Pagkausa ngadto ni Kristo
Nagkahiusa kita pinaagi sa atong gugma ug pagtuo ngadto ni Jesukristo ug sa Iyang Pag-ula. Ang sukaranang kinaiya sa tinuod nga pagkasakop mao ang pagkausa ngadto ni Kristo.
Gibati nako sa hilabihan ang Pag-ula ni Jesukristo sukad sa gamay pa ko, apan ang pagkatinuod sa Pag-ula sa Manluluwas akong nasinati sa dihang nag-edad ko og 25. Bag-o lang ko nakagradwar gikan sa Stanford Law School ug nagtuon alang sa California bar exam. Mitawag ang akong mama ug miingon nga ang akong lolo nga si Crozier Kimball, nga nagpuyo sa Utah, himatyon. Miingon siya, nga kon gusto kong makakita kaniya, mas maayong mopauli ko. Ang akong lolo nag-edad og 86 ug luya na kaayo. Nindot ang akong pagbisita. Nahimuot kaayo siya nga nakakita nako ug mipakigbahin sa iyang pagpamatuod ngari nako.
Sa dihang si Crozier nag-edad og tres anyos pa, ang iyang amahan, nga si David Patten Kimball, namatay sa edad nga 44.1 Nanghinaot si Crozier nga ang iyang amahan ug ang iyang lolo, nga si Heber C. Kimball, moaprobar sa iyang kinabuhi ug mobati siya nga nagmatinud-anon sa iyang kabilin.
Ang unang tambag sa akong lolo kanako mao ang paglikay sa bisan unsang pagbati nga may katungod [entitlement] o pribilihiyo tungod lang kay aduna siya niining matinud-anong mga katigulangan. Gisultihan ko niya nga ang akong tutokan kinahanglan mao ang Manluluwas ug ang Pag-ula sa Manluluwas. Miingon siya nga kitang tanan mga anak sa usa ka mahigugmaong Langitnong Amahan. Bisan kinsa pa ang atong yutan-ong mga katigulangan, ang matag usa nato mo-report sa Manluluwas kon giunsa nato sa pagtuman ang Iyang mga sugo.
Si Lolo mipasabot nga ang Manluluwas mao ang “Magbalantay sa Ganghaan,” sumala sa 2 Nephi 9:41. Siya misulti nako nga nanghinaot siya nga unta igo na ang iyang paghinulsol aron makaangkon sa kaluoy sa Manluluwas.2
Ako natandog sa hilabihan. Ako nasayod nga siya matarong nga tawo. Siya usa ka patriyarka ug nagserbisyo og pipila ka misyon. Siya mitudlo nako nga walay usa nga makabalik sa Dios pinaagi lamang sa maayong mga buhat nga wala ang benepisyo sa pag-ula sa Manluluwas. Makahinumdom ako hangtod niining adlawa sa dakong gugma ug pagpasalamat ni Lolo alang sa Manluluwas ug sa Iyang Pag-ula.
Niadtong 2019 atol sa usa ka buluhaton didto sa Jerusalem,3 mibisita ko sa usa ka lawak sa itaas nga tingali duol sa dapit diin ang Manluluwas mihugas sa mga tiil sa Iyang Apostoles sa wala pa ang Iyang Pagkalansang sa Krus. Natandog ako sa espirituwal nga paagi ug naghunahuna giunsa Niya pagsugo ang Iyang Apostoles nga maghigugmaay sa usag usa.
Nakahinumdom ko sa Mapangaliyupoong Pag-ampo sa Manluluwas alang kanato. Kini nga pag-ampo nahitabo gayod sa naghinapos nga mga oras sa Iyang mortal nga kinabuhi sumala sa narekord sa Ebanghelyo ni Juan.
Kini nga pag-ampo gitumong ngadto sa mga sumusunod ni Kristo, lakip natong tanan.4 Diha sa hangyo sa Manluluwas ngadto sa Iyang Amahan, Siya nangamuyo “aron silang tanan mausa ingon nga ikaw, Amahan, ania kanako, ug ako anaa kanimo, aron sila usab maania kanato.” Ang Manluluwas mipadayon, “Ang himaya nga imong gihatag kanako akong gihatag ngadto kanila aron sila mausa, ingon nga kita usa.”5 Ang pagkausa mao ang giampo ni Kristo sa wala pa Siya budhii ug Ilansang sa Krus. Ang pagkausa ngadto ni Kristo ug sa atong Langitnong Amahan maangkon pinaagi sa Pag-ula sa Manluluwas.
