Brother Gabriel W. Reid

Ikaduhang Magtatambag sa Kinatibuk-ang Kapangulohan sa Sunday School

Alang ni Gabriel W. Reid, usa sa labing magantihon nga mga bahin sa pagkalider sa misyon mao nga makakita sa mga misyonaryo nga “magbusog sa mga pulong ni Kristo,” makapalambo og gugma alang sa mga kasulatan, ug magtinguha nga mas mahisama sa Manluluwas.

“Kon inyo gayod nga madiskobrehan ug masabtan kon unsaon sa paghimo sa inyong pagtuon sa ebanghelyo nga ‘makapahimuot’ nganha kaninyo, sama sa gisulti diha sa mga kasulatan [tan-awa sa Alma 32:28], mao kanang higayon nga mausab ang inyong kinabuhi,” miingon si Brother Reid, kinsa mitapos sa iyang pagserbisyo isip presidente sa Australia Sydney Mission niadtong Hulyo.

Si Brother Reid natawo sa Pago Pago, American Samoa. Makasulti siya og Samoan, Kinatsila, ug Iningles. Sa Samoan, siya miingon, ang pulong pagbusog sa Basahon ni Mormon gihubad nga “taumamafa fiafia” ug sa Kinatsila “deleitar.” Miingon siya nga ang duha ka pulong nagpasabot og kahimuot.

Isip usa ka magtatambag sa bag-ong Kinatibuk-ang Kapangulohan sa Sunday School, “Naghinamhinam ako sa pagtabang sa uban nga makakita kon unsa ka dako sa kalipay sa pagtuon sa mga kasulatan,” miingon siya.

Si Gabriel “Gabe” Walter Po’u Reid natawo niadtong Mayo 28, 1977, ngadto nila ni Eugene ug Tupu Reid ug nagdako sa baryo sa Leone sa American Samoa. Ang iyang gugma sa Dios ug ang tinguha sa pag-una Kaniya nagsugod sa linghod nga pangidaron ug mipalahutay niya samtang siya nagdula og football alang sa Brigham Young University gikan sa 1999 hangtod 2002 ug dayon mipadayon sa pagtrabaho sa National Football League gikan sa 2003 hangtod 2006.

Atol nianang panahona sa iyang kinabuhi, nakat-on siya og bililhong leksiyon: “Kon ang Ginoo mosulti nimo og butang, sa kinasingkasing ‘ihalad sa hingpit ang imong kaugalingon .’”

Si Brother Reid naminyo kang Heather Lynn Sasse sa Bountiful Utah Temple niadtong Hunyo 24, 2000. Sila adunay upat ka anak. Migradwar siya sa BYU niadtong 2002 sa usa ka bachelor’s degree in international relations. Karon nanag-iya siya og kompaniya nga nagdumala sa konstruksiyon.

Agi og dugang sa pagdumala sa Australia Sydney Mission, si Brother Reid nakaserbisyo isip usa ka magtatambag sa kapangulohan sa stake, high councilor, bishop, presidente sa Young Men sa ward, ordinance worker sa templo, ug full-time missionary sa Chile Santiago South Mission gikan sa 1996 hangtod 1998.