“Elder Patrick Kearon: Giandam ug Gitawag sa Ginoo,” Liahona, Mayo 2024.
Bag-ong mga Calling
Elder Patrick Kearon: Giandam ug Gitawag sa Ginoo
Ang Ginoo miandam ni Elder Kearon sa talagsaong mga paagi ug mituga kaniya og daghan nga lainlaing espirituwal nga mga gasa nga makapahimo kaniya sa pagpanalangin sa uban sa iyang sagrado nga tawag isip usa ka espesyal nga saksi “sa ngalan ni Kristo sa tibuok kalibotan.”
Usa ka Sabado pipila ka tuig human gitawag isip usa ka Kinatibuk-ang Awtoridad nga Seventy, si Elder Patrick Kearon ug ang iyang asawa, si Jennifer, misulod sa usa ka supermarket samtang si Elder W. Rolfe Kerr ug ang iyang asawa, si Janeil, hapit na mobiya. Nag-istoryahay sila og kadiyot, ug dayon ang mga Kerr mipaingon sa ilang sakyanan.
Hapit diha-diha dayon, usa ka lalaki ang miduol ni Elder Kearon ug madasigong nangutana kaniya, “Usa ba kadto ka Kinatibuk-ang Awtoridad ang imong gikaistorya?” Mitubag si Elder Kearon, “Oo. Si Elder W. Rolfe Kerr kadto sa Seventy.”1 Ang lalaki miyangoyango, direktang mitan-aw ni Elder Kearon nga wala makaila kaniya, ug miingon, “Makaila gyod ka kanunay og usa ka Kinatibuk-ang Awtoridad, dili ba?” Dayon ang lalaki daling mibiya.
“Ganahan ko niana nga istorya tungod kay kini nagrepresentar kaayo sa unsay akong gibati,” miingon si Elder Kearon nga nagpahiyom. “Mahimong makasinati gihapon ko sa samang kasinatian karon, ug kana nga lalaki tingali dili gihapon makaila kanako gikan sa daghang tawo isip usa ka Kinatibuk-ang Awtoridad.”
Ang estilo ni Elder Kearon sa pagpakatawa ug pagkamapainubsanon nakapahimo niya nga gimahal niadtong nakaila kaniya o adunay pribilihiyo sa pagserbisyo uban kaniya. Gitawag, ug giordinahan nga sakop sa Korum sa Napulog Duha ka Apostoles niadtong Disyembre 7, 2023, si Elder Kearon nasayod nga ang iyang bag-ong calling dili kaayo mahitungod kaniya kay kini mahitungod sa nagpadayon nga buhat sa Ginoo.
“Kitang tanan mahimong kabahin sa Iyang buhat,” siya miingon, “maningkamot sa pagtabang sa mga tawo nga mobati sa Iyang kahayag ug sa Iyang gugma ug sa Iyang pag-atiman. Unsa ang Iyang gusto nga atong buhaton isip mga miyembro sa Simbahan mao ang pagpanalangin sa mga kinabuhi sa uban.”
Ang Ginoo miandam ni Elder Kearon sa talagsaong mga paagi ug mituga kaniya og daghan nga lainlaing espirituwal nga mga gasa nga makapahimo kaniya sa pagpanalangin sa uban sa iyang sagrado nga tawag isip usa ka espesyal nga saksi “sa ngalan ni Kristo sa tibuok kalibotan” (Doktrina ug mga Pakigsaad 107:23). Usa ka kinabig sa Simbahan sa edad nga 26 ug ang bugtong miyembro sa Simbahan sa iyang mga igsoon, si Elder Kearon usa ka tawo nga masinabtanon kaayo kinsa makamao unsaon sa pagpaminaw, pagpakigsandurot, ug paghupay sa mga anak sa Dios. Maluluy-on siya og kinaiya ug malipay nga moserbisyo. Naimpluwensya sa malumong mga kasinatian ug sa kamatayon sa mga minahal, siya nagpamatuod nga ang Manluluwas nga si Jesukristo, pinaagi sa Iyang Pag-ula nagtanyag og makaayo nga tambal ug moabot ang adlaw nga mohimo sa tanan nga eksakto.