Ang makaluwas nga kaluoy sa Ginoo wala magdepende sa kaliwatan, edukasyon, ekonomikanhong kahimtang, o tribo. Gibase kini sa pagkausa ngadto ni Kristo ug sa Iyang mga sugo.
Si Propeta Joseph Smith ug Oliver Cowdery nakadawat og pagpadayag bahin sa organisasyon ug panggobyerno sa Simbahan niadtong 1830, wala madugay human maorganisar ang Simbahan. Ang unsay karon mao na ang seksiyon 20 gibasa ni Propeta Joseph sa unang komperensiya sa Simbahan ug mao ang unang pagpadayag nga giaprobahan pinaagi sa pag-uyon sa tanan.6
Ang sulod niini nga pagpadayag talagsaon gayod. Nagtudlo kini nato sa kaimportante ug sa tahas sa Manluluwas ug unsaon nga maka-akses sa Iyang gahom ug mga panalangin pinaagi sa Iyang maulaong grasya. Si Propeta Joseph 24 anyos ug nakadawat na og daghang pagpadayag ug mihuman sa hubad sa Basahon ni Mormon pinaagi sa gasa ug gahom sa Dios. Sila si Joseph ug Oliver nailhan isip naorden nga Apostoles, nga adunay awtoridad sa pagdumala sa Simbahan.
Ang mga bersikulo 17 hangtod 36 naglangkob sa summary sa importante nga doktrina sa Simbahan, lakip sa pagkatinuod sa Dios, sa Paglalang sa tawo, sa Pagkapukan, ug sa plano sa Langitnong Amahan sa kaluwasan pinaagi sa Pag-ula ni Jesukristo. Ang bersikulo 37 naglangkob sa importante nga mga kinahanglanon alang sa bunyag ngadto sa Simbahan sa Ginoo. Ang mga bersikulo 75 hangtod 79 mihan-ay sa mga pag-ampo alang sa sakramento nga atong gigamit matag Igpapahulay.
Ang doktrina, mga baroganan, mga sakramento, ug mga praktises nga giestablisar sa Ginoo pinaagi ni Joseph Smith, ang Propeta sa Pagpahiuli, importante kaayo.7
Ang mga kinahanglanon alang sa bunyag, bisan bug-at, apan lahi ang pagkayano. Kasagaran naglakip kini sa pagkamapainubsanon sa atubangan sa Dios, usa ka masulub-on nga kasingkasing ug mahinulsolon nga espiritu,8 paghinulsol sa tanang sala, pagdala ngari nato sa ngalan ni Jesukristo, paglahutay hangtod sa kataposan, ug pagpakita sa atong mga buhat nga gidawat nato ang Espiritu ni Kristo.9
Mahinungdanon nga ang tanang kwalipikasyon alang sa bunyag mga espirituwal. Walay ekonomikanhon o sosyal nga kalamposan ang gikinahanglan. Ang kabos ug ang adunahan adunay pareha nga espirituwal nga mga kinahanglanon.
Walay mga kinahanglanon sa tribo, gender, o kultura. Ang Basahon ni Mormon miklaro nga ang tanan gidapit sa pag-ambit sa kaayo sa Ginoo, “itom ug puti, ulipon ug gawasnon, lalaki ug babaye; … ang tanan managsama ngadto sa Dios.”10 “Apan ang tanan nga mga tawo adunay kahigayonan ang usa sama ngadto sa uban, ug walay usa nga gidid-an.”11
Mahitungod sa atong “kapareha” sa atubangan sa Dios, dili na importante ang paghatag og gibug-aton sa atong mga kalainan. Ang uban sayop nga miawhag nato “sa paghunahuna sa mga tawo nga mas lahi kaayo gikan sa atong kaugalingon ug gikan sa usag usa kay sa unsa gayod sila. Ang [uban] mogamit sa tinuod, apan ginagmay nga mga kalainan, ug padak-on pa kini pag-ayo.”12
Agig dugang, ang uban sayop nga nagtuo nga tungod kay ang tanang tawo gidapit sa pagdawat sa Iyang kaayo ug kinabuhing dayon, wala nay mga kinahanglanon sa kinaiya.13
Apan, ang mga kasulatan nagmatuod nga ang tanang tawo nga may tulubagon kinahanglan nga maghinulsol sa ilang mga sala ug motuman sa Iyang mga sugo.14 Ang Ginoo miklaro niini nga ang tanan adunay moral nga kabubut-on ug “gawasnong mopili sa kalingkawasan ug kinabuhing dayon, pinaagi sa halangdong Tigpataliwala sa tanang katawhan, … ug mopatalinghog sa iyang mahinungdanon nga mga sugo; ug magmatinud-anon sa iyang mga pulong, ug mopili sa kinabuhing dayon.”15 Aron makadawat sa mga panalangin sa Pag-ula sa Manluluwas, kinahanglan nga kita positibong mogamit sa atong moral nga kabubut-on sa pagpili ni Kristo ug sa pagsunod sa Iyang mga sugo.
