Ngaahi peesi fakalotofonuá
Maʻu ʻe ha Taha Hiva Melipoane ha Ngaahi Mana ʻi he Fonongaʻanga ʻi he Mūsiká
Naʻe fakaiku ʻa e ngaahi taʻu ʻo e maná mo e faingamālié ke maʻu ʻe he tokotaha ʻAositelēlia ko Sikoti Hemilitoní, ʻa e pale ʻuluaki ʻo e Praiseworthy Award (Pale Fakalāngilangí) mei he kautaha fakalakalaka fakangāue ko e Latter-day Saints in Publishing, Media and the Arts (LDSPMA, Kau Māʻoniʻoni ʻi he Ngaahi ʻAho Kimui Ní ʻi he Pulusí, Mītiá mo e ʻĀtí).
ʻOku mēmipa ʻa Sikoti ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, naʻá ne ʻalu ki he Kātoanga Fakalāngilangi ʻa e LDSPMA naʻe fakahoko ʻi he ʻUnivēsiti ʻo e Teleʻa ʻIutā (Utah Valley University), USA, ʻi ʻOkatopa ʻo e taʻu kuo ʻosí, ʻo ne tali ai ʻene Pale Fakalāngilangí koeʻuhí ko ha foʻi vitiō ʻo ʻene foʻi hiva pē ʻaʻana, ʻI See the Christ.’
Naʻe faʻu ʻe Sikoti ʻa e foʻi hiva ikuná ki ha tuʻungafasi ʻokú ne lolotonga fatu ʻoku ui ko e One Spring Morn, ʻa ia ʻoku fakamanatua ai ʻa e moʻui ʻa e palōfita ko Siosefa Sāmitá mo hono uaifi ko ʻEmá. Naʻe fakatou kau ʻa e ʻI See Christ’ mo ha foʻi hiva kehe ʻe taha ko e ʻBring on Tomorrow’, ʻi hono filifili ki he palé ʻi he kulupu ki he Musical Theatre.
Naʻe faʻu ʻa e foʻi vitiō ʻo e ʻI See the Christ’ ʻi Sōleki Siti ʻi he 2022, ʻo hivaʻi ʻe Keisī ʻElieti, mei he kau tiliō Gentri, pea mo Savana Sitīvenisoni, ko ha fefine hiva ʻiloa mei he Ngataʻanga Fakahihifo ʻo Lonitoní. ʻOku tokoniʻi kinaua ʻe Sēini Kalouei ʻi he pianó mo e tokotaha tā selo ʻiloa ko Nikola Peneli.
Naʻe fuofua sio ʻa Sikoti ʻi he tā-meʻalea ʻa Nikolá ʻi ha filimi hiva ʻa Lopi Kātinā ko e Lamb of God (Lami ʻa e ʻOtuá), naʻá ne fakafofongaʻi ʻi he founga fakaʻofoʻofa, ngāue ʻaki ʻene seló, ʻa e leʻo ʻo Kalaisí. Naʻe talangofua ʻa Sikoti ki ha ongo naʻá ne maʻu ʻi hono lotó, ʻo ne fetuʻutaki ai kiate ia ʻi he mītia fakasōsialé.
ʻOku manatuʻi ʻe Sikoti, “ʻOku ou ongoʻi kuo fakaava moʻoni ʻe he Tamai Hēvaní ha matapā kiate au ʻo fou ʻi he talēniti fakaofo, angaʻofa, mo e fetuʻutaki ʻa Nikolá. ʻOku ou fakamālō ʻi heʻene maʻu ʻa e loto ke fie fanongo ki heʻeku mūsiká.”
Naʻe fakafeʻiloaki ʻe Nikola ʻa Sikoti kia Keisī ʻElioti, pea fetuʻutaki ʻa Sikoti kia Savana Sitīvenisoni ʻi he mītia fakasōsialé foki, hili ʻene mamata ki he hiva [ʻa Savana] ʻi ha polokalama ʻa e ʻUnivēsiti Pilikihami ʻIongí. Naʻe hivaʻi ʻe Savana ʻa e solo ki he ʻBring on Tommorow,” pea tiueti mo Keisī ʻi he ʻI See the Christ.’
Ko e taimi naʻe kakato ai hono hiki ʻa e vitiō fakaʻaliʻalí, hili pē ha taimi siʻi mei he foki ʻa Sikoti ki ʻAositelēliá, naʻá ne fokoutua ʻi he pupula ʻa e halanga toto ʻi he ʻutó (brain aneurysm) pea fānoa ʻa e totó ʻi he konga kimuʻa hono ʻutó. Naʻe fai ha tafa fakavavevave kiate ia ʻo fakahaofi ai ʻene moʻuí pea mālō mo ha mana fakaofo naʻá ne lava ai ke hoko atu ʻene hivá.
ʻI Mē ʻo e taʻu pē ko iá, naʻá ne puleʻi fakaʻilekitulōnika ai hano lekooti haʻane toe foʻi hiva ʻe ua, ʻo fou pē ʻi he Zoom ki he Fale Hiki Hiva ʻi Sōleki Sití (Salt Lake Cityʻs Funk Studio).
ʻOku pehē ʻe Sikoti, “ʻOku ou fakafetaʻi taʻe-tūkua ki he Tamai Hēvaní mo e kau toketā faitafa leleí ʻi heʻenau fakahaofi ʻeku moʻuí, pea mo hoku uaifi ko Soú ʻi heʻene kei teke au ʻi he fononga fakamūsiká ni ʻi ha meimei taʻu ʻeni ʻe 15.”
ʻOkú ne fakamālō tatau pē ki heʻene ongomātuʻá, kia Naneta mo Falangikē ʻi heʻena tanumaki hono talēniti mūsiká mei heʻene kei siʻí. Kimuʻa siʻi pea siʻi mālōlō ʻa e faʻē ʻa Sikotí ʻi he 2020, naʻá ne palōmesi ange ʻe hoko atu ʻene faʻu hivá, pea kuó ne fai ia.
ʻOku pehē ʻe Sikoti, “ʻOku hoko ʻa e teuteu maté ke fakatupunga ai ʻa e toe tokanga ange ha taha ki he ngaahi meʻa ʻoku mahuʻinga ʻi he moʻuí. Kiate aú, ʻoku kau ai ʻa e tuí mo e fāmilí pea kau ai foki mo ha ngaahi hiva ʻokú ne langaki ʻa e tuí ke lahi ange.”
ʻOkú ne fokotuʻutuʻu mo teuteu ʻi he taimí ni ke fakahoko ʻene polokalama mūsika kuó ne tatali fuoloa ki aí ko e One Spring Morn. ‘Oku ʻamanaki ke fakaʻaliʻali lahi ʻi he 2025—ko e taʻu kakato ia ʻe 205 talu mei he ʻUluaki Mata Meʻa-hā-mai ʻa Siosefa Sāmitá—ʻe fakaʻauliliki ʻe hono talanoá ʻa e ngaahi aʻusia ʻa Siosefa mo ʻEma Sāmitá, ko ʻena ngaahi ongó mo ʻena tuí mo ʻena līʻoa ki hona Fakamoʻui ko Sīsū Kalaisí, pea mo ʻena fakahoungaʻi ʻEne ngaahi ʻaloʻofa ongongofuá.
Fakasio ʻa e koniseti makehe ʻo e polokalama hivá ni ʻi Melipoane, ʻAositelēlia, ʻi Sune ʻo e taʻu ní.