Magmaya sa Gasa sa mga Yawe sa Pagkapari

Ni Presidente Russell M. Nelson

Presidente sa Ang Simbahan ni Jesukristo sa mga Santos sa Ulahing mga Adlaw

Ang mga yawe sa pagkapari nagdumala unsaon sa paggamit ang pagkapari sa Dios aron matuman ang mga katuyoan sa Ginoo ug mopanalangin sa tanan nga modawat sa gipahiuli nga ebanghelyo ni Jesukristo.

Minahal kong kaigsoonan, karon mao ang adlaw sa kasaysayan alang ni Presidente Dallin. H. Oaks ug kanako. 40 na ka tuig na ang nakalabay, niadtong Abril 7, 1984, sa dihang gitawag kami ngadto sa Korum sa Napulog Duha ka Apostoles.¹ Nagmaya kami sa matag kinatibuk-ang komperensiya sukad, lakip niini karon. Sa makausa gipanalanginan kita pag-usab sa sagrado nga impluwensya sa Espiritu. Manghinaot ko nga balikbalikon ninyo sa pagtuon ang mga mensahe niini nga komperensiya sa tanang umaabot nga mga bulan.

Sa dihang natawo ko,² dihay unom ka templo nga gigamit—usa sa St. George, Logan, Manti, ug sa Siyudad sa Salt Lake, Utah; ingon man usab sa Cardston, Alberta, Canada; ug Laie, Hawaii. Duha ka nahaunang templo ang nagamit og kadiyot didto sa Kirtland, Ohio, ug Nauvoo, Illinois. Samtang ang tibuok Simbahan napugos sa pagbalhin ngadto sa kasadpan, ang mga Santos napugos sa pagbiya niadtong duha ka templo.

Ang Templo sa Nauvoo naguba tungod kay gisunog kini. Gitukod kini pag-usab ug dayon gipahinungod ni Presidente Gordon B. Hinckley.³ Ang Kirtland Temple gipanamastamasan sa mga kaaway sa Simbahan. Unya ang Kirtland Temple napanag-iya sa Community of Christ, nga nanag-iya niini sulod sa daghang tuig.

Sa miaging bulan gipahibalo namo nga gipalit sa Ang Simbahan ni Jesukristo sa mga Santos sa Ulahing mga Adlaw ang Kirtland Temple, uban sa pipila ka importante nga makasaysayanong dapit sa Nauvoo. Dako kaayo ang among pasalamat sa mahigalaon ug makaayo sa tanan sa among pagpakigsulti sa mga lider gikan sa Community of Christ nga misangpot niini nga kasabotan.

Ang Kirtland Temple adunay dili kasagaran nga kahulogan sa Pagpahiuli sa ebanghelyo ni Jesukristo. Pipila ka hitabo nga nahitabo didto gipanagna sulod sa liboan ka tuig ug importante sa gipahiuli nga Simbahan sa Ginoo aron sa pagtuman sa misyon sa ulahing adlaw.

Nanghitabo ang labing importante niini sa Dominggo sa Pasko sa Pagkabanhaw, niadtong Abril 3, 1836.⁴ Nianang adlawa, sila si Joseph Smith ug Oliver Cowdery nakasinati og sunodsunod nga talagsaong mga pagbisita. Una, si Ginoong Jesukristo nagpakita. Ang propeta mirekord nga ang “mga mata sa Manluluwas sama sa nagdilaab nga kalayo; ang buhok sa iyang ulo puti sama sa lunsay nga yelo; ang iyang panagway mihayag labaw sa kahayag sa adlaw; ug ang iyang tingog sama sa tingog sa dahunog sa dako nga katubigan.”⁵

Atol niini nga pagbisita, ang Ginoo mimatuod sa Iyang pagka-siya. Miingon siya “Ako mao ang sinugdanan ug ang kataposan; Ako mao siya kinsa nabuhi, Ako mao siya kinsa gipatay; Ako mao ang inyong manlalaban ngadto sa Amahan.”⁶

Dayon si Jesukristo mipahayag nga Siya midawat sa templo isip Iyang balay ug mihimo niining makapahingangha nga saad: “Ako magpakita sa akong kaugalingon ngadto sa akong katawhan diha sa kaluoy dinhi niini nga balaan nga balay.”⁷

Kining importante nga saad magamit sa matag templo nga karon napahinungod. Dapiton ko kamo sa pagpamalandong unsa ang gipasabot sa saad sa Ginoo alang ninyo sa personal nga paagi.