Sa akong kinabuhi, ang kahulogan sa “kabubut-on” ug “gawasnong kabubut-on” gisusi ug gilalisan. Dihay panaglalis ug padayon nga nagkadaghang intelektuwal nga mga panaglatugi bahin niini nga mga hilisgotan.
Sa bag-o nga hapin sa usa ka dakong gimantala sa alumni sa unibersidad, usa ka inila nga propesor sa biology mipahayag, “Walay luna ang gawasnong kabubut-on.”16 Dili ikasurprisa, ang propesor nagkutlo sa artikulo nga nag-ingon, “Walay Dios, … ug walay gawasnon nga kabubut-on, ug kini usa ka lapad, walay kalainan, walay sulod nga uniberso.”17 Dili ako makasupak pa og dugang.
Usa ka sukaranan nga doktrina sa atong tinuohan mao nga kita adunay moral nga kabubut-on,18 nga naglakip sa gawasnon nga kabubut-on.19 Ang kabubut-on mao ang abilidad sa pagpili ug pagbuhat. Importante kini sa plano sa kaluwasan. Kon wala ang moral nga kabubut-on dili kita makat-on, mouswag o makapili nga mausa ngadto ni Kristo. Tungod sa moral nga kabubut-on, kita “gawasnon nga mopili sa kalingkawasan ug sa kinabuhing dayon.”20 Didto sa kinabuhi nga wala pa dinhi sa yuta nga Konseho sa Langit, ang plano sa Amahan naglakip sa kabubut-on isip usa ka mahinungdanon nga elemento. Mirebelde si Lucifer “ug nagtinguha sa paglaglag sa kabubut-on sa tawo.”21 Tungod niini, ang pribilehiyo sa pag-angkon og mortal nga lawas gihikaw kang Satanas ug niadtong misunod kaniya.
Ang uban nga premortal nga mga espiritu migamit sa ilang kabubut-on sa pagsunod sa plano sa Langitnong Amahan. Ang mga espiritu nga napanalanginan nga matawo niining mortal nga kinabuhi padayon nga adunay kabubut-on. Gawasnon kita nga mopili ug molihok, apan dili kita makakontrolar sa mga sangpotanan. “Ang pagpili sa maayo ug pagkamatarong modangat ngadto sa kalipay, kalinaw, ug kinabuhing dayon, samtang ang pagpili sa sala ug daotan sa ngadto-ngadto modangat ngadto sa kasakit ug kagul-anan.”22 Sama sa gisulti ni Alma, ang “Pagkadaotan dili gayod mahimong kalipay.”23
Dinhi sa kalibotan nga daghan og kompetensya, kanunay adunay paningkamot nga molabaw. Ang pagpaningkamot nga mahimong labing maayo usa ka matarong ug mapuslanon nga paningkamot. Subay kini sa doktrina sa Ginoo. Ang mga paningkamot sa pagpakunhod o pagsaway sa uban o maghimo og mga babag sa ilang paglampos supak sa doktrina sa Ginoo. Dili nato mabasol ang mga sirkumstansya o ang uban alang sa desisyon nga molihok nga sukwahi sa mga sugo sa Dios.
