Agi og Suporta sa Nagtubo nga Henerasyon

Ni Brother Michael T. Nelson

Ikaduhang Magtatambag sa Kinatibuk-ang Kapangulohan sa Young Men

Ang mga pakigrelasyon sa mga kinabuhi sa kabatan-onan mao ang adunay labing dako nga impluwensya sa ilang mga pagpili.

Samtang nangandam sa pagpamulong kaninyo, nadala ako ngadto sa istorya mahitungod ni Helaman ug sa batan-ong mga anak sa katawhan ni Ammon. Akong gibati ang gahom sa mga propeta sa Basahon ni Mormon nga nagtudlo sa mga ginikanan, sa mga bishop ug sa mga miyembro sa ward nga nagtuon niini nga asoy.

Si Helaman usa ka tawo nga kasaligan sa batan-ong mga Ammonita. Siya ang nagtabang nila nga molambo ug mohingkod sa pagkamatarong. Nakaila sila ug nahigugma kaniya ug “gusto nga siya ang mangulo kanila.”¹

Gihigugma ni Helaman sama og mga anak kining batan-ong mga lalaki ug nakita ang ilang potensiyal.² Si Elder Dale G. Renlund mitudlo nga “aron epektibong makaserbisyo sa uban kinahanglan ato silang makita … pinaagi sa panan-aw sa Langitnong Amahan. Niana lamang masugdan nato sa pagsabot ang tinuod nga bili sa usa ka kalag. Niana lamang mabatyagan nato ang gugma sa Langitnong Amahan alang sa tanan … Niyang mga anak.”³ Ang mga bishop karon gipanalanginan og panan-aw aron makakita sa balaang pagkatawo sa mga batan-on nga ilang giatiman.

“Giihap” ni Helaman⁴ ang mga batan-ong lalaki nga ubos sa iyang pag-atiman. Giprayoridad niya ang pagtukod og lig-ong mga relasyon uban kanila.

Sa usa ka kritikal nga panahon sa dihang ang kinabuhi ug kamatayon nagkinahanglan sa mahinungdanong mga pagdesisyon, si Helaman ug ang batan-on niyang mga manggugubat wala na makakita sa kasundalohan nga naggukod kanila. Nakigtambag si Helaman sa mga batan-on:

“Tan-awa, wala kita masayod apan sila mihunong sa tuyo nga kita mosulong batok kanila. …

“Busa unsa ang inyong ikasulti, akong anak nga mga lalaki … ?”⁵

Kining matinud-anon nga batan-ong mga lalaki mitubag, “Amahan, tan-awa ang atong Dios nag-uban kanato, ug siya dili makatugot nga kita mapukan; busa mosulong kita.”⁶ Nakadaog sila, kay gisuportahan ni Helaman kining mga batan-ong lalaki sa ilang desisyon⁷ sa paglihok.⁸

Ang batan-ong mga Ammonita dunay talagsaong kawsa ug walay kahadlok “sa pagsuporta sa katawhan.”⁹ “Kining gamay nga puwersa,” nga gipangulohan ni Helaman, nakahatag og “dako nga paglaom og tumang kalipay”¹⁰ sa mga kasingkasing sa sinati na nga kasundalohang mga Nephita. Ang mga bishop karon makagiya sa ilang talagsaon og gasa nga kabatan-onan sa pagpanalangin sa ward ug pagpundok sa Israel. Si Presidente Russell M. Nelson mitudlo nga mao kini ang misyon nga “[sila] gipadala dinhi sa yuta.”¹¹

Sama niining batan-ong mga Ammonita kinsa mga “matinud-anon sa tanang panahon sa bisan unsang butang nga gisalig kanila,”¹² si Helaman matinud-anong misunod sa iyang mga lider. Bisan unsa nga hagit o babag, si Helaman padayon sa “hugot nga tinguha sa usa ka katuyoan”¹³ sa pagpadayon sa ilang katuyoan. Dihang gisugo siya sa “pagmartsa kauban sa [iyang] gagmay nga anak nga mga lalaki,”¹⁴ mituman siya.

Ang kabatan-onan karon mapanalanginan kon ang mga bishop mosunod sa giya sa atong mga lider sa “pagpakitambag sa [mga] presidente sa Young Women sa ward.”¹⁵ Ang mga presidente sa stake moseguro nga ang mga bishop ug ang mga presidente sa Young Women, matudloan sa pagtuman sa ilang mga responsibilidad alang sa kabatan-onan.¹⁶

Si Helaman mitahod sa mga pakigsaad. Sa dihang gitudlo ni Ammon ang ebanghleyo ngadto sa mga ginikanan sa gagmayng mga batan-ong lalaki, kini nga mga ginikahan mihangop niini uban sa bukas nga kasingkasing. Mapasaligon kaayo sila sa bag-o nilang kinabuhi sa matarong nga pagkadisipulo nga mihimo sila og pakigsaad nga “gihunong nila ang paggamit sa mga hinagiban sa ilang rebelyon.”¹⁷ Ang hinungdan lamang nganong naghunahuna sila sa paglapas niini nga pakigsaad, sa pagpakig-away og balik sama sa ilang gihimo sa una, mao ang pagkakita nga nameligro ang mga Nephita.

