Ang Tuyo sa Dios Mao ang Pagdala Kaninyo Balik sa Panimalay

Ni Elder Patrick Kearon

Sa Korum sa Napulog Duha ka Apostoles

Ang tanang butang kabahin sa plano sa Amahan alang sa Iyang mga anak gituyo aron sa pagdala sa tanan balik sa panimalay.

Gusto ko nga mopadayag sa akong pasalamat alang sa inyong mga pag-ampo sa akong pagsugod sa proseso sa pagpahaom ngadto sa tawag, pinaagi ni Presidente Nelson, aron moserbisyo isip usa ka Apostol ni Ginoong Jesukristo. Tingali inyong mahanduraw og maayo kon unsa ka mapaubsanon ang bation niini, ug sa karon nga usa ka panahon sa dagkong mga kausaban ug makapahinuklog nga pagsusi sa kaugalingon. Hinoon, kini usa gayod ka dakong dungog nga makaserbisyo sa Manluluwas, sa bisan unsa nga kapasidad, ug ang makaapil uban kaninyo sa pagpakigbahin sa maayong balita sa Iyang ebanghelyo sa paglaom.

Lapas niana, gikaingon nga sa luyo sa matag bag-ong Apostol nagbarog ang usa ka nakugang nga ugangang babaye. Wala ko kahibalo kon nasulti ba gayod kana, apan niining kahimtanga, lagmit gayod. Sa akong suspetsa nga sa pagkatinuod nga ang akong ugangang babaye wala na uban kanamo walay mahimo sa pagpakunhod sa iyang kakugang.

Pipila ka bulan ang milabay, sa dihang ang akong asawa ug ako mibisita og laing nasod alang sa nagkadaiyang mga buluhaton sa Simbahan, usa ka buntag mimata ko og sayo ug naugtas nga nagtan-aw sa gawas gikan sa bintana sa among hotel. Sa ubos diha sa nagkaguliyang nga kalsada, nakita nako ang usa ka ali sa kalsada nga gipahimutang nga adunay nakabantay nga pulis aron pabalikon sa agi ang mga sakyanan kon sila moabot ngadto sa ali. Sa sinugdanan, gamay lang ang mga sakyanan ang mibiyahe subay sa kalsada ug gipabalik sa agi. Apan sa paglabay sa oras ug ang trapiko nagkadako na, ang linya sa mga sakyanan misugod na og kahuot.

Gikan sa bintana sa ibabaw, nagtan-aw ko samtang ang pulis ingon og nalingaw kutob sa iyang mahimo sa pagsanta sa dagan sa trapiko ug sa pag-abog sa mga tawo. Gani, siya ingon og nakaugmad og kaabtik sa iyang mga lakang, nga daw siya mosugod sa diyotayng pagsayaw, samtang ang matag sakyanan mipadulong sa ali. Kon ang usa ka drayber masagmuyo kabahin sa ali sa karsada, ang pulis ingon og dili matinabangon o masinabtanon. Nagsige lang siya og panglingo-lingo sa iyang ulo ug mitudlo sa sukwahi nga direksiyon.

Akong mga higala, akong mga isigka disipulo sa dalan sa mortal nga kinabuhi ang matahom nga plano sa atong Amahan, gani ang Iyang “talagsaon” kaayo nga plano,¹ gidisenyo sa pagdala kaninyo balik sa panimalay, dili ang pagpahilayo kaninyo.² Walay usa nga nagtukod og ali sa karsada ug nagbutang og usa ka tawo didto aron mopabalik kaninyo ug moabog kaninyo palayo. Sa pagkatinuod, ang nabali gayod hinuon kini. Ang Dios walay hunong sa pagtinguha kaninyo. “Gusto siya nga ang tanan Niya nga mga anak mopili sa pagbalik ngadto Kaniya,”³ ug Iyang gibuhat ang tanang posible nga paagi sa pagdala kaninyo og balik.

Ang atong mahigugmaon nga Amahan midumala sa Paglalang niini gayod nga yuta alang sa pagpadayag sa katuyoan sa paghatag og oportunidad alang kaninyo ug alang kanako nga makabaton og makapalambo nga mga kasinatian sa mortal nga kinabuhi, ang kahigayonan sa paggamit sa atong hinatag sa Dios nga moral nga kabubut-on sa pagpili Kaniya,⁴ aron makakat-on ug molambo, sa paghimo og mga sayop, sa paghinulsol, sa paghigugma sa Dios ug sa atong silingan, ug aron usa ka adlaw mobalik pauli ngadto Kaniya.

