Mga Pakigsaad ug mga Responsibilidad
Ang Simbahan ni Jesukristo nailhan isip usa ka simbahan nga naghatag og gibug-aton sa paghimo og mga pakigsaad uban sa Dios.
“Sa unsa nga paagi nga ang inyong Simbahan lahi sa uban?” Ang akong tubag niining importante nga pangutana nagkadaiya samtang ako nagkahingkod ug samtang ang Simbahan naglambo. Sa dihang natawo ko sa Utah niadtong 1932, mga 700,000 lang ang mga miyembro sa atong Simbahan, nga nagkatag kasagaran sa Utah ug sa duol nga mga estado. Niadtong higayona, kita adunay 7 lang ka templo. Karon ang mga miyembro sa Ang Simbahan ni Jesukristo sa mga Santos sa Ulahing mga Adlaw molabaw na sa 17 ka milyon sa mga 170 ka nasod. Niining Abril 1, kita adunay 189 ka gipahinungod nga mga templo sa daghang nasod ug 146 pa nga giplano ug gitukod. Gibati nako nga mamulong mahitungod sa katuyoan niini nga mga templo ug ang kasaysayan ug tahas sa mga pakigsaad sa atong pagsimba. Makadugang kini sa dinasig nga mga pagtulon-an sa nag-unang mga mamumulong.
I.
Ang usa ka pakigsaad mao ang pasalig sa pagtuman sa piho nga mga responsibilidad. Ang personal nga mga pasalig importante sa regulasyon sa atong tinagsa-tagsa nga kinabuhi ug sa regular nga paglihok sa katilingban. Kini nga ideya sa kasamtangan gihagit. Usa ka nagreklamo nga gamayng pundok supak sa awtoridad sa institusyon ug miinsister nga ang mga tawo kinahanglan nga gawasnon gikan sa bisan unsang mga restriksiyon nga nagpugong sa ilang indibidwal nga kagawasan. Apan nasayod kita gikan sa liboan ka tuig nga kasinatian nga ang mga tawo mosalikway sa tinagsa-tagsa nga kagawasan sa pag-angkon og mga bintaha sa pagpakabuhi sa organisado nga mga komunidad. Ang maong pagbiya sa indibidwal nga kagawasan kasagaran gibase sa mga pasalig o mga pakigsaad, gipadayag man o wala ipadayag.
Ania ang pipila ka ehemplo sa palakaw sa mga responsibilidad sa pakigsaad sa atong katilingban: (1) mga maghuhukom, (2) kasundalohan, (3) mga kawani sa medikal, ug (4) mga bombero. Kadtong tanan nga naapil niining pamilyar nga mga trabaho mohimo og pasalig—kasagaran gihimong pormal pinaagi sa panumpa o pakigsaad—sa pagpahigayon sa gisangon kanila nga mga katungdanan. Tinuod usab kini sa atong full-time nga mga misyonaryo. Ang ilang lahi nga sininaan o mga name tag gituyo sa pagpaila nga ang nagsul-ob ubos sa pakigsaad ug busa adunay katungdanan sa pagtudlo ug pagserbisyo ug kinahanglang suportahan niana nga pagserbisyo. Usa ka may labot nga katuyoan mao ang pagpahinumdom niadtong mga tigsul-ob sa ilang mga responsibilidad sa pakigsaad. Walay magic sa ilang klaro nga lahi nga sinina o mga simbolo, usa lang ka gikinahanglan o makatabang nga pagpahinumdom sa espesyal nga mga responsibilidad nga giasumir sa mga tigsul-ob. Kini tinuod usab sa mga simbolo sa mga singsing sa kasal ug ang tahas niini sa pagpahibalo sa mga tig-obserbar o pagpahinumdom sa mga tigsul-ob sa ilang mga gipakigsaad nga responsibilidad.
II.