Si Elder Kearon usa ka tinuod nga disipulo ni Jesukristo kinsa misalig diha sa Ginoo. Usa siya ka lider nga sayon nga sundon tungod kay siya mahalaron nga mosunod sa Manluluwas ug sa paggiya sa katawhan ngadto Kaniya.
“Ang Ginoo,” miingon si Presidente Jeffrey R. Holland, Akting nga Presidente sa Korum sa Napulog Duha ka Apostoles, “migiya ni Patrick ngadto sa katungdanan nga karon iyang gihuptan.”
Mahigugmaon, Mahalaron nga mga Ginikanan
Si Patrick Kearon natawo didto sa Carlisle, Cumbria, sa amihanang England niadtong Hulyo 18, 1961, ngadto nila ni Paddy ug Patricia Kearon. Sa dihang ang iyang mga ginikanan nagkakita, nagserbisyo sila sa armadong kusog sa British panahon sa Ikaduhang Gubat sa Kalibotan—ang iyang inahan usa ka nars sa kasundalohan sa India ug Burma ug ang iyang amahan diha sa Royal Air Force (RAF), nga nadestino sa France, North Africa, Sicily, ug Italy.
Si Elder Kearon nahinumdom sa iyang mga ginikanan, si Paddy ug si Patricia, sa ilang sulundon nga mga kinabuhi sa pagkamahalaron, pagserbisyo, ug pagsakripisyo.
Bisan og dili mga tawo nga tigsimba, sila nagpuyo og mga kinabuhi nga mahalaron sa pamilya, serbisyo, ug sakripisyo nga nagbilin og malungtaron nga impresyon ni Patrick, ang kinamanghuran sa lima ka anak sa magtiayon. Nakahinumdom siya ni Pat isip usa ka mahigugmaon, “talagsaon nga inahan,” malumo nga mogiya, kadaghanan pinaagi sa ehemplo, ug dili gayod hinawayon sa uban. Manggihatagon siya, makanunayon ug kalmado kaayo. Ug nakahinumdom siya ni Paddy sa “iyang kalagsik, kamabination, ug dili kapugngan nga kaayo; sa iyang gugma sa … uga nga desiyerto sa Arabia [ug] sa labong nga daw nagligid nga kabungtoran sa England ug Ireland; ug sa iyang hilig sa kalangitan, sa kahayag sa adlaw, ug sa dagat. Klaro nakong namatikdan ang iyang impluwensya sa akong kaugalingong tinguha nga maanaa sa gawas, diha sa dakong hawan, sa hangin ug sa kahayag sa adlaw.”2
Human sa iyang pagserbisyo sa RAF, ang amahan ni Elder Kearon mitrabaho isip usa ka kontraktor sa depensa sa Saudi Arabia. Si Patrick, nga nag-edad og pito ka tuig, nakat-on og importanteng leksiyon sa pagkamasulundon didto, mahinumdomang gihisgotan sa iyang unang pakigpulong sa kinatibuk-ang komperensiya isip usa ka Kinatibuk-ang Awtoridad. Mibalewala sa mga instruksiyon sa iyang mga ginikanan nga magsul-ob og sapatos atol sa pagkamping sa desiyerto, milakaw siya aron mosuroy nga nagsul-ob lang og “tsinelas” ug miantos sa mala nga pinaakan sa scorpion sa tikod sa iyang tiil.3
Si Patrick Kearon nga usa ka bata didto sa Saudi Arabia.
Paglabay sa tulo ka tuig, ang batan-ong si Patrick nahimutang sa boarding school sa England mibati og hilabihang kamingaw sa iyang mga ginikanan, kamingaw nga maibanan lamang sa ilang madasigon nga mga sulat.