Ang mga Ammonita gustong motabang niining mga tawhana kinsa mitanyag kanila og luwas nga kapuy-an. Si Helaman, kauban sa uban pa, miawhag kanila sa pagtuman sa ilang pakigsaad nga dili na gayod makig-away. Mas misalig siya sa kalig-on nga ihatag sa Dios kay sa ikahatag nga kalig-on niining mga Ammonita gamit ang ilang mga espada ug mga pana.

Sa dihang si Helaman ug ang iyang batan-ong mga manggugubat nag-atubang og makahadlok nga mga hagit, si Helaman nagmalig-on. “Tan-awa, kini dili igsapayan—misalig kami sa Dios nga moluwas kanamo.”¹⁸ Sa usa ka higayon, dihang nameligro na sila sa kamatayon, ang ilang tubag mao ang “pagbu-bo sa [ilang] mga kalag sa pag-ampo sa Dios, nga siya molig-on [kanila] ug moluwas [kanila] … [ug] ang Ginoo … miduaw [kanila] uban ang mga pasalig nga siya moluwas [kanila]”¹⁹ “tungod sa ilang hilabihan nga pagtuo diin sila gitudloan nga motuo.”²⁰

Nakakat-on kita gikan ni Helaman nga kining mga batan-ong lalaki gisuportahan sa ilang mga ginikanan. Kining matinud-anong mga ginikanan nasayod nga ilaha ang unang responsibilidad sa pagtudlo sa ilang mga anak. Gitudloan nila ang ilang mga anak sa pagtuman sa mga sugo ug sa “pagpakabuhi nga matarong”²¹ sa atubangan sa Dios. Gitudloan sila sa ilang mga inahan “nga kon sila dili magduhaduha, ang Dios moluwas kanila.”²² Ang ilang mga amahan mipakita og puno sa gahom nga ehemplo sa paghimo og pakigsaad.²³ Kining kanhi nga mga manggugubat nasayod sa mga kangilngig sa gubat. Gisalig nila ang ilang mga walay kasinatiang mga anak nga lalaki ngadto sa pag-atiman ni Helaman ug misuporta kanila pinaagi sa pagpadala og “daghang mga tagana.”²⁴

Wala mag-inusara si Helaman samtang giserbisyohan niya ang iyang mga batan-ong manggugubat. Aduna siyay mga tawo sa iyang palibot nga kapangayoan niya og suporta ug giya. Nagpakitabang siya ni Kapitan Moroni, ug miabot kini.

Walay usa nga nagserbisyo sa gingharian sa Dios nag-inusara sa pagserbisyo. Ang Ginoo mipanalangin kanato og mga ward ug stake. Pinaagi sa iyang gipahiuli nga organisasyon, aduna kitay mga kapanguhaan, kaalam, ug inspirasyon sa pag-atubang sa bisan unsa nga hagit.

Ang bishop naghatag og giya sa ward pinaagi sa mga konseho.²⁵ Mopasiugda siya og matag tulo ka bulan nga mga pag-interbiyo sa tigpangalagad ug dayon moawhag sa korum sa mga elder ug Relief Society sa pagtuman sa ilang responsibilidad sa pagpangalagad sa mga pamilya. Kini nga mga kapangulohan ang mangulo sa pagsusi sa mga panginahanglan ug pagpangita og dinasig nga mga solusyon. Ang mga presidente sa stake motanyag og suporta pinaagi sa pagtudlo sa mga kapangulohan sa korum sa mga elder ug sa Relief Society niini nga mga responsibilidad.

Ang gikinahanglan nga giya alang sa mga lider ug mga ginikanan makita sa Librarya sa Ebanghelyo ug sa Gospel Living nga mga app. Niining dinasig nga mga kapanguhaan, makita nato ang mga kasulatan, mga pagtulon-an sa modernong mga propeta, ug ang Kinatibuk-ang Tamdanan nga Basahon. Ang kabatan-onan nga tab diha sa Librarya sa Ebanghelyo dunay daghang kapanguhaan alang sa mga kapangulohan sa korum ug sa klase²⁶ ug adunay Alang sa Kalig-on sa mga Kabatan-onan: Usa ka Giya alang sa Paghimo og mga Pagpili. Samtang tun-an sa tanang miyembro sa ward kining dinasig nga mga kapanguhaan ug magtinguha og giya gikan sa Espiritu, ang tanan magiyahan sa Ginoo sa pagpalig-on sa kabatan-onan.

Ang tibuok ward mapanalanginan ug malig-on samtang ang mga miyembro magtutok sa nagtubo nga henerasyon. Bisan pa sa atong mga imperpeksyon ug mga sayop, ang Langitnong Amahan nagdapit sa matag usa kanato, pinaagi sa pakig-uban sa Iyang Espiritu, sa pagtabang sa uban. Nasayod Siya nga molambo kita ug mabalaan kon sundon nato ang mga pag-aghat sa Espiritu Santo.²⁷ Dili igsapayan kon ang atong mga paningkamot dili hingpit. Kon makig-alayon kita sa Ginoo, makasalig kita nga ang atong mga paningkamot mahisubay sa unsay Iyang buhaton alang sa kabatan-onan.