Human sa pagbisita sa Manluluwas, nagpakita si Moises. Gitugyan ni Moises ngadto ni Joseph Smith ang mga yawe alang sa pagpundok sa Israel ug sa pagbalik sa napulo ka tribo.⁸

Sa dihang nahuman kini nga panan-awon, “Si Elias mipakita, ug mitugyan sa kapaigoan sa ebanghelyo ni Abraham” ngadto ni Joseph.⁹

Dayon si Elijah ang propeta nagpakita. Ang Iyang pagpakita nagtuman sa saad ni Malaquias nga sa dili pa ang Ikaduhang Pag-anhi, ang Ginoo mopadala ni Elijah nga “Iyang ulion ang kasingkasing sa mga ginikanan ngadto sa mga anak, ug ang kasingkasing sa mga anak ngadto sa ilang mga ginikanan.”¹⁰ Gitugyan ni Elijah ang mga yawe sa gahom sa pagselyo ngadto ni Joseph Smith.¹¹

Ang kaimportante niini nga mga yawe nga gibalik sa yuta pinaagi sa tulo ka mensahero ubos sa direksyon sa Ginoo labaw ka mahinungdanon. Ang mga yawe sa pagkapari naglangkob sa awtoridad ug gahom sa kapangulohan. Ang mga yawe sa pagkapari nagdumala unsaon sa paggamit ang pagkapari sa Dios aron matuman ang mga katuyoan sa Ginoo ug mopanalangin sa tanan kinsa modawat sa gipahiuli nga ebanghelyo ni Jesukristo.

Importante nga timan-an nga sa wala pa ang organisasyon sa Simbahan, ang langitnong mga mensahero mitugyan sa Aaronic ug Melchizedek nga mga Pagkapari diha ni Propeta Joseph ug mihatag kaniya sa mga yawe sa duha ka pagkapari.¹² Kini nga mga yawe naghatag kang Joseph Smith og awtoridad sa pag-organisar sa Simbahan niadtong 1830.¹³

Dayon sa Kirtland Temple niadtong 1836, ang pagtugyan niining tulo ka dugang nga mga yawe sa pagkapari—sa ato pa, ang mga yawe sa pagpundok sa Israel, ang mga yawe sa ebanghelyo ni Abraham, ug ang mga yawe sa gahom sa pagselyo—gikinahanglan. Kini nga mga yawe nagtugot ni Joseph Smith—ug sa tanang misunod nga mga Presidente sa Simbahan sa Ginoo—sa pagpundok sa Israel sa duha ka habig sa tabil, sa pagpanalangin sa tanang anak sa pakigsaad uban sa mga panalangin ni Abraham, sa pagbutang og selyo sa pagmatuod sa mga ordinansa ug mga pakigsaad sa pagkapari, ug sa pagselyo sa mga pamilya sa kahangtoran. Ang gahom niini nga mga yawe sa pagkapari walay kinutoban ug talagsaon.

Hunahunaa kon sa unsa nga paagi mahimong lahi ang inyong kinabuhi kon ang mga yawe sa pagkapari wala pa mapahiuli nganhi sa yuta.¹⁴ Kon wala ang mga yawe sa pagkapari, dili kamo matugahan sa gahom sa Dios.¹⁵ Kon wala ang mga yawe sa pagkapari, ang Simbahan magsilbi lamang nga usa ka importante nga pagtulon-an ug makitawhanon nga organisasyon apan dili na makahimo og daghan pa. Kon wala ang mga yawe sa pagkapari, walay usa nato ang adunay akses sa gikinahanglan nga mga ordinansa ug mga pakigsaad nga nagbugkos nato ngadto sa atong mga minahal sa kahangtoran ug motugot nato sa pagpuyo uban sa Dios sa kataposan.

