Elder Aroldo B. Cavalcante

Kinatibuk-ang Awtoridad nga Seventy

Sa imbitasyon sa usa ka ig-agaw, ang 18 anyos nga si Aroldo B. Cavalcante mitambong sa rehiyonal nga komperensiya niadtong 1988 nga giapilan ni Presidente Gordon B. Hinckley (1910–2008), nianang higayona nagserbisyo isip Unang Magtatambag sa Unang Kapangulohan.

“Gibati nako nga dunay gamhanan kaayong butang,” miingon siya. “Makita nako ang kahayag ni Presidente Hinckley.”

Bisan og siya nagsimba sulod sa misunod nga tulo ka tuig, wala siya mabunyagi. Usa ka adlaw ang mga misyonaryo nanuktok sa iyang pultahan. Naggunit sa ilang area book, gibasa nila unsa ang gisulat sa miaging mga misyonaryo mahitungod kaniya. Unsa ang nakapakurat kaniya mao ang kataposan nga kapahayag: “Dili siya gusto nga mopasalig ngadto ni Jesukristo.”

Miingon si Elder Cavalcante, “Nagtuo ko nga ako mapasaligon kaayo ngadto ni Jesukristo, ug kana nga linya emosyonal nga nakaapekto nako.”

Naghunahuna kon kana mao ba usab ang gihunahuna sa Manluluwas kaniya, nangutana siya, “Unsay akong buhaton aron mausab kini, Elders?’”

Ang mga misyonaryo misugod sa pagtudlo kaniya, ug ang 21 anyos nabunyagan paglabay sa 10 ka adlaw. Si Elder Cavalcante mapasaligon ngadto sa ebanghelyo sa Manluluwas sukad niana.

“Kini nga buhat dili mahitungod kanato. Mahitungod kini sa Manluluwas. Ug akong paningkamotan kutob sa akong mahimo alang Kaniya, dili alang kanako,” miingon si Elder Cavalcante.

Si Aroldo Barreto Cavalcante Filho natawo niadtong Nobiyembre 22, 1970, sa Fortaleza, Ceará, Brazil. Naselyo siya ngadto ni Christiana Ramalho Bezerra Leite sa Recife Brazil Temple niadtong Enero 21, 2004. Mga ginikanan sila sa upat ka anak.

Si Elder Cavalcante nakadawat og postgraduate degree sa administrative law gikan sa Federal University of Ceará niadtong 1997. Nagtrabaho siya isip usa ka abogado alang sa Procuradoria Geral do Município gikan sa 1997 hangtod 2005 ug isip tigdumalang kauban sa Barreto Cavalcante Advogados sukad 1999.

Sa wala pa ang iyang tawag isip Kinatibuk-ang Awtoridad nga Seventy, si Elder Cavalcante nagserbisyo isip presidente sa misyon sa Brazil. Nakaserbisyo usab siya isip Area Seventy, presidente sa stake, bishop, ug magtatambag sa bishopric.