Elder D. Martin Goury

Kinatibuk-ang Awtoridad nga Seventy

Nagtubo sa gamay nga baryo sa Côte d’Ivoire, si Elder D. Martin Goury nangandoy nga mahimong usa ka espirituwal nga lider ug moserbisyo sa uban.

Niadtong Oktubre 1992, samtang didto sa London, England, nagkat-on og Iningles ug nag-eskwela, nahimamat niya ang mga misyonaryo sa mga Santos sa Ulahing mga Adlaw. Ang mga misyonaryo, usa nila mao ang bugtong lumad nga misyonaryo nga makasulti og French didto sa London, mihatag ni Elder Goury og kopya sa Basahon ni Mormon sa pinulongan nga French.

Gisugdan niya ang pagbasa sa basahon ug sa wala madugay nakadawat og pagsaksi sa kamatuoran niini. Sa dihang ang bag-ong paresan sa mga misyonaryo miadto sa iyang apartment paglabay sa pipila ka bulan, mipasakop siya sa Simbahan. “Nakahinumdom ko nga malipayon kaayo,” miingon siya.

Nadugangan ang iyang kalipay samtang ang mga misyonaryo mitudlo kaniya mahitungod sa pagkapari. “Gipasabot nila ang kahulogan sa pagkapari ug unsaon nako sa paggamit kana sa pagserbisyo sa ubang tawo. Alang nako, kadto ang akong pangandoy nga natuman,” miingon si Elder Goury. “Nahimuot ako.”

Si Dalébé Martin Goury natawo niadtong Enero 30, 1964, ngadto nila ni Yoro Goury Maurice ug Bame Gaby Odette. Nagtubo siya sa usa ka baryo nga gitawag og Lehipa ug sa mga siyudad sa Oume ug Gagnoa. Nakigminyo siya ni Ruth Simone Kennington sa London England Temple niadtong Abril 8, 1995. Nagpuyo sila sa Abidjan, Côte d’Ivoire, ug adunay upat ka anak.

Si Elder Goury nakakuha og mga bachelor’s degree sa pagtudlo gikan sa CAFOP (Animation and Educational Training Centers) de Man niadtong 1988 ug mechanical engineering gikan sa London South Bank University niadtong 1997. Nagtrabaho siya isip usa ka magtutudlo sa primary nga eskwelahan, enhinyero sa desenyo, senior nga manedyer sa proyekto ug direktor sa deputy project alang sa Cameron, kinatibuk-ang manedyer sa mga kalihokan sa Nigeria alang sa OneSubsea Services, ug manedyer sa mga kalihokan sa nasod alang sa Schlumberger. Karong bag-o, si Elder Goury nagtrabaho alang sa Simbahan isip usa ka lider ug koordinitor sa pagsuporta sa miyembro.

Nagserbisyo siya isip usa ka Area Seventy sa Africa West Area sa panahon sa iyang tawag. Nagserbisyo siya kaniadto isip presidente sa Benin Cotonou Mission, bishop, magtatambag sa bishopric, presidente sa branch, ug presidente sa korum sa mga elder.