Ang mga yawe sa pagkapari naghimo og kalainan sa Ang Simbahan ni Jesukristo sa mga Santos sa Ulahing mga Adlaw gikan sa bisan unsa nga laing organisasyon sa yuta. Daghang uban nga mga organisasyon ang makahimo ug makabuhat sa inyong kinabuhi nga mas maayo dinhi sa pagka-mortal. Apan walay laing organisasyon ang makahimo ug mo impluwensiya sa inyong kinabuhi human sa kamatayon.¹⁶

Ang mga yawe sa pagkapari naghatag nato sa awtoridad sa paghatag sa tanang panalangin nga gisaad ngadto ni Abraham ngadto sa matag lalaki ug babaye nga nagtuman sa pakigsaad. Ang buhat sa templo makapahimo niining talagsaong mga panalangin nga maanaa alang sa tanang anak sa Dios, bisan pa asa o kanus-a sila nabuhi, o nagpuyo karon. Magmaya kita nga ang mga yawe sa pagkapari sa makausa pa ania sa yuta!

Dapiton ko kamo sa paghunahuna sa mosunod nga tulo ka pamahayag:

Ang pagpundok sa Israel usa ka ebidensiya nga ang Dios nahigugma sa Iyang tanang anak bisan asa.
Ang ebanghelyo ni Abraham dugang nga ebidensiya nga ang Dios nahigugma sa Iyang tanang anak bisan asa. Siya nagdapit sa tanan sa pagduol ngadto Kaniya—“itom ug puti, ulipon ug gawasnon, lalaki ug babaye; … ang tanan managsama ngadto sa Dios.”¹⁷
Ang gahom sa pagselyo mao ang langitnong ebidensiya kon unsa ka dako ang gugma sa Dios sa Iyang tanang anak bisan asa ug gusto nga ang matag usa kanila mopili nga mobalik ngadto Kaniya.

Ang mga yawe sa pagkapari nga gipahiuli pinaagi ni Propeta Joseph Smith nakapahimo niini nga posible alang sa matag lalaki ug babaye nga nagtuman sa pakigsaad nga makatagamtam sa talagsaon nga personal espirituwal nga mga pribilihiyo. Balikon nako, adunay daghan nga atong makat-onan gikan sa sagrado nga kasaysayan sa Templo sa Kirtland.

Ang pagpahinungod nga pag-ampo ni Joseph Smith sa Kirtland Temple usa ka panudlo kon sa unsa nga paagi nga ang templo espirituwal nga makahatag kaninyo ug kanako og gahom aron makaatubang sa mga hagit sa kinabuhi niining kataposang mga adlaw. Awhagon ko kamo sa pagtuon niana nga pag-ampo, nga narekord sa Doktrina ug mga Pakigsaad 109. Kadtong pagpahinungod nga pag-ampo, nga nadawat pinaagi sa pagpadayag, nagtudlo nga ang templo mao ang “usa ka balay sa pag-ampo, usa ka balay sa pagpuasa, usa ka balay sa hugot nga pagtuo, usa ka balay sa pagkat-on, usa ka balay sa himaya, usa ka balay sa kahusay, usa ka balay sa Dios.”¹⁸

Kini nga lista sa mga hiyas mas labaw kay sa usa ka paghulagway sa usa ka templo. Usa kini ka saad mahitungod sa unsay mahitabo niadtong moserbisyo ug mosimba sa balay sa Ginoo. Sila makapaabot nga makadawat og mga tubag sa pag-ampo, personal nga pagpadayag, mas lig-on nga pagtuo, kusog, kahupayan, dugang nga kahibalo, ug dugang nga gahom.