Sa kalibotan karon, sayon ang pagtutok sa materyal ug panarbaho nga kalamposan. Ang uban nawad-an sa panglantaw sa mahangtorong mga baroganan ug mga pagpili nga adunay mahangtoron nga kahulogan. Magmaalamon kita sa pagsunod sa tambag ni Presidente Russell M. Nelson sa “paghunahuna og celestial.”24
Ang labing mahinungdanong mga pagpili mahimong himoon hapit sa tanan bisan unsa pa ang mga talento, mga abilidad, mga oportunidad, o ekonomikanhong mga kahimtang. Ang paghatag og gibug-aton sa pagpili pag-una sa pamilya importante. Klaro kini sa tibuok nga kasulatan. Hunahunaa ang asoy ni 1 Nephi diin si Lehi “mibiya padulong sa kamingawan. Ug gibiyaan niya ang iyang balay, ug ang yuta nga iyang kabilin, ug ang iyang mga bulawan, ug ang iyang mga pilak, ug ang iyang mahalon nga mga butang, ug siya walay laing gidala, gawas sa iyang pamilya.”25
Samtang mag-atubang kita og mga kausaban sa kinabuhi, daghan nga panghitabo nga gamay ra o kita walay kontrol. Mga hagit sa kahimsog ug mga aksidente klarong mohaom niini nga kategoriya. Ang bag-ong COVID-19 nga pandemya grabeng nakaapekto sa mga tawo nga naghimo og tanan nga eksakto. Alang sa labing importante nga mga pagpili, kita adunay kontrol. Balik sa akong mga adlaw sa pagkamisyonaryo, si Elder Marion D. Hanks, ang among presidente sa misyon, mipasag-ulo namo kabahin sa usa ka balak ni Ella Wheeler Wilcox:
Walay kahigayonan, walay kapalaran, walay dangatan,
Makausab o makapugong o makakontrola
Sa lig-ong determinasyon sa determinado nga kalag.26
Apan mahitungod sa baroganan, pamatasan, relihiyoso nga buhat, ug matarong nga pagpuyo, kita ang nagkontrolar. Ang atong hugot nga pagtuo ug pagsimba sa Dios nga Amahan ug sa Iyang Anak, si Jesukristo, usa ka pagpili nga atong himoon.27
Palihog sabta nga ako wala mag-awhag nga dili kaayo magtinguha og edukasyon o panarbaho. Unsay akong gisulti mao nga kon ang mga paningkamot nga may kalabotan sa edukasyon ug trabaho mas molabaw pa sa pamilya o sa pagkahimong usa ngadto ni Kristo, ang wala damhang mga sangpotanan mahimong mas grabe pa.
Ang klaro ug yanong doktrina nga anaa sa Doktrina ug mga Pakigsaad 20 makapatandog ug makapaawhag tungod kay kini midugang ug miklaro sa sagradong espirituwal nga mga konsepto. Nagtudlo kini nga ang kaluwasan moabot kon si Jesukristo mohatag og kaangayan ug mobalaan sa mahinulsolong mga kalag tungod sa grasya sa Manluluwas.28 Kini nag-andam sa kahimtang alang sa nag-unang tahas sa Iyang Pag-ula.
Kinahanglan nga paningkamotan nato nga maapil ang uban sa atong grupo sa panaghiusa. Kon atong sundon ang pahimangno ni Presidente Russell M. Nelson sa pagpundok sa nagkatibulaag nga Israel sa duha ka habig sa tabil, kinahanglan natong iapil ang uban sa atong sirkulo sa panaghiusa. Sama sa maanindot kaayong pagkatudlo ni Presidente Nelson: “Sa matag kontinente ug tabok sa tanang isla sa dagat, ang matinud-anon nga katawhan gipangpundok ngadto sa Ang Simbahan ni Jesukristo sa mga Santos sa Ulahing mga Adlaw. Ang panagkalahi sa kultura, pinulongan, pamayhon, kaliwat, ug nasyonalidad molubad ngadto sa pagkawalay kahulogan kon ang tawong matinud-anon mosulod sa dalan sa pakigsaad ug moduol sa atong pinalangga nga Manunubos.”29
Nagkahiusa kita pinaagi sa atong gugma ug pagtuo kang Jesukristo ug isip mga anak sa mahigugmaong Langitnong Amahan. Ang sukaranang kinaiya sa tinuod nga pagkasakop mao ang pagkausa ngadto ni Kristo. Ang mga ordinansa sa bunyag ug sa sakramento nga anaa sa Doktrina ug mga Pakigsaad 20, uban sa atong mga pakigsaad sa templo, naghiusa nato sa espesyal nga mga paagi ug motugot nato nga mahiusa sa matag importanting paagi sa kahangtoran ug sa pagpuyo sa kalinaw ug panag-uyon.
Ako mohatag sa akong segurado ug piho nga pagsaksi nga si Jesukristo buhi, ug tungod sa Iyang Pag-ula, kita mausa ngadto ni Kristo. Sa sagradong ngalan ni Jesukristo, amen.