Pangalagad sa Unang Kapangulohan

Sa usa ka mensahe sa social media nga gi-post niadtong Pebrero 14, 2024, si Presidente Russell M. Nelson midapit sa tanan sa paggamit sa Adlaw sa Kasingkasing isip usa ka pahinumdom sa pagpasalig pag-usab sa paghigugma sa ilang silingan. Si Presidente Nelson miingon nga ang adlaw hingpit kon ang mga tawo sa tibuok kalibotan mosaulog sa gugma. Samtang ang gugma usahay mahitungod sa mga bulak, tsokolate, ug mga regalo, “ang ikaduha nga dakong sugo nagtudlo bahin sa usa ka lahi nga matang sa gugma—kanang aktibong mahigugma sa atong silingan.”

Niadtong Pebrero 15, si Presidente Nelson ug ang iyang mga magtatambag miabi-abi sa presidente sa Navajo nga Nasod nga si Dr. Buu Nygren ug sa iyang asawa, Unang Ginang nga si Jasmine Blackwater-Nygren, didto sa Temple Square. Si Dr. Nygren mapasaligon sa paghatag sa nag-unang mga kinahanglanon sama sa tubig, kuryente, ug maayong mga dalan ngadto sa matag panimalay sa Navajo. Sa bag-ohay lang nga katuigan, ang Simbahan ni Jesukristo mitabang sa paghatag sa pipila niining mga butanga ngadto sa Navajo nga Nasod.

Atol sa sibya sa Friend to Friend niadtong Marso 9, si Presidente Dallin H. Oaks, Unang Magtatambag sa Unang Kapangulohan, ug ang iyang asawa, nga si Kristen, namulong uban sa pito sa ilang mga apo nga ang edad pang-Primary mahitungod kon unsaon sa pagpaminaw sa Espiritu Santo ug unsa ang buhaton sa Espiritu Santo—mopainit, mohupay, mopamatuod, mogiya, motudlo, ug uban pa.

“Ang mga disipulo ni Jesukristo maminaw ni Jesukristo,” miingon si Presidente Oaks. “Usahay mohatag Siya kanato og usa ka pagbati, usahay usa ka hunahuna. Usahay madungog nato ang Iyang tingog. Si Presidente Russell M. Nelson, ang atong propeta, naghangyo nato nga mamati sa atong Manluluwas ug maminaw Kaniya.”

Human sa 61 ka tuig sa kaminyoon, si Presidente Henry B. Eyring, Ikaduhang Magtatambag sa Unang Kapangulohan, temporaryong nanamilit sa iyang asawa, nga si Kathleen, nga namatay niadtong Oktubre 15, 2023. Si Presidente Eyring miingon, “Si Kathleen usa ka tawo nga sa kanunay mihimo kanako nga magtinguha nga mahimong labing maayo nga ako mamahimo.”

Niadtong Marso 24, si Presidente Eyring mipahinungod sa Red Cliffs Utah Temple sa St. George, Utah, USA. “Makaplagan ninyo ang kalipay sa inyong pagserbisyo dinhi nga dili maangkon sa laing paagi,” miingon siya atol sa mga pagserbisyo sa pagpahinungod.