“Sayon ra kaayo ni Harry Potter nga didto sa Hogwarts kon itandi. Lisod kadto,” sulti niya bahin sa boarding school. “Mopauli ra ko sa Pasko, Pasko sa Pagkabanhaw, ug sa ting-init [summer]. Naghimo ko og gamay nga mga kalendaryo sa mga piraso sa papel, nagbutang og badlis sa matag adlaw, nag-ihap sa mga adlaw hangtod nga ako makapauli ngadto sa akong pamilya.”
Paglabay sa pipila ka tuig, samtang si Patrick diha sa iyang ikaduha nga boarding school sa England, usa ka kusog nga unos ang mihuros gikan sa Dagat sa Irish. Ang miresulta nga pagsulbong sa unos mipabaha sa 5,000 ka panimalay sa naglibot nga dapit. Si Patrick ug ang iyang mga kauban sa klase gitawag aron sa pagtabang sa grabe kaayo nga pagpanglimpyo.
“Nakahinumdom gihapon ko sa kabug-at sa nabasa nga mga karpet ug sa kabaho niining tanan,” miingon siya. “Apan nahinumdom ko nga nagpokus ug nakahuman sa trabaho uban sa akong mga isig ka higala sa eskwelahan. Ug nakahinumdom ko sa mga tawo ug sa ilang pasalamat.”
Kana nga kasinatian tingali mao ang unang pagkakita ni Patrick sa mga panalangin sa usag-usa sa paghatag ug sa pagdawat og serbisyo. Human niana, nakaamgo siya nga ang iyang tin-edyer nga mga pagbati sa walay kaseguroan mibiya kaniya “samtang miapil ko niining dakong paningkamot sa pagtabang sa among mga silingan”.4
Pagkahuman sa high school, si Patrick mibalik ngadto sa Saudi Arabia, diin nagsugod siya sa pagbansay sa pagdumala sa multinasyonal nga korporasyon sa pagkaon ug mainom. Kana nga kasinatian sinugdanan sa iyang trabaho sa pipila ka mga industriya, hangtod sa kadugayan ngadto sa usa ka konsultasyon sa komunikasyon uban ni Sister Kearon didto sa England.
“Ang Akong Kalibotan Nagkaguliyang Gayod”
Sa dihang si Patrick nag-edad og 19, namatay ang iyang amahan ug bayaw nga lalaki sa usa ka ngilngig nga aksidente sa sakyanan didto sa Saudi Arabia. “Ang akong kalibotan nagkaguliyang sa pagkawala nila,” miingon siya. Ang paggiya, mahigugmaong awhag sa iyang amahan, ug malipayong panglantaw sa kalibotan sa iyang amahan nawala. Nabug-atan sa kaguol ug kahaw-ang sulod sa usa ka panahon, si Patrick miadto sa England uban sa iyang inahan apan sa kadugayan mibalik aron motrabaho sa Saudi Arabia.
“Ako aduna sa tanan nga matang sa bililhon nga mga oportunidad nga makat-on ug molambo ug makakita kon sa unsa nga paagi ang mga negosyo gipadagan,” miingon siya. Mapasalamaton kaayo siya sa “usa ka talagsaon nga amo kinsa mitudlo ug migiya kaniya ug nahimo niyang suod nga higala. Siya mao ang usa sa pipila ka tawo nga sama sa amahan nga gipanalangin nako sukad sa kamatayon sa akong amahan.”
Unya, samtang nagtrabaho balik sa London, si Patrick nakahimamat og pipila ka miyembro sa Simbahan.
“Maayo kaayo sila nga mga ehemplo sa atong tinuohan,” nahinumdom siya. “Usa nila gikan sa California, ug ako miadto ug mipuyo uban niana nga pamilya samtang ako nagtrabaho didto.”
