Ngaahi peesi fakalotofonuá
Fakaafeʻi ʻo e Kakai Lalahi kei Talavou Kilipatí ke Nau ʻFakakaukau Fakasilesitiale’ mo Fiefia ʻia Sīsū Kalaisi
Fakataha ʻaho ʻe nima ʻa e Siasí ʻi he kaveinga “ʻOku ou faʻa-fai ʻa e ngaahi meʻa kotoa pē ʻia Kalaisi” (Filipai 4:13), naʻe fakahoko ia maʻá e kau taautaha kei talavoú (YSA), taʻu 18–30, ʻi he Ako Māʻolunga Molonaí ʻi Talauā, Kilipati ʻi he fakaʻosinga ʻo e 2023.
Ko ha toko 300 tupu naʻe kaú, naʻa nau ōmai mei he Fakatonga ʻo Talauā, Petió mo ha ngaahi ʻotu motu ʻe niʻihi, kau ai ʻa e Motu Kilisimasí.
Naʻe vahevahe ai ʻe ʻEletā Selemī R. Saki, ko ha mēmipa ʻo e Kau Palesitenisī Fakaʻēlia ʻo e Pasifikí ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ha pōpoaki ʻo e ʻofa mo e fiefia pea mo e kakai lalahi kei talavoú, ʻi he Zoom.
Naʻe pehē ʻe ʻEletā Saki, “ʻOku tau hoko ko e fāmili pē ʻe taha ʻi he māmaní. ʻOku taʻengata hotau laumālié. Kimuʻa ʻi hotau fanauʻi maí, naʻa tau nofo kotoa mo e Tamai Hévaní. ʻE ʻi ai ʻa e ʻaho ʻe ʻalu ai hotau sinó “ʻi he huʻunga ʻo māmaní,” ka ko hotau uhó, ʻa hotau laumālié ʻe kei moʻui pē. Tuʻunga ʻi he ikunaʻi ʻe Sīsū Kalaisi ʻa e maté, te ne ʻai hotau laumālié, ʻi hono mālohí, ke toe fakataha mo hotau sinó. ʻE ʻikai ke toe ʻi ai ʻa e mamahí mo e maté, pea te tau fiefia.”
Naʻá ne hoko atu ʻo pehē, “ʻOku tau moʻua kotoa ʻi ha fehālaaki, ka ʻoku ʻikai fiemaʻu ke tau loto-mamahi ʻo taʻengata koeʻuhí ko ʻetau fehalākí. Te tau lava ʻo fakatomala fiefia he naʻe āfeitaulalo ʻa Sīsū ke ne fuesia ʻetau ngaahi fehalākí. Ko ia, malimali!”
Naʻe ʻeke ʻe ʻEletā Saki ki he kulupú, “ʻOku mou manatuʻi ʻa e meʻa naʻe fakaafeʻi ʻe Palesiteni Lāsolo M. Nalesoni ke tau faí? Naʻe pehē ʻe Palesiteni Nalesoni, ʻFakakaukau Fakasilesitiale.’”
“Hoko ʻo fakakaukau fakalaumālie pea tokanga ki he ngaahi tāpuaki taʻengata ʻoku fakatatali maʻaú.” Naʻá ne pehē, “ʻFakakaukau Fakasilesitiale’ ʻaki haʻo teuteu ke maʻu ho ʻenitaumeni he temipalé.”
Naʻe toe pehē ʻe ʻEletā Saki, “ʻOku fakahā atu kiate koe ʻi he temipalé ʻa e founga ke ke fakalakalaka ai ki ha moʻui fakasilesitialé. ʻOkú ke ofi ange ki he Fakamoʻuí ʻi he temipalé. Ko ho ʻenitaumeni fakatemipalé ko ha tāpuaki ia ke ke maʻu lahi ange Hono mālohí. ʻE lava ke ikunaʻi ʻa e ngaahi pole mo e ngaahi faingataʻa ʻi hoʻo moʻuí ʻaki ʻa e fakakaukau fakasilesitialé.”
Naʻe kau atu ʻa ʻEletā Iousua Tune, ko ha Fitungofulu Fakaʻēlia ʻoku nofo ʻi Kilipati ki he fakatahá. Naʻá ne fakahinohinoʻi ʻa e kakai lalahi kei talavoú ke ngāue ʻi he maau mo fakahokohoko totonu pea fakatokangaʻi ʻa e sīpinga ke maʻu ai ha moʻui ‘oku fiefiá.
Naʻá ne fakamatalaʻi ko e sīpinga ʻo e moʻuí ke “fakatupulaki hoʻo tui kia Sīsū Kalaisí; ngāue fakafaifekau loto-fiefia maʻá e ʻEikí; mali ʻi he temipale māʻoniʻoni ʻo e ʻEikí ki ʻitāniti; hoko atu ke ako fakaʻaho ʻi he lotu, ako folofola, pea mo e ngaahi lea ʻa e kau palōfita ʻo e Ngaahi ʻAho Kimui Ní; pea nofo maʻu ʻi he hala ʻo e fuakava ʻa e ʻEikí.”
Mei he Lea Fakatātā 3: 5-6, naʻe fakaafeʻi ai ʻe ʻEletā Tune ʻa e kakai lalahi kei talavoú ke nau: “Falala ki [he ʻEikí] ʻaki [honau] lotó kotoa.’” Naʻá ne palōmesi ange ʻe hanga ʻe Sīsū Kalaisi ʻo “ʻfakatonutonu [honau] ngaahi ʻaluʻangá’ ʻi heʻenau fononga ki he moʻui fakasilesitialé.”
Naʻe kau ʻi he fakatahá ʻaki ha ako ʻi he ngaahi tefito ʻo e moʻui lelei fakaesino mo fakalaumālié, mo e moʻui fakafalala pē kiate kitá. Naʻe toe kau foki ai mo ha ako fakatakimuʻa, ko ha faingamālie ke vahevahe ʻa e ngaahi talēnití, mo e ngaahi faiva fakafonuá.
Naʻe toe tokoni foki ʻa e kakai kei talavoú ni ke fakamaʻa ʻa e kelekele ʻo e Falemahaki Tungalu Lotolotó, ko ha matātahi ʻi ʻEmipou, mo e Malaʻe Vaʻinga Pailikí.
Naʻe fokotuʻutuʻu ʻa e fakatahá ʻe he kau taki ʻo e Siasí ʻi Kilipatí. Naʻe fakaʻaongaʻi ʻe ʻEletā mo Sisitā Fuimāono, ko ha ongo faifekau matuʻotuʻa mei Haʻamoa, ha ngaahi houa lahi ʻi he teuteu mo poupou kiate kinautolu naʻe kau ʻi he ngaahi polokalamá.
ʻOku ngāue taʻetotongi ʻa e kāingalotu ʻo e Siasí ʻi he funga ʻo e māmaní ʻi honau ngaahi koló ʻi he lolotonga ʻo e taʻú kakato pea tautautefito ki he faʻahitaʻu Kilisimasí. ʻOku akoʻi ʻe he ngaahi ngāué ni hono mahuʻinga ʻo e ʻofá mo e ngāue fakaetauhi ki he kakai ʻoku laveangofuá pea mo hono tokangaʻi ʻo e ʻātakaí.
ʻOku poupouʻi ʻa e kāingalotu ʻo e Siasí ke nau moʻui hangē ko e Fakamoʻuí ʻo faitokonia ʻa e kakaí hangē ko ia naʻá Ne faí, ʻi he kotoa ʻo ʻenau moʻuí.