“Elder Christopher H. Kim,” Liahona, Mayo 2024.
Elder Christopher H. Kim
Kinatibuk-ang Awtoridad nga Seventy
Sa dihang si Elder Christopher H. Kim nag-edad og 14 anyos ug adunay kahigayonan nga mopakigbahin sa ebanghelyo ngadto sa mga higala, nakaamgo siya nga kinahanglan siyang makahibalo sa kamatuoran sa Basahon ni Mormon aron siya makapamulong uban ang kombiksyon.
“Samtang ako nag-ampo mahitungod sa Basahon ni Mormon, gibati nako ang makahupay sa kalag nga pagbati,” nahinumdom siya. “Ug sa kalit, wala nay bisan unsa nga pangutana o bisan unsa nga pagduhaduha mahitungod sa Basahon ni Mormon.” Sa unang higayon sa iyang kinabuhi, siya midugang, “Ako mibati gayod sa Espiritu, nakahibalo sa kamatuoran mahitungod sa Basahon ni Mormon, ug nakahibalo nga si Joseph Smith usa ka propeta sa Dios.”
Si Christopher Hyunsu Kim natawo niadtong Nobiyembre 18, 1965, sa Daegu, South Korea, ang kinamagulangan sa upat ka anak nila ni Chinho Kim ug Kuncha Kim. Ang iyang pamilya mipasakop sa Simbahan sa masuso pa siya. Si Elder Kim nagpuyo sa Daegu hangtod nakagradwar siya sa high school ug ang iyang pamilya mibalhin ngadto sa Estados Unidos, mipahimutang sa Habagtang bahin sa California.
Samtang nagserbisyo siya sa Washington Seattle Mission, si Sister Seongmi (Sue) Hong nagserbisyo sa California Los Angeles Mission. Samtang anaa didto, nakaila niya ang inahan ni Elder Kim. Unya, human makompleto ni Elder Kim ug Sister Hong ang ilang mga misyon, nagsugod sila sa pagpakig-date. Naminyo sila niadtong Disyembre 7, 1991, sa Los Angeles California Temple. Duna silay usa ka anak nga lalaki ug tulo ka anak nga babaye.
Si Elder Kim migradwar gikan sa Brigham Young University sa usa ka bachelor’s degree sa sociology niadtong 1995 ug usa ka master of business administration niadtong 1997. Human sa iyang pag-eskwela, nagtrabaho siya sa Estados Unidos, Thailand, ug South Korea. Sukad sa 2005, nagtrabaho siya sa Unicity International, nakabase sa Utah nga tigsuplay sa masustansyang mga produkto ug mga cosmetic, karong bag-o lang isip presidente sa mga merkado sa kalibotan, nagbase sa Seoul, South Korea.
Si Elder Kim nagserbisyo sukad 2019 isip usa ka Area Seventy. Nagserbisyo usab siya isip usa ka presidente sa stake, matatambag sa kapangulohan sa stake, presidente sa misyon sa stake, ug high councilor.