Kana nga kasinatian nakahatag ni Patrick og talagsaong pundasyon sa pagsabot sa Simbahan. Natandog siya sa kalipay sa pamilya nga nakita diha sa pagserbisyo, apan siya adunay daghang pangutana mahitungod sa doktrina ug mga pagtuo sa Simbahan. Mibalik sa England paglabay sa duha ka tuig, hinuon, nahimamat niya ang pipila ka “makadasig nga mga misyonaryo” diha sa kadalanan sa London. Human maghisgot sa ebanghelyo uban nila sulod sa pipila ka bulan ug giingnan nga siya wala nag-uswag ngadto sa bunyag, sila nangutana kaniya kon gusto ba siya og panalangin.
“Miuyon ko nga hatagan og panalangin gikan sa usa ka senior nga misyonaryo nga akong nailhan,” nahinumdom siya. “Unsa ang akong gibati atol niana nga panalangin mao ang importante nga higayon sa akong pagkakabig. Dili gayod kadto ikalimod nga kahayag ug kalipay ug kalinaw nga walay pulong nga makahulagway. Ang mga pulong sa panalangin ebidensiya sa makadasig ug eksakto nga pagsabot.”
Kana nga kasinatian, dinuyogan sa “daghang uban pang mga butang sa akong pag-uswag ngadto sa bunyag,” migiya ni Patrick ngadto sa usa ka pagpamatuod bahin sa Manluluwas ug sa Iyang gipahiuli nga Simbahan. Paglabay sa duha ka bulan, sa bisperas sa pasko niadtong 1987, nabunyagan siya nga usa ka miyembro sa Ang Simbahan ni Jesukristo sa mga Santos sa Ulahing mga Adlaw.
Alang niadtong nagtinguha og pagpamatuod, miingon si Elder Kearon: “Pilia ang hugot nga pagtuo, ug dawata ang imbitasyon sa Alma 32. Sunda ang inyong espirituwal nga mga pagbati. Mogiya kini kaninyo, ug kamo makahibalo.”
“Usa ka Tinubdan sa Kalig-on“
Duha ka tuig human sa iyang bunyag, si Patrick nagtambong sa usa ka ward alang sa young single adult sa London sa dihang iyang nahimamat si Jennifer Hulme, usa ka estudyante sa Brigham Young University gikan sa Saratoga, California. Si Jennifer miadto sa London sulod sa unom ka bulan aron sa pagtuon sa kasaysayan sa art ug sa literatura sa Iningles. Ang kinamanghoran sa walo ka anak, siya gipadako diha sa Simbahan.
Hapit diha-diha dayon, nakagusto siya ni Patrick.
“Samtang nag-obserbar ko niya nga nakighalubilo sa mga tawo sa ward, nakita nako ang paagi sa iyang pagtagad kanila,” sulti ni Jennifer bahin ni Patrick. “Bisan usa ka bag-o nga miyembro, mibalik nga miyembro, usa ka tawo nga adunay mga kalisod, o usa ka tawo nga suod nga higala, gitagad niya ang tanan sa samang matang sa tinuod nga gugma ug tinguha. Kana nga kalidad maoy una ug labing nakapaduol nako ngadto kaniya. Usa kini ka kalidad nga akong nakita kaniya nga milambo, ug nga gibutang sa Dios sa maayong paggamit, sa sobra sa 33 ka tuig nga kami naminyo.”
Ang paghigugma ug pagtahod nila ni Elder ug Sister Kearon sa usag usa nakapahimo kanila nga magkahiusang magtinabangay pinaagi sa hugot nga pagtuo.
Human sa ilang panag-uyab, ang magtiayon naminyo sa Oakland California Temple niadtong Enero 1991. Dayon sila mipadako sa ilang pamilya didto sa England sulod sa 19 ka tuig hangtod nga si Elder Kearon gitawag niadtong 2010 isip usa ka Kinatibuk-ang Awtoridad nga Seventy human makaserbisyo sa pipila ka mga calling sa pagpangulo, lakip sa pagka-presidente sa stake ug sa pagka-Area Seventy. Nagserbisyo siya isip Senior nga Presidente sa Seventy sa dihang gitawag siya ngadto sa Korum sa Napulog Duha ka Apostoles.
