Mga Balita sa Simbahan

Napanag-iya sa Simbahan ang Templo sa Kirtland, Ubang Kabtangan

Niadtong Marso 5, 2024, ang responsibilidad ug pagpanag-iya sa Templo sa Kirtland sa Ohio, sa pipila ka makasaysayanong gambalay sa Nauvoo, Illinois, ug sa nagkadaiyang mga manuskristo ug mga artifact opisyal nga gibalhin gikan sa Community of Christ ngadto sa Ang Simbahan ni Jesukristo sa mga Santos sa Ulahing mga Adlaw.

Ang Templo sa Kirtland gipahinungod niadtong 1836 (tan-awa sa Doktrina ug mga Pakigsaad 109–110), apan sa wala madugay ang mga Santos kinahanglang mobiya niini tungod sa pagpanggukod. Pagkahuman sa bag-ong pagbalhin sa pagpanag-iya, ang templo gisirhan sa mubo nga panahon apan giablihan pag-usab niadtong Marso 25 alang sa mga pag-tour sa publiko nga walay bayad. Magpabilin kini nga makasaysayanong gambalay.

Sa samang paagi, sa Nauvoo ang Smith Family Homestead, ang Mansion House (panimalay ni Joseph ug Emma gikan sa 1843 hangtod sa iyang kamatayon niadtong 1844), ug ang Red Brick Store (diin natukod ang Relief Society) giablihan usab pag-usab sulod sa tibuok tuig alang sa mga pag-tour sa publiko nga walay bayad.