councilor, presidente sa korum sa mga elder, ug presidente sa Young Men sa ward.