Iyang gipadala ang Iyang bililhong Pinalangga nga Anak ngadto niining napukan nga kalibotan aron magpakabuhi sa hingpit nga tawhanong kasinatian, aron sa paghatag og usa ka ehemplo aron masunod sa tanan Niyang mga anak, ug sa pag-ula ug pagtubos. Ang dakong gasa sa pag-ula ni Kristo nagtangtang sa matag ali sa karsada sa pisikal ug espirituwal nga kamatayon nga mopahimulag kanato gikan sa atong mahangtoron nga panimalay.

Ang tanang butang kabahin sa plano sa Amahan alang sa Iyang mga anak gituyo aron sa pagdala sa tanan balik sa panimalay.

Unsa man ang gitawag sa mga mensahero sa Dios, sa Iyang mga propeta, niini nga plano diha sa kasulatan sa Pagpahiuli? Sila mitawag niini nga ang plano sa katubsanan,⁵ ang plano sa kaluoy,⁶ ang dakong plano sa kalipay,⁷ ug ang plano sa kaluwasan ngadto sa tanan, “pinaagi sa dugo sa akong Bugtong Anak.”⁸

Ang tuyo sa mahinungdanong plano sa kalipay sa Amahan mao ang atong kalipay, dinhi, karon, ug sa kahangtoran. Dili kini ang pagpugong sa inyong kalipay ug makapahimo hinoon kaninyo nga mabalaka ug mahadlok.

Ang tuyo sa plano sa katubsanan sa Amahan sa pagkatinuod mao ang atong katubsanan, ang pagkaluwas nato pinaagi sa mga pag-antos ug sa kamatayon ni Jesukristo,⁹ gilingkawas gikan sa pagkabihag sa sala ug kamatayon. Dili mobiya kaninyo kon unsa kamo.

Ang tuyo sa plano sa kaluoy sa Amahan mao ang paglugway sa kaluoy kon kamo mobalik ngadto Kaniya ug motahod sa inyong pakigsaad sa pagkamaunungon ngadto Kaniya. Dili ang paghikaw sa kaluoy ug pagpahamtang og kasakit ug kaguol.

Ang tuyo sa plano sa Amahan bahin sa kalipay mao sa pagkatinuod ang atong kaluwasan diha sa celestial nga gingharian samtang kita modawat “sa pagpamatuod ni Jesus”¹⁰ ug motanyag sa atong tibuok nga mga kalag ngadto Kaniya.¹¹ Dili tuyo ang pagpugong kaninyo sa pagsulod sa celestial nga gingharian.

Nagpasabot ba kini nga ang bisan unsang butang mahimo ra kon giunsa nato sa pagpakabuhi? Nga ang paagi nga atong gigamit ang atong kabubut-on dili importante? Nga kita makadawat o makabiya sa mga sugo sa Dios? Dili, siyempre dili. Sigurado nga usa sa labing makanunayon nga mga imbitasyon ug pangamuyo ni Jesus atol sa Iyang mortal nga pagpangalagad mao nga kita mousab ug maghinulsol ug moduol ngadto Kaniya.¹² Sa sukaranan nga gipasabot sa tanan Niyang mga pagtulon-an nga magpuyo sa mas taas nga kahimtang sa moral nga pamatasan¹³ mao ang usa ka tawag sa personal nga kauswagan, sa makausab nga hugot nga pagtuo diha ni Kristo, ngadto sa usa ka dakong kausaban sa kasingkasing.¹⁴

Gusto sa Dios nga atong usbon gayod ang atong kahakog ug mapagarbohon nga mga panghunahuna, dili na mopadala sa impluwensiya sa kinaiyanhon nga tawo,¹⁵ nga kita “[mo]lakaw, ug [dili] na [m]agpakasala.”¹⁶

Kon kita motuo sa tuyo sa plano sa Amahan alang sa tanan nga mao ang pagluwas kanato, pagtubos kanato, paglugway sa kaluoy ngari kanato, ug sa ingon modala kanato og kalipay, unsa man ang tuyo sa Anak kinsa mipahinabo niining dakong plano?

Ang Anak misulti kanato Mismo: “Kay nanaog ako gikan sa langit dili aron pagbuhat sa akong kaugalingong kabubut-on kon dili aron pagbuhat sa kabubut-on sa nagpadala kanako.”¹⁷

Ang kabubut-on ni Jesus mao ang mabinationg kabubut-on sa Amahan! Gusto Siya nga mahimo kining posible alang sa tanang anak sa Iyang Amahan nga makadawat sa kinadak-ang tumong sa plano—kinabuhing dayon uban Kanila. Walay usa ka tawo nga dili apil gikan niining balaan nga potensiyal.