Si Elder Kearon miingon nga ang iyang asawa usa ka matinud-anon nga disipulo kinsa nakaila sa iyang tinuod nga pagkatawo. “Nagpuyo siya og malipayon, positibo, malamboon, matinabangon, masadyaon nga kinabuhi, diin ang Manluluwas ang anaa sa sentro niining tanan. Siya ang tinubdan sa kalig-on ug usa ka dakong panalangin kanako sukad sa higayon nga nagkaila kami.”
Si Susannah, ang ikaduha sa tulo ka anak nga mga babaye sa magtiayon, miingon nga ang iyang inahan matinabangon: “Puno siya sa kinabuhi ug kahayag ug tinguha alang sa ebanghelyo.” Ug sama sa iyang amahan, ang iyang inahan usa ka “maayong tigpaminaw.”
Si Susannah ug ang iyang mga igsoon nga babaye miingon nga ang gugma ug pagtahod sa ilang mga ginikanan alang sa usag-usa nakapahimo kanila sa pagtinabangay nga nagkahiusa pinaagi sa hugot nga pagtuo ngadto sa susamang mga tumong. Maminaw sila sa usag-usa ug motahod ug mopasalamat sa mga hunahuna ug mga opinyon sa usag usa.
Si Emma, ang kinamanghoran nga anak nga babaye, miingon nga ang hapsay nga relasyon ug dayag nga paghigugma sa iyang mga ginikanan alang sa ilang mga anak “nakapahimo og usa ka malipayon kaayo ug luwas nga kahimtang sa panimalay.”
Si Lizzie Kearon Staheli, ang kinamagulangan, misulti bahin sa iyang amahan: “Si Papa motan-aw sa mga tawo gamit ang Kristohanong mga mata. Matinguhaon siya kanunay sa pag-awhag ug pagdasig sa mga tawo. Nakakita siya sa potensiyal sa matag usa, bisan unsa pa ang ilang mga sirkumstansiya.”
Si Emma midugang: “Puno siya sa hugot nga pagtuo ug nahigugma sa kalipay nga nahatag sa ebanghelyo ngadto kaniya. Ingon nga nakakaplag sa gipahiuli nga ebanghelyo sa iyang pagkahamtong, nahimuot siya sa kalainan nga nahimo niini sa kinabuhi sa usa ka tawo isip usa ka tinubdan sa kahayag og kalipay.”
Si Elder Kearon mitawag sa iyang mga anak nga babaye—Lizzie (gilitratohan uban sa iyang bana, si Jonathan), Susannah, ug Emma—“ang labing matahom nga kahayag sa among kinabuhi, ang among labing dako nga bahandi.”
Si Jean B. Bingham, kanhi Kinatibuk-ang Presidente sa Relief Society, mihulagway ni Elder Kearon nga kalma bisan sa kalisod. Nahinumdom siya sa usa ka panahon sa dihang siya, si Elder David A. Bednar sa Korum sa Napulog Duha ka Apostoles, si Elder Kearon, ug ang uban pa nga natanggong sa gawas sa nasod atol sa politikanhong kagubot. Ubos sa direksyon ni Elder Bednar, si Elder Kearon migahin og mga oras sa satellite nga telepono nga nakigsabot sa lokal nga mga opisyal ug sa mga representante sa Simbahan sa pagpangita og paagi nga sila makabiya.
“Ang iyang kalma nga kiniaya, nakapokus nga mga paningkamot, ug dinasig nga mga panglantaw nakahimo og solusyon nga nakapahimo sa among luwas nga pagbiya,” miingon si Sister Bingham.
Niadtong Disyembre 2021, ang pamilya nakugang sa pagkahibalo nga si Sister Kearon nadayagnos nga adunay kanser sa totoy.
