Brother Chad H Webb

Unang Magtatambag sa Kinatibuk-ang Kapangulohan sa Sunday School

Isip usa batan-ong lalaki, si Chad Webb nag-eskwela sa College of Eastern Utah (karon Utah State University Eastern) sa dihang nakasinati siya og importante nga espirituwal nga kasinatian nga nakapalig-on sa iyang pagpamatuod sa ebanghelyo. Kana nga kasinatian nagsugod sa usa ka tinguha sa pagpalig-on sa iyang pagtuo.

Tali sa paghimo sa buluhaton sa eskwelahan ug sa pagdula og basketball sa team sa kolehiyo, si Brother Webb mihimo sa pagtuon sa kasulatan, pag-ampo, ug pagpamalandong nga prayoridad samtang nag-andam siya nga moserbisyo og full-time nga misyon sa Veracruz, Mexico.

Usa ka mabugnaw nga gabii milakaw siya sa palibot sa Price, Utah, ug naghunahuna mahitungod sa tanan nga iyang nakat-onan. Ang langitnong giya miabot sa iyang pagsulod sa walay sulod nga parkinganan.

“Gibati nako nga ang tanang tubag sa akong mga pag-ampo ug mga pangutana miabot, ug gibati nako pag-ayo kon unsa ka tinuod ang ebanghelyo ug ang Simbahan,” miingon siya. “Kadto nga mga kamatuoran miabot uban sa hilabihan nga kaklaro sa akong hunahuna, uban sa pagbati nga ang Langitnong Amahan nakaila nako. Gibati nako ang Iyang gugma ug ang Iyang direksyon. Kadto mao ang usa sa unang dakong epekto nga mga kasinatian nga kinahanglan nga akong palig-onon ang akong pagpamatuod.”

Si Chad H Webb natawo sa Rexburg, Idaho, USA, niadtong Disyembre 18, 1964, ngadto nila ni Larry George Webb ug Paige Webb. Nagdako siya sa habagatang silangang Idaho ug naminyo kang Kristi Ann Bronson sa Logan Utah Temple niadtong Agosto 4, 1990. Nagpuyo sila sa Layton, Utah, USA, ug adunay unom ka anak.

Si Brother Webb migradwar sa Brigham Young University sa bachelor’s degree sa Spanish ug master’s degree sa pagpangulo ug mga pundasyon sa edukasyon. Mitudlo siya sa mga klase sa seminary sa Siyudad sa Salt Lake City ug mga klase sa institute didto sa Virginia ug Utah, mikoordinar sa mga programa sa institute sa Washington, D.C., ug midumala sa pagbansay ug pagpili sa mga magtutudlo sa seminary. Sukad sa 2008, nagserbisyo siya isip usa ka administrador sa Seminaries and Institutes of Religion.

Si Brother Webb gi-release isip presidente sa Layton Utah Valley View Stake sa wala pa ang iyang tawag. Ang miagi nga mga calling naglakip sa bishop, high councilor, ug presidente sa korum sa mga elder.