Kon kamo may kalagmitan nga mabalaka nga kamo dili gyod igo, o nga ang mahigugmaon nga walay kinutoban nga Pag-ula ni Kristo maloloy-ong moabot ni bisan kinsa pa, apan dili diha ninyo, nan kamo nasayop sa pagsabot. Ang Walay kinutoban nagpasabot nga hangtod sa hangtod. Ang Walay kinutoban moabot kanimo ug niadtong imong gihigugma.¹⁸

Gipasabot ni Nephi kining matahom nga kamatuoran: “Siya dili mohimo og bisan unsa gawas lang kon kini alang sa kaayohan sa kalibotan; kay gihigugma niya ang kalibotan, gani gitugyan niya ang iyang kaugalingong kinabuhi aron iyang madani ang tanang katawhan ngadto kaniya. Busa, siya walay gisugo nga sila dili moambit sa iyang kaluwasan.”¹⁹

Ang Manluluwas, ang Maayo nga Magbalantay, mangita sa Iyang nawala nga karnero hangtod nga kini Iyang makit-an.²⁰ “Dili siya buot nga may usa nga malaglag.”²¹

“Ang akong bukton sa kaluoy gitunol nganha kaninyo, ug kinsa kadto nga moduol Ako modawat kaniya.”²²

“Aduna ba kamo dihay mga masakiton? Dad-a sila ngari. Aduna ba kamo dihay mga bakol, o mga buta, o mga pungkol, o mga angol, o mga sanglahon, o mga dili makalihok, o kadto nga mga bungol, o kadto nga gitakboyan sa tanan nga mga matang sa sakit? Dad-a sila ngari ug Ako moayo kanila, kay Ako adunay kaluoy diha kaninyo.”²³

Wala Siya mipapahawa sa usa ka babaye nga adunay talinugo; wala Siya misibog sa mga sanlahon; wala Siya misalikway sa babaye nga gidala tungod sa pagpanapaw; wala Siya mibalibad sa mahinulsolon—dili igsapayan sa ilang sala. Ug Siya dili mobalibad kaninyo o niadtong inyong gihigugma kon kamo modala ngadto Kaniya sa inyong masulub-on nga mga kasingkasing ug mahinulsolon nga mga espiritu. Kana dili mao ang Iyang tuyo o ang Iyang tumong, ni ang Iyang plano, katuyoan, pangandoy, o paglaom.

Dili, Siya wala magbutang og mga babag ug mga ali; gitangtang Niya kini. Siya wala magpugong kaninyo; Siya nag-abiabi kaninyo pasulod.²⁴ Ang Iyang tibuok nga pagpangalagad mao ang usa ka buhi nga pamahayag niini nga tumong.

Dayon siyempre anaa ang Iyang maulaon nga sakripisyo mismo, nga mas lisod sabton kanato, lapas sa atong mortal nga kapasidad sa pagsabot. Apan, ug kini usa ka importante nga “apan,” atong nasabtan, ang balaan, makaluwas nga tumong sa Iyang maulaon nga sakripisyo.

Ang tabil sa templo nagisi sa dihang namatay si Jesus sa krus, nagsimbolo nga ang agianan balik ngadto sa presensiya sa Amahan halapad nga mibukas—ngadto sa tanan kinsa mobalik ngadto Kaniya, mosalig Kaniya, mobutang sa ilang palas-anon diha Kaniya, ug modala sa Iyang yugo diha kanila pinaagi sa bugkos sa pakigsaad.²⁵

Sa laing pagkasulti, ang plano sa Amahan dili kabahin sa mga ali sa karsada. Dili gayod sukad; kini dili gayod mahitabo. Aduna bay mga butang nga gikinahanglan natong buhaton, mga kasugoan nga tumanon, mga aspeto sa atong kinaiyahan nga usbon? Oo. Apan uban sa Iyang grasya, kadto makab-ot ra nato, dili lapas sa atong maabot.

Kini ang maayong balita! Dili igo ang akong pulong sa pagkamapasalamaton alang niining yano nga mga kamatuoran. Ang desinyo sa Amahan, ang Iyang plano, ang Iyang tuyo, ang Iyang tumong, ang Iyang gipangandoy, ug ang Iyang gilaoman ang tanan aron mamaayo kamo, ang tanan aron paghatag kaninyo og kalinaw, ang tanan aron pagdala kaninyo balik sa panimalay. Niini ako mopamatuod sa ngalan ni Jesukristo, Iyang Anak, amen.