Ang panahon sulod sa templo motabang ninyo nga maghunahuna og celestial ug sa pagsabot kinsa gayod kamo, unsa ang inyong maabot, ug sa matang sa kinabuhi nga inyong maangkon sa kahangtoran. Ang kanunay nga pagsimba sa templo makapalambo sa paagi sa inyong pagtan-aw sa inyong kaugalingon ug sa unsa nga paagi kamo mohaom sa talagsaong plano sa Dios. Mosaad ko kaninyo niana.

Gisaaran usab kita nga sa templo kita mahimong “makadawat sa kahingpitan sa Espiritu Santo.”¹⁹ Hunahunaa unsa ang gipasabot niana nga saad bahin sa pagdawat og balaan nga pagpadayag alang sa matag sinserong tigpangita sa mahangtorong kamatuoran.

Gitudloan usab kita nga ang tanan nga mosimba sa templo makabaton sa gahom sa Dios ug mga anghel ang “mobantay kanila.”²⁰ Unsa ka dako ang nadugang niini sa inyong pagsalig nga mahibalo niana, isip usa ka natugahan nga babaye o lalaki nga napanalanginan sa gahom sa Dios, dili kamo kinahanglan nga moatubang sa kinabuhi nga mag-inusara? Unsa nga kaisog ang nahatag niini kaninyo nga makahibalo nga ang mga anghel motabang gayod kaninyo?

Sa kataposan, gisaaran kita nga “walay pundok sa mga daotan” ang makabuntog niadtong mosimba sa balay sa Ginoo.²¹

Ang pagsabot sa espirituwal nga mga pribilihiyo nga nahimong posible sa templo importante sa matag usa kanato karon.

Minahal kong mga kaigsoonan, ania ang akong saad. Walay laing mas makatabang kaninyo sa paggunit sa gunitanan nga puthaw²² kaysa pagsimba sa templo kanunay kon gitugot sa inyong mga sirkumstansiya. Walay laing mas makapanalipod kaninyo samtang inyong masugatan ang mga gabon sa kangitngit sa kalibotan. Walay laing makapalig-on sa inyong pagpamatuod alang ni Ginoong Jesukristo ug sa Iyang Pag-ula o makatabang kaninyo nga mas dugang makasabot sa talagsaong plano. Walay laing labaw pa kamakahupay sa inyong espiritu atol sa mga panahon sa kasakit. Walay laing labaw pa makapaabli sa kalangitan. Wala!

Ang templo mao ang ganghaan sa daghang panalangin sa Dios alang sa matag usa kanato, kay ang templo mao lamang ang dapit sa yuta diin atong madawat ang tanang panalangin nga gisaad ngadto ni Abraham.²³ Mao nga gibuhat namo ang tanan nga among mahimo, ubos sa direksyon sa Ginoo, sa paghimo sa mga panalangin sa templo nga mas duol ngadto sa mga miyembro sa Simbahan. Sa ingon, ikalipay namo nga ipahibalo nga kami nagplano sa pagtukod og bag-ong templo sa matag usa niining mosunod nga 15 ka dapit:

Uturoa, French Polynesia
Chihuahua, Mexico
Florianópolis, Brazil
Rosario, Argentina
Edinburgh, Scotland
Brisbane, Australia south area
Victoria, British Columbia
Yuma, Arizona
Houston, Texas south area
Des Moines, Iowa
Cincinnati, Ohio
Honolulu, Hawaii
West Jordan, Utah
Lehi, Utah
Maracaibo, Venezuela

Minahal kong mga kaigsoonan, ako mopamatuod nga kini mao Ang Simbahan ni Jesukristo sa mga Santos sa Ulahing mga Adlaw. Siya ang nangulo niini. Kita Iyang mga sulugoon.

Magmaya kita sa pagpahiuli sa mga yawe sa pagkapari, nga maoy nakapahimong posible kaninyo ug kanako nga makatagamtam sa matag espirituwal nga panalangin nga andam ug takos natong dawaton. Ako mopamatuod pinaagi sa sagradong ngalan ni Jesukristo, amen.