Elder Sergio R. Vargas

Kinatibuk-ang Awtoridad nga Seventy

Sa dihang si Elder Sergio R. Vargas nahigugma ni Andrea Sanchez, nagtuo siya nga aduna na siyay yanong solusyon sa ilang mga panaglahi sa relihiyon: sila magpakasal sa iyang simbahan alang sa iyang pamilya ug laing kasal sa simbahan ni Andrea alang sa iyang pamilya.

Pero, nahibaloan dayon niya, nga ang pagbuhat niana dili ingon niana ka sayon. Si Andrea usa ka miyembro sa Ang Simbahan ni Jesukristo sa mga Santos sa Ulahing mga Adlaw, ug siya gusto og kaminyoon sa templo. Mao nga gidapit siya ni Andrea nga magkat-on pa mahitungod sa iyang tinuohan gikan sa mga misyonaryo.

Si Elder Vargas midawat sa imbitasyon, nga nakapausab sa iyang kinabuhi.

Nakahinumdom siya nga nagtrabaho sa kompaniya sa salmon nianang higayona, nagtabang sa pagbiyahe sa buhi nga isda gikan sa dagat. Atol sa 25 ka oras nga biyahe, nakakita siya og pribado nga lugar aron magbasa sa Basahon ni Mormon ug nangutana sa Langitnong Amahan mahitungod sa ebanghelyo. Kadto mao ang espirituwal nga panahon sa kausaban.

Si Elder Vargas natawo niadtong Nobiyembre 2, 1976, sa Puerto Varas, Chile, diin siya ug ang iyang duha ka igsoon gipadako. Ang iyang inahan, nga si Gladys Barria, miatiman sa panimalay samtang ang iyang amahan, Renato Vargas, miatiman sa kalinaw isip usa ka opisyal sa pulis. Bisan pa sa panagkita sa mga misyonaryo sa batan-on pa, mas interesado siya sa pagdula og basketball kaysa sa pagkat-on sa ebanghelyo.

Wala kini mahitabo hangtod nga si Elder Vargas nakahimamat ni Sister Vargas nga siya andam na nga maminaw sa mga misyonaryo uban ang bukas nga hunahuna ug kasingkasing, miingon siya. Naminyo sila niadtong Hulyo 6, 2003, ug unya naselyo sa Santiago Chile Temple. Ang magtiayon adunay tulo ka anak.

Sa dihang gitawag isip usa ka Kinatibuk-ang Awtoridad nga Seventy, si Elder Vargas nagserbisyo isip usa ka Area Seventy sa South America South Area. Ang iyang mga calling kaniadto sa Simbahan naglakip sa high councilor, presidente sa branch, ug presidente sa stake.

Si Elder Vargas nakahuman og bachelor’s degree sa marine resources gikan sa Los Lagos University niadtong 1999 ug nakadawat og diploma sa business administration gikan sa Austral University niadtong 2002. Karong bag-o lang, nagtrabaho siya isip usa ka manedyer sa produksiyon ug sa mga kalihokan alang sa Ventisqueros, usa ka sakop sa German Schörghuber Corporate Group.