Elder David L. Buckner

Kinatibuk-ang Awtoridad nga Seventy

Si Elder David L. Buckner natawo niadtong Septiyembre 27, 1963, sa Ogden, Utah, USA, apan “nagtubo” samtang siya nagpuyo sulod sa tulo ka tuig sa Sacramento, California, USA.

Ang kinamanghoran sa lima ka anak nila ni Melba ug E. LaMar Buckner, ang 11 anyos nga si David mibalhin ngadto sa California uban sa iyang pamilya sa dihang ang iyang amahan gitawag sa pagdumala sa misyon sa Simbahan didto sa Sacramento. Layo gikan sa maayo nga pagkaestablisar nga mga higala sa Utah, nakat-on siya unsaon sa pagpangita og bag-ong higala ug nakakaplag sa “300 ka mas magulang nga mga igsoong lalaki ug igsoong babaye” taliwala sa full-time nga mga misyonaryo.

Labing importante, ang iyang pagpamatuod sa ebanghelyo ni Jesukristo nalig-on. “Kanang kasinatian sa misyon nakapausab sa tanan alang kanako,” miingon siya.

Unya nagserbisyo siya sa Ecuador Guayaquil Mission. Mga tulo lang ka bulan sa iyang misyon, samtang nagserbisyo isip presidente sa misyon sa lungsod sa Jipijapa, nagbangotan siya uban sa mga miyembro sa branch ug sa uban human nga ang 11 anyos nga batang lalaki nalumos samtang miapil sa usa ka kalihokan sa Simbahan.

Samtang nangamuyo siya sa Langitnong Amahan sa mga semana ug mga bulan nga misunod, nakaangkon siya og dili matarog nga pagpamatuod bahin sa plano sa kaluwasan. Nakasaksi usab siya sa kaluoy sa Ginoo samtang ang uban sa komunidad midawat sa ebanghelyo. Silang tanan nakasabot sa sagrado nga matang sa kinabuhi ug sa gahom sa grasya sa Ginoo.

Human sa iyang misyon, si Elder Buckner mieskwela sa Brigham Young University, diin iyang nahimamat si Jennifer Romney Jackson. Naminyo sila niadtong Agosto 30, 1990, sa Salt Lake Temple. Si Sister Buckner nagtubo sa New York, USA, diin ang magtiayon mibalhin human sa ilang kaminyoon. Gipadako nila ang ilang lima ka anak didto sa Manhattan, diin si Elder Buckner mirepresentar sa Simbahan sa nabantog nga Commission of Religious Leaders.

Si Elder Buckner nakadawat og bachelor of science degree sa finance gikan sa BYU niadtong 1988 ug usa ka master of business administration degree gikan sa Durham University niadtong 1991. Nakadawat usab siya og usa ka master of international relations gikan sa BYU niadtong 1995 ug usa ka juris doctorate gikan sa BYU niadtong 1996. Siya usa ka propesor sa kolehiyo ug, sukad niadtong 1999, presidente sa Bottom Line Training and Consulting Inc. Si Elder Buckner nakaserbisyo isip Area Seventy, presidente sa stake, high councilor, ug bishop.