“Wala gayod ako magtuo nga ang kanser moigo nako o namo,” miingon si Sister Kearon. Misulti siya nga ang nagpadayon nga pagtambal nga hilabihan ka lisod, apan ang Manluluwas mao ang iyang tinubdan sa kalig-on niining tanan. “Anaa gihapon ako sa oral chemotherapy, apan mapasalamaton ko nga mosulti nga ako wala nay kanser sumala sa gisulti sa mga doktor.”
Si Elder Kearon miingon: “si Jen nagmalig-on ug hingpit nga nagmatinud-anon latas niining tanan. Nagpasalamat kami matag adlaw alang sa iyang kahimsog, ug nagpasalamat kami sa maayo kaayo nga pag-atiman nga gihatag ngadto kaniya.”
Sa ubang mga pagsulay nga nasinati niya ug sa iyang bana, si Sister Kearon miingon, “Ang kinabuhi naghatag kanamo og mga butang nga yanong dili namo gusto nga buhaton. Dili kini namo gusto. Wala mi mangayo niini. Apan kinahanglan namong atubangon kini. Ang labing maayong paagi sa pag-atubang sa mga butang nga lisod mao ang pagduol ngadto sa Ginoo ug mangayo sa Iyang kusog, mobutang sa atong hugot nga pagtuo diha ni Jesukristo ug sa Iyang grasya ug gahom. Sa dugay nang panahon, ako nakakat-on og maayo mahitungod kon sa unsa nga paagi nga ang Manluluwas motabang nato sa atong labing grabe, labing lisod nga mga panahon.”
Si Elder ug si Sister Kearon nakaangkon nianang sagrado nga kahibalo human sa pagkatawo sa ilang unang anak, si Sean.
“Ang Lig-on nga Sukaranan sa Pag-ula ni Jesukristo”
Atol sa unang pagmabdos ni Sister Kearon, ang magtiayon sayong nakahibalo gikan sa mga ultrasound scan nga ang ilang anak nga lalaki adunay “usa ka malisod nga dili normal sa kasingkasing, usa ka makapahulga sa kinabuhi nga kondisyon,” miingon si Elder Kearon. “Gigahin namo ang nahibiling panahon sa pagmabdos sa pagpangita sa labing maayong mga doktor, mga doktor sa kasing-kasing, ug mga doktor nga moopera og kasing-kasing nga aduna sa mga kahimanan nga mosulbad sa iyang piho nga problema. Among nakit-an ang tibuok kalibotan nga bantogan nga grupo didto sa London, ug sila masaligon nga ilang masulbad ang problema.”
Ang mga doktor miopera ni Sean sa dihang nag-edad siya og 19 ka adlaw. Ang operasyon taas ug makuti. Pagkahuman, miingon si Elder Kearon, “Ang gamay nga kasingkasing ni Sean dili na mopitik. Mao nga, nawala siya kanamo. Ang iyang kamatayon hilabihan ka sakit. Dili kadto mao ang resulta nga among gipuasahan, giampoan, ug gipangamuyoan, apan nasayod kami nga ang kamot sa langit anaa niadto nga kasinatian.”
Si Sister Kearon miingon, “Ang Dios migiya namo niadtong mga bulan sa pagmabdos ug sa matahom, mubo nga kinabuhi sa among anak nga lalaki sa paagi nga, sa kataposan niini, nasayod kami nga among nabuhat ang tanan nga among mahimo alang kaniya. Usa kadto ka dakong kahupayan.”
Ang pagkaayo nagagikan sa usa ka dugang nga pagsabot sa Pag-ula ug sa Pagkabanhaw sa Manluluwas nga naangkon ni Sister Kearon gikan sa tumang pagtuon sa 1 Nephi ug 2 Nephi. “Sa kaguol nga kami namatyan og minahal, gibati nako ingon og ako madaog sa tumang kasakit,” miingon siya. “Ug pero, matag karon ug unya, kanang pagkahulog gitabangan sa lig-on nga sukaranan sa Pag-ula ni Jesukristo—tungod kay kini tinuod. Ang Iyang grasya, ang reyalidad nga Siya buhi, makahimo sa labing masakit nga mga kawad-on nga malahutay ug mapuno sa paglaom.”
