“Elder Sandino Roman,” Liahona, Mayo 2024.
Elder Sandino Roman
Kinatibuk-ang Awtoridad nga Seventy
Gipaila ngadto ni Elder Sandino Roman ang ebanghelyo ni Jesukristo sa bata pa. Matag Dominggo ang usa ka higala sa iyang inahan midala kaniya ug sa iyang igsoong babaye aron makighimamat sa 15 ka laing mga miyembro sa Ang Simbahan ni Jesukristo sa mga Santos sa Ulahing mga Adlaw sa usa ka gamay nga meetinghouse sa Mexico.
Ang singko anyos nag-ampo matag adlaw nga ang iyang pamilya makabig ngadto sa ebanghelyo. Paglabay sa duha ka tuig, ang iyang inahan ug amahan nabunyagan. Usa ka tuig human niana, ang iyang amahan mibunyag kaniya. “Tungod niana nga rason, ako nakahibalo nga ang Ginoo maminaw sa mga pag-ampo sa mga bata,” miingon si Elder Roman.
Ang pagdawat sa ebanghelyo ug sa pagserbisyo sa Simbahan adunay makapausab nga epekto sa iyang pamilya. “Nakita nako ang kataposan nga resulta nga ikahatag sa ebanghelyo ngadto sa mga kinabuhi,” miingon si Elder Roman. “Nasayod ako nga makahatag kini og kalipay ug paglaom.”
Si Sandino Roman natawo niadtong Agosto 7, 1973, ngadto nila ni Lidia Corral ug Prometeo Roman sa Iguala, Guerrero, Mexico. Samtang nagdula sa team sa volleyball sa gipanag-iya sa Simbahan nga Benemérito de las Américas high school, nahimamat ni Roman si Guadalupe Villanueva Rojas. Naselyo sila sa Mexico City Mexico Temple niadtong Disyembre 19, 1998. Sila adunay upat ka anak.
Si Elder Roman nakadawat og bachelor of science degree sa computer systems gikan sa ITESM (ang Monterrey Institute of Technology and Higher Education) niadtong 2000 ug usa ka master of business administration gikan sa Brigham Young University niadtong 2006. Nagtrabaho siya isip usa ka marketing manager alang sa Johnson & Johnson ug alang sa Simbahan isip manedyer sa Mexico Area Support Services Office.
Sa panahon sa iyang tawag, siya ug ang iyang asawa nagserbisyo isip mga lider sa Ecuador Quito North Mission. Si Elder Roman nakaserbisyo usab isip usa ka Area Seventy, magtatambag sa kapangulohan sa stake, bishop, high councilor, ug presidente sa korum sa mga elder.
Miingon si Elder Roman nga ang iyang importante nga tumong sa kinabuhi, bisan asa siya moserbisyo, mao ang pag-angkon sa pagsalig sa Ginoo. “Gusto nako nga makahibalo Siya nga makasalig Siya kanako sa paghimo niini nga buhat,” miingon siya.