Presidente Paul V. Johnson

Kinatibuk-ang Presidente sa Sunday School

Gikan sa iyang trabaho isip usa ka magtutudlo sa seminary ngadto sa siyam ka tuig nga iyang gigahin isip komisyoner sa edukasyon sa Simbahan, ang umaabot nga Kinatibuk-ang Presidente sa Sunday School nga si Paul V. Johnson adunay daghang kasinatian sa pagtudlo sa ebanghelyo. Apan ang labing importante nga kalidad nga iyang madala ngadto sa iyang bag-ong calling, miingon siya, mao ang “akong gugma alang sa akong Langitnong Amahan ug sa Manluluwas ug ang akong gugma alang sa mga batan-on ug sa ubang mga tawo usab.”

Si Presidente Johnson natawo niadtong Hunyo 24, 1954, sa Gainesville, Florida, USA, ngadto nila ni Vere Johnson ug Winifred Amacher. Sa wala pa siya mag-edad og usa ka tuig, ang iyang mga ginikanan mibalhin ngadto sa Logan, Utah, USA, diin sila mipadako kaniya ug sa iyang pito ka igsoon.

Nakaila niya ang iyang umaabot nga asawa, si Jill Washburn, sa dihang gikuha siya nga modula sa high school nga football didto sa Monticello, Utah, sa usa ka kanhi coach nga mibalhin didto gikan sa Logan. Si Paul ug si Jill nagkahimamat na sa una, apan karon nahimo na silang mga higala samtang nagtambong sa sama nga ward ug sa klase sa seminary. Si Sister Johnson misulat ngadto kaniya samtang nagserbisyo siya og full-time nga misyon sa Norway.

Naminyo sila niadtong Agosto 18, 1976, sa Logan Utah Temple. Sila adunay 9 ka anak ug 43 ka apo.

Ang mga Johnson nakaatubang sa ilang mga pagsulay usab, gikan sa pagkamatay sa usa ka anak nga babaye tungod sa kanser ngadto sa pagpakigbisog sa ilang kaugalingon nga mga hagit sa panglawas. Apan si Presidente Johnson miingon nga kadto nga mga kasinatian nakahulma sa iyang panglantaw sa plano sa Dios. “Sa akong hunahuna nakahimo kini nako, isip usa ka magtutudlo, sa pagtinguha sa pagtabang sa mga batan-on nga makasabot sa Manluluwas ug sa ilang Langitnong Amahan,” miingon siya.

Si Presidente Johnson nakaangkon og bachelor’s degree sa zoology niadtong 1977 ug usa ka master’s degree sa pagtambag ug paggiya niadtong 1978, kining duha gikan sa Brigham Young University. Nakaangkon siya og doctor of education degree gikan sa Utah State University niadtong 1989.

Si Presidente Johnson gipaluyohan isip usa ka Kinatibuk-ang Awtoridad nga Seventy niadtong Abril 2005 ug nagserbisyo isip sakop sa Kapangulohan sa Seventy sukad niadtong Agosto 1, 2021. Nakaserbisyo siya isip usa ka magtatambag sa Kapangulohan sa Area sa Europe, magtatambag sa Kapangulohan sa Area sa Chile, magtatambag sa stake, ug bishop.

Hatagan siya og emeritus nga kahimtang, nga moepekto sa Agosto 1, 2024, kon magsugod na siya sa iyang bag-ong calling.