Pinaagi sa pagsunod sa direksyon sa Espiritu Santo sa pagtabang sa kabatan-onan, mahimo kitang mga saksi sa gugma sa Langitnong Amahan sa ilang kinabuhi. Ang pagsunod sa mga pag-aghat gikan sa Ginoo magtukod og mga relasyon sa gugma ug pagsalig. Ang pakigrelasyon sa mga kinabuhi sa kabatan-onan maoy kinadak-ang impluwensya sa ilang mga pagpili.

Ang kabatan-onan makakat-on sa sundanan sa pagpadayag samtang moapil sila kanato sa proseso sa pagsiksik ug pagsunod sa mga pag-aghat aron moserbisyo sa uban. Samtang ang kabatan-onan moduol sa Ginoo alang niining dinasig nga giya, ang ilang mga pakigrelasyon ug pagsalig Kaniya molambo.

Atong ipahayag ang atong pagsalig sa kabatan-onan pinaagi sa pagtanyag og suporta ug direksyon, sa walay pagkontrolar kanila.²⁸ Samtang pasagdan ug tugotan nato ang kabatan-onan nga magkat-on pinaagi sa pagtinambagay, pagpili og dinasig nga dalan, ug paglihok sa kon unsay ilang giplano, makasinati sila og tinuod nga kalipay ug paglambo.

Si Presidente Henry B. Eyring mitudlo nga “unsay labing mahinungdanon mao ang unsay ilang makat-onan gikan [kaninyo] mahitungod kon si kinsa gayod sila ug kon unsa gayod sila nga mamahimo. Ang akong tag-an mao nga dili kaayo nila kini makat-onan pinaagi sa mga lektyur. Makuha nila kini gikan sa mga pagbati kon si kinsa kamo, kinsa sila para ninyo, ug unsa sa inyong hunahuna sila mamahimo.”²⁹

Ang atong kabatan-onan mopatingala kanato sa ilang kaisog, sa ilang hugot nga pagtuo, ug sa ilang mga abilidad. Samtang pilion nila ang hingpit nga pagkahimong mga disipulo ni Jesukristo, ang Iyang ebanghelyo motandog sa ilang mga kasingkasing. Ang pagsunod Kaniya mahimo nga bahin kon si kinsa sila, dili lang kon unsay ilang gihimo.

Si Helaman mitabang sa batan-ong mga Ammonita sa pagkakita kon sa unsang paagi nagpakabuhi ang usa ka isog nga disipulo ni Jesukristo. Mahimo kitang mga gamhanang ehemplo sa kabatan-onan kon sa unsang paagi ang mga disipulo ni Kristo nagpakabuhi karon. Ang matinud-anong mga ginikanan nanag-ampo alang niining mga ehemplo diha sa kinabuhi sa ilang mga anak. Walay programa nga mahimong ipuli sa impluwensya sa mahigugmaon, matinumanon sa pakigsaad nga mga hamtong.

Isip presidente sa korum sa mga priest, ang bishop makapakita og ehemplo sa kabatan-onan kon unsaon sa pagkahimong maunongon nga bana ug mahigugmaon nga amahan³⁰ pinaagi sa pagpanalipod, pagsangkap, ug pagdumala³¹ sa matarong nga pamaagi. Ang mga bishop, nga “nakatutok kaayo sa kabatan-onan,”³² makabaton og impluwensya nga molungtad og mga henerasyon.

Ang kabatan-onan karon mao ang usa sa labing halangdon nga mga espiritu sa Langitnong Amahan³³. Kauban sila sa lig-ong mga tigpanalipod sa kamatuoran ug kabubut-on didto sa kinabuhi sa wala pa kini nga kalibotan.³⁴ Natawo sila niining mga adlawa sa pagpundok sa Israel pinaagi sa ilang puno sa gahom nga pagsaksi ni Ginoong Jesukristo. Nakaila Siya sa matag usa kanila ug nahibalo sa ilang talagsaong potensyal. Mapailobon Siya samtang nagtubo sila. Motubos Siya ug manalipod kanila. Moayo Siya ug mogiya kanila. Modasig Siya kanila. Kita, ilang mga ginikanan ug mga lider, giandam sa pagsuporta kanila. Aduna kitay Simbahan sa Manluluwas nga moabag kanato samtang nagpatubo kita sa sunod nga henerasyon.

Mosaksi ako nga ang Simbahan ni Kristo, nga gipahiuli pinaagi sa Propeta nga si Joseph Smith ug gipangulohan karon ni Presidente Russell M. Nelson, giorganisar aron makatabang sa kabatan-onan nga matuman ang ilang talagsaong katuyoan niining ulahing mga adlaw. Sa ngalan ni Jesukristo, amen.