Elder I. Raymond Egbo

Kinatibuk-ang Awtoridad nga Seventy

Samtang nag-eskwela ug nagpuyo siya sa relihiyoso nga eskwelahan sa Nigeria, ang magulang nga igsoong babaye ni Elder I. Raymond Egbo nagsige og imbitar niya nga “mouban ug motan-aw” unsa ang ikatanyag sa Ang Simbahn ni Jesukristo sa mga Santos sa Ulahing mga Adlaw. Sa edad nga 14 anyos, nagsugod siya sa pag-adto sa seminary magabii.

Samtang nagbasa sa kurso sa pagtuon sa seminary, si Elder Egbo miabot sa Doktrina ug mga Pakigsaad 135 ug sa pagpatay ni Joseph Smith.

“Adunay gamhanan nga butang ang nakapatandog nako, ug ako nasayod nga si Propeta Joseph Smith usa ka propeta sa Dios. Nasayod ko nga siya gipatay tungod sa kamatuoran,” miingon si Elder Egbo, kinsa sa wala madugay mipasakop sa Simbahan. “Gibati gihapon nako karon unsay akong gibati nianang adlawa sa dihang gibasa nako kini.”

Unya, samtang usa siya ka estudyante sa unibersidad, ang iyang igsoong babaye miawhag kaniya nga moserbisyo og misyon. Ang ilang amahan nasuko kaniya tungod sa pagbiya sa iyang pag-eskwela, apan si Elder Egbo kanunay nga misulat kaniya naghulagway sa tanan nga iyang gibuhat ug sa unsay iyang gitudlo.

Sa katingala ni Elder Egbo, sa hapit na matapos ang iyang misyon, ang iyang presidente sa misyon mibasa ngadto kaniya sa usa ka sulat gikan sa iyang amahan nga nag-ingon nga siya nabunyagan na. “Sultihi siya nga ako maghulat kaniya,” sulat sa iyang amahan.

Si Elder Idyo Raymond Egbo natawo sa Port Harcourt, Rivers State, Nigeria, niadtong Hunyo 25, 1974, ngadto nila ni Udo Idio Egbo ug Veronica Ukamaka Egbo. Nahimamat niya si Comfort Ikip Ese sa dihang ang iyang pamilya mibalhin ngadto sa iyang branch niadtong 1994. Naminyo sila niadtong Mayo 15, 2003, sa Calabar, Nigeria. Sila adunay tulo ka anak.

Si Elder Egbo adunay mga degree sa edukasyon, regional planning, ug business administration gikan sa tulo ka unibersidad. Nagtrabaho siya sa Seminaries and Institutes of Religion sukad sa 2002 sa nagkadaiya nga mga katungdanan, lakip isip usa ka direktor sa nasod ug direktor sa area.

Sa panahon sa iyang tawag, si Elder Egbo nagserbisyo isip usa ka Area Seventy sa Africa West Area. Nakaserbisyo siya isip presidente sa Nigeria Calabar Mission ug magtatambag sa kapangulohan sa stake ug high councilor. Miserbisyo siya og full-time nga misyon sa Nigeria Lagos Mission.