Unsay akong gisulti mahitungod sa mga pakigsaad nga usa ka pundasyon alang sa regulasyon sa tinagsa-tagsang kinabuhi magamit ilabi na sa relihiyoso nga mga pakigsaad. Ang pundasyon ug kasaysayan sa daghang relihiyoso nga mga pagpasakop ug mga kinahanglanon gibase sa mga pakigsaad. Pananglitan, ang pakigsaad ni Abraham mao ang sukaranan sa daghang importante nga relihiyoso nga mga tradisyon. Kini nagtudlo sa balaan nga ideya sa mga pakigsaad sa Dios nga gisaad alang sa Iyang mga anak. Ang Daang Tugon kanunay naghisgot sa usa ka pakigsaad tali sa Dios ug ni Abraham ug sa iyang kaliwat.1
Ang unang bahin sa Basahon ni Mormon, nga gisulat atol sa panahon sa Daang Tugon, klarong nagpakita sa tahas sa mga pakigsaad diha sa kasaysayan ug pagsimba sa Israelita. Gisultihan si Nephi nga ang mga sinulat sa Israelita nianang panahona mao ang “usa ka rekord sa mga Judeo, nga naglakip sa mga pakigsaad sa Ginoo, nga iyang gihimo sa balay ni Israel.”2 Ang basahon ni Nephi naghisgot usab kanunay sa pakigsaad ni Abraham3 ug ni Israel isip “ang katawhan sa pakigsaad sa Ginoo.”4 Ang paghimo og pakigsaad uban sa Dios o sa relihiyoso nga mga lider narekord usab diha sa mga sinulat sa Basahon ni Mormon mahitungod ni Nephi, Jose sa Ehipto, Hari Benjamin, Alma, ug Kapitan Moroni.5
III.
Sa dihang ang panahon miabot alang sa Pagpahiuli sa kahingpitan sa ebanghelyo ni Jesukristo, ang Dios mitawag og usa ka propeta, si Joseph Smith. Wala kita makahibalo sa hingpit sa unang mga instruksiyon ni anghel Moroni ngadto niining nagkahingkod nga batan-ong propeta. Nakahibalo kita nga iyang gisultihan si Joseph nga ang “Dios adunay ipabuhat [kaniya]” ug nga “ang kahingpitan sa walay kataposan nga Ebanghelyo” kinahanglan nga pagadad-on, lakip “sa mga saad nga gihimo ngadto sa mga amahan.”6 Kita nasayod usab nga ang mga kasulatan nga gibasa pag-ayo sa batan-ong Joseph—bisan sa wala pa siya sugoa sa pag-organisar og simbahan—mao ang daghan nga pagtulon-an mahitungod sa mga pakigsaad nga iyang gihubad diha sa Basahon ni Mormon. Ang basahon mao ang dakong tinubdan sa kahingpitan sa ebanghelyo, lakip sa plano sa Dios alang sa Iyang mga anak, ug ang Basahon ni Mormon puno sa mga pakisayran sa mga pakigsaad.
Sa pagkahimasa kaayo sa Biblia, seguradong si Joseph nakahibalo sa gihisgotan sa basahon sa Mga Hebreo sa tumong sa Manluluwas sa “[p]aghimog bag-ong kasabotan tali sa katawhan sa Israel ug sa banay ni Juda.”7 Ang mga Hebreo nagpasabot usab nga si Jesus mao “ang tigpataliwala sa bag-ong kasabotan.”8 Sa mahinungdanong paagi, ang asoy sa biblia bahin sa mortal nga pangalagad sa Manluluwas nga giulohan og “Ang Bag-ong Tugon,” usa ka praktikal nga laing pulong alang sa “Ang Bag-ong Pakigsaad.”
Ang mga pakigsaad mao ang pundasyon diha sa Pagpahiuli sa ebanghelyo. Klaro kini sa labing unang mga lakang sa Ginoo nga nagsugo sa Propeta sa pag-organisar sa Iyang Simbahan. Sa dihang ang Basahon ni Mormon gimantala, ang Ginoo migiya sa organisasyon sa Iyang gipahiuli nga Simbahan, sa wala madugay ginganlan og Ang Simbahan ni Jesukristo sa mga Santos sa Ulahing mga Adlaw.9 Ang pagpadayag nga gihatag niadtong Abril 1830 nagsugo nga ang tawo “dawaton pinaagi sa bunyag ngadto sa iyang simbahan” human sila “mosaksi” (nga nagpasabot nga ligdong nga mopamatuod) “nga sila tinuod nga naghinulsol sa tanan nilang mga sala, ug andam nga modala diha kanila sa ngalan ni Jesukristo, nga adunay determinasyon sa pag-alagad kaniya hangtod sa kataposan.”10
Kining sama nga pagpadayag nagsugo nga ang Simbahan “magtigom kanunay aron sa pag-ambit sa pan ug bino [tubig] agi og handumanan sa Ginoo nga si Jesus.” Ang kaimportante niini nga ordinansa klaro diha sa mga pulong sa pakigsaad nga alang gayod sa mga elder o priest nga mopahigayon. Siya mopanalangin sa mga simbolo sa pan alang “sa mga kalag sa tanan niadto kinsa moambit …, nga sila … mosaksi nganha kanimo, O Dios, ang Amahan sa Kahangtoran, nga sila andam sa pagdala nganha kanila sa ngalan sa imong Anak, ug sa kanunay mohinumdom kaniya ug maghupot sa iyang mga sugo diin siya mihatag kanila.”11
Ang importante nga tahas sa mga pakigsaad sa bag-ong gipahiuli nga Simbahan gimatud-an og usab diha sa pasiuna nga gihatag sa Ginoo alang sa unang gimantala sa Iyang mga pagpadayag. Diha ang Ginoo nagpahayag nga Siya mitawag ni Joseph Smith tungod kay ang mga lumulupyo sa yuta “nahisalaag gikan sa akong mga ordinansa, ug gilapas ang akong walay kataposan nga pakigsaad.”12 Ang pagpadayag dugang nagpasabot nga ang Iyang mga sugo gihatag “nga ang akong walay kataposan nga pakigsaad unta mapahimutang.”13
Karon kita nakasabot sa tahas sa mga pakigsaad sa gipahiuli nga Simbahan ug sa pagsimba sa mga miyembro niini. Si Presidente Gordon B. Hinckley mihatag niini nga katingbanan sa epekto sa atong bunyag ug sa atong senimana nga pag-ambit sa sakramento: “Ang matag miyembro niini nga simbahan nga misulod sa mga tubig sa bunyag naapil sa sagrado nga pakigsaad. Matag higayon nga kita moambit sa sakramento sa panihapon sa Ginoo, gibag-o nato kana nga pakigsaad.”14
Kita gipahinumdoman sa daghang mamumulong nga si Presidente Russell M. Nelson, kanunay nga mopasabot ngadto sa plano sa kaluwasan nga ang “dalan sa pakigsaad” nga “mogiya nato balik ngadto sa [Dios]” ug “mahitungod gayod sa atong relasyon uban sa Dios.”15 Siya nagtudlo mahitungod sa kaimportante sa mga pakigsaad sa atong mga seremonya sa templo ug nag-awhag nato sa pagtan-aw sa kataposan gikan sa sinugdanan ug sa “paghunahuna og celestial.”16
IV.
Karon ako mamulong pa mahitungod sa mga pakigsaad sa templo. Agi og katumanan sa iyang responsibilidad sa pagpahiuli sa kahingpitan sa ebanghelyo ni Jesukristo, si Propeta Joseph Smith migahin sa iyang kataposang mga tuig sa pagdumala sa pagtukod sa templo sa Nauvoo, Illinois. Pinaagi kaniya ang Ginoo mipadayag sa sagrado nga mga butang, doktrina, ug mga pakigsaad alang sa iyang mga sumusunod nga ipangalagad sulod sa mga templo. Didto ang mga tawo nga gitugahan tudloan sa plano sa Dios sa kaluwasan ug dapiton sa paghimo og sagrado nga mga pakigsaad. Kadtong nagpuyo nga matinud-anon niadto nga mga pakigsaad gisaaran og kinabuhing dayon, diin ang “tanan nga mga butang ila” ug sila “magpuyo sa atubangan sa Dios ug sa iyang Kristo hangtod sa kahangtoran.”17
Ang mga seremonya sa pagtuga sa Templo sa Nauvoo gipangalagad sa wala pa papahawaa ang atong unang mga pioneer aron sugdan ang ilang makasaysayanong pagbaktas sa hilit nga mga kabukiran sa Kasadpan. Kita adunay daghang pagpamatuod gikan niadtong mga pioneer nga ang gahom nga ilang nadawat tungod sa pagkabugkos ngadto ni Kristo pinaagi sa ilang pagtuga sa Templo sa Nauvoo nakahatag nila og kusog sa paghimo sa lisod kaayo nga panaw ug pag-establisar sa ilang mga kaugalingon didto sa Kasadpan.18
Ang mga tawo nga natugahan sulod sa balaan nga mga templo responsable nga magsul-ob sa garment sa templo, piraso sa sinina nga dili makita tungod kay isul-ob kini sa ilawom sa sinina sa gawas. Magpahinumdom kini sa natugahan nga mga miyembro sa sagrado nga mga pakigsaad nga ilang gihimo ug sa mga panalangin nga ilang gisaad sulod sa balaan nga templo. Aron makab-ot kadtong balaan nga mga katuyoan, kita gisugo nga ipadayon ang pagsul-ob sa mga garment sa templo, gawas lang sa higayon nga klaro kaayo nga mga eksepsiyon. Tungod kay ang mga pakigsaad “walay hunong,” ang paghubo sa mga garment mahimong sabton nga pagsalikway sa mga responsibilidad ug mga panalangin nga kalabot niini. Sa pagtandi, ang mga tawo nga mosul-ob sa ilang garment sa matinud-anong paagi ug motuman sa ilang mga pakigsaad sa templo nagpadayon sa pag-ila sa ilang tahas isip mga disipulo ni Ginoong Jesukristo.
Ang Simbahan ni Jesukristo sa mga Santos sa Ulahing mga Adlaw nagtukod og mga templo sa tibuok kalibotan. Ang katuyoan niini mao ang pagpanalangin sa mga anak sa pakigsaad sa Dios nga mosimba sa templo ug adunay sagrado nga mga responsibilidad ug gahom ug talagsaong mga panalangin nga mabugkos ngadto ni Kristo nga ilang madawat pinaagi sa pakigsaad.
Ang Simbahan ni Jesukristo nailhan isip usa ka simbahan nga naghatag og gibug-aton sa paghimo og mga pakigsaad uban sa Dios. Ang mga pakigsaad anaa sa matag ordinansa sa kaluwasan ug kahimayaan nga gipangalagad niining gipahiuli nga Simbahan. Ang ordinansa sa bunyag ug ang kauban nga mga pakigsaad mga kinahanglanon alang sa pagsulod ngadto sa celestial nga gingharian. Ang mga ordinansa ug ang kaubang mga pakigsaad sa templo mga kinahanglanon alang sa kahimayaan sa celestial nga gingharian, nga mao ang kinabuhing dayon, “ang labing mahinungdanon sa tanang mga gasa sa Dios.”19 Kana mao ang gitutokan sa Ang Simbahan ni Jesukristo sa mga Santos sa Ulahing mga Adlaw.
Ako mopamatuod nga si Jesukristo, kinsa mao ang pangulo niana nga Simbahan, ug mohatag sa Iyang mga panalangin sa tanan nga magtinguha sa pagtuman sa ilang sagrado nga mga pakigsaad. Sa ngalan ni Jesukristo, amen.