Ang pagkaayo miabot sa pagkatawo sa tulo ka anak nga babaye sa magtiayon. “Gidala nila ang pagkaayo,” miingon si Elder Kearon. “Sila ang labing matahom nga kahayag sa among kinabuhi, ang among labing dako nga mga bahandi.”
Ang pagkaayo nagagikan sa mga pulong sa nadasig nga mga lider sa Simbahan, lakip sa usa ka pakigpulong ni Elder Lance B. Wickman sa kinatibuk-ang komperensiya,5 diin si Elder Wickman mipakigbahin sa kasakit sa mabalak-ong paglakaw-lakaw sa mingaw nga pasilyo sa ospital sa dihang ang iyang kaugalingong gamay nga batang lalaki naghigda nga himatyon tungod sa sakit sukad pa sa pagkabata. “Si Elder Wickman nagtudlo nga ang ‘pagtuo mao ang pagkakita’ ug nga ang hugot nga pagtuo mao ang pagsalig diha sa Ginoo,” miingon si Elder Kearon. “Ang iyang pakigpulong bililhon kaayo kanako tungod sa iyang klaro nga pagsabot sa mao nga kasinatian. Kini mas nasabtan pa tungod sa gidaghanon sa higayon nga ako mibasa niini ug naminaw niini.”
Ug ang pagkaayo miabot gikan sa pagpangalagad ngadto sa uban sa ilang mga kasakit—ma-refugee man sila sa Europe,6 sa giabusaran o gidaogdaog,7 o sa isig ka lider sa Simbahan sama ni Elder Paul V. Johnson sa Kapangulohan sa Seventy, kinsa namatyan og anak nga babaye tungod sa kanser duha ka bulan sa wala pa moapil uban ni Elder Kearon sa Kapangulohan sa Area sa Europe niadtong 2015.
“Siya ug si Sister Kearon mga maayo kaayong mitabang kanamo nianang panahon sa pagbangotan ug pagkaayo,” miingon si Elder Johnson. “Sensitibo kaayo sila sa among sitwasyon. Gimahal nako sila kanunay tungod niana.”
Mao gayod kana ang paagi sa pagkadisipulo. Motabang kita sa palas-anon sa uban. Magbangotan kita uban niadtong nagbangotan. Mohupay kita niadtong nanginahanglan og kahupayan. Ug mobarog kita isip mga saksi sa Dios—ug sa mahangtorong saad sa malipayong panaghiusa nga nahimong posible pinaagi sa Pag-ula ni Jesukristo. (Tan-awa sa Mosiah 18:8–9.)
Si Elder Kearon mitimbaya sa mga miyembro sa Europe East Area.
Dayon, kon ang mga panahon sa pagsulay moabot kanato, kanang makaayo nga gugma ug pangalagad nga tambal mabalosan. Isip usa ka Apostol ni Ginoong Jesukristo, si Elder Kearon andam nga mopakigbahin sa tibuok kalibotan nianang mensahe sa ebanghelyo sa paglaom, pagkaayo, ug kalinaw.
“Ngano nga ang malisod nga mga pagsulay mahitabo kanato?” Si Elder Kearon nangutana. “Tungod kay kita mianhi sa yuta aron makat-on, aron motubo, aron mabalaan, ug aron mahigugma ug mosalig sa atong Amahan sa Langit ug sa atong Manluluwas. Sa pagkakaron, kita dili makakita Kanila, ug Sila dili makagunit kanato. Apan ang mga panalangin sa Pag-ula sa Manluluwas walay kinutoban